كنت بصلح التكييف انهارده

**hazem_khidr** · 31-07-2007 10:59 PM

من يوم ما الصيف دخل و انا عاوز اروح اعمل الصيانه للتكييف و اشوف العيب جاي منين و ليه مش بيشتغل بس كنت بكسل انزل علشان بتاخر بالليل في النوم و مش بقوم بدري ف مش بستعمل العربيه غالبا بالنهار غير قليل و بالليل الجو بيبقي معقول غير كده عارف ان القاعده عند الكهربائي بتاعي حتبقي طويله علشان بيشتغل بمزاج.
المهم قمت من النوم الساعه 11 و توكلت علي الله و روحت و بدات شغل علي طول فيه.
اول حاجه كشف عليه لاقاه مافيهوش فريون ف شحنه هوا و جاب ميه بصابون علشان يشوف لو في تسريب و فعلا لقه التسريب في الكمبروسر!!! ف قام فاكك الكمبروسر و نضفه و فكه من جوا و غير ليه جوان و بعدين ركبه تاني وملاه زيت و جربه لقاه تمام.
جينا نبص علي السربنتينه لقيتها مش عليها تراب لاء دي عليها طين المهم فكتها و اخدتها المشحمه و كيس بريل و غسلتها هناك و رجعت تاني بتلمع و شكلها بقي جديد. و اخدتها و روحنا ركبنا كل حاجه و شحن هوا تاني علشان لو لسه في تسريب و الحمد لله ما لقاش. ف قومنا جايبين فريون و شحن التكييف و شغله و بعدين لقينا العربيه عماله تعلي صوتها و توطي لوحدها من غير ما احط رجلي علي دواسه البنزين!!!!!!!
قالي ان دا معناه ان الكمبروسر بيشتغل و يفصل علي طول و دا غلط. و فك الكارته الي متركبه في التلاجه اللي جوا العربيه و لقي العيب منها فعلا و قالي الكارته دي غاليه و الاحسن تجيب ترموستات بتاع الاوبل و تركبها و انت حر اعمل اللي تشوفه.
بصراحه روحت ادور علي الكارته مالقيتهاش لا جديد و لا مستعمل قولت بس اجيب الترموستات و بعدين انا واثق في كلام الراجل دا قوي علشان معظم العربيات في المحله عندنا بتشتغل تكييف معاه و راجل بصراحه عشره علي عشره.حتي في مره كنت حجيب عربيه من غير تكييف ف بقوله تعرف تركب ليها تكييف قالي لو جبتلي عجله حركبلك تكييف ما تقلقش :D .
المهم جبت الترموستات اللي قالي عليها و ركبناها و ركبنا كتاوت و لغينا الكارته خالص و التكييف اشتغل الحمد لله تمام اوي و بيبرد كويس و مش مأثر علي العربيه بالدرجه اللي كنت متخيلها يعني سحب العربيه ما زال كويس
رجعت من عنده الساعه حوالي 7 و نص بالليل يعني حوالي 8 ساعات بصلح فيه بس الحمد لله جه بفايده

**sokasoon** · 31-07-2007 11:12 PM

مبرووووووووك يا حازم على تصليح التكيف

ومش مهم 8 ساعات المهم ان التكيف بقا تمام

**hazem_khidr** · 31-07-2007 11:16 PM

مبرووووووووك يا حازم على تصليح التكيف

ومش مهم 8 ساعات المهم ان التكيف بقا تمام

الله يبارك فيك يا لولو تعرف انا لما ركبت العربيه بعد ما صلحته حسيت اني راكب عربيه تانيه خالص فعلا العربيه بقي ليها طعم تاني و مش عاوز انزل منها و كنت خايف من موضوع السحب بس الحمد لله التكييف مش مأثر اوي عليه و العربيه ماشيه كويس و لسه بتطلع امريكاني اول ما ادوس علي البنزين جامد من غير دبرياج :mrgreen:

**عزيز محمد** · 01-08-2007 12:27 AM

السلام عليكم ورحمة الله وبركاته

يا أستاذ حازم أنا باغبطك (ولا أقول باحسدك) على الصنايعية المحترفين اللى موجودين عندك فى المحلة

بصراحة الواحد نفسه يسكن فى المحلة عشان أولا يتشرف بحضرتك وثانيا يبقى جنب الناس الجامدة دى بدل ما يقعد يتجرب فيه :twisted:

والسلام عليكم ورحمة الله وبركاته

**hazem_khidr** · 01-08-2007 12:41 AM

السلام عليكم ورحمة الله وبركاته

يا أستاذ حازم أنا باغبطك (ولا أقول باحسدك) على الصنايعية المحترفين اللى موجودين عندك فى المحلة

بصراحة الواحد نفسه يسكن فى المحلة عشان أولا يتشرف بحضرتك وثانيا يبقى جنب الناس الجامدة دى بدل ما يقعد يتجرب فيه

والسلام عليكم ورحمة الله وبركاته

و الله يا استاذ عزيز المحله تشرف و تنور و انت لو عندك اي حاجه شرفني بس و انا اوديك لناس يعملولك اللي انت عاوزه و باقل التكاليف.يعني موضوع اللي عملته انهارده دا لو عمله لحد بياخد فيه 50 جنيه لكن علشان معرفتي ما اتكلمش معايا في فلوس نهائي و معظم الصنايعيه كده معايا علشان بقي عشره عمر و علي طول مع بعض و كده.
لعلمك من و انا عندي 8 سنين و انا بقف عند صنايعيه بشوف كل حاجه بنفسي علشان كده الحمد لله بعرف الصنايعي الكويس من الوحش و بتعامل مع ناس معينه طول عمري بروح ليهم و ساعات اجرب غيرهم و ارجع ليهم تاني.
يعني مثلا التكييف دا انا عارف ان الكهربائي بتاعي الوحيد اللي حيعرف يحل مشكلته و قولتله عليها من فتره قالي هاتها اي يوم ما عدا السبت و الخميس علشان ببقي زحمه و انا عاوز اشتغل في الروقان في العربيه دي !!!! شوف بقي مدي الاخلاص و حب المهنه.
طب الراجل دا مره كنت بعمل عنده ضفيره للعربيه ال 125 القديمه بتاعي تعرف قعد فيها كام يوم؟؟ بالضبط 7 ايام يعمل فيها و قالي انا بعمل كده علشان لما يبقي فيها حاجه بعد كده اشتغل فيها انا لكن بصراحه انا كنت بقرف احط فيها ايدي قبل كده :mrgreen: .
و فعلا بعد ما عملها كان منظر السلوك وهم. اولا مفيش حاجه اسمها سلكين يلمسو في بعض و عليهم شيكرتون و خلاص.. لاء كل حاجه بكليبسات و كل كام كليبس بفيشه علي قدهم و كل الاسلام متغطيه بمكرونه( خراطيم بيمشي جواها الاسلاك) لدرجه السلك الرفيع اللي بين المبينه و الاسبراتير من تحت كان جايب له مكرونه رفيعه علي قده!!!! تخيل بقي كانت طالعه عامله ازاي؟؟
و عموما انا في انتارك اي يوم لو تحب يا اخ عزيز

**عزيز محمد** · 01-08-2007 12:53 AM

السلام عليكم ورحمة الله وبركاته

يا أخى ربنا يكرمك بالخير دايما

ويبارك لك فى علاقاتك :D

وشكرا على دعوتك الكريمة التى سأسعد بتلبيتها (فى أقرب حادثة أو مشكلة لا قدر الله) :lol:

والسلام عليكم ورحمة الله وبركاته

**hazem_khidr** · 01-08-2007 01:17 AM

ربنا يبعد عنك الحوادث و عني و عن المسلمين جميعا.يعني لازم نشوفك في حادثه؟؟؟ :D :D
تشرف و تنور في اي وقت يا استاذ محمد

**m10_10** · 01-08-2007 10:22 AM

ربنا يباركلك يا استاذ حازم في الصنايعية اللي عندك

الواحد بجد بيتعب جدا لحد مايلاقي حد كويس خصوصا لو خبرتة تعبانة زيي في حكاية الميكانيكا دي...

الواحد فعلا بخاف اي حد يحط ايدة في عربيتة عشان فعلا فية بعض الناس سواء ميكانيكية او كهربائية او عفشجية ماسافة مايحط ايدة في العربية تلاقي البلاوي عماله تطلعلك

مبروك يا ريسنا عالتكييف وربنا يباركلك فية