المشاركة الأصلية كتبت بواسطة hh
اسعى تاني و و خلى معارفك و قرايبك يدورولك و شوف واحدة و اتنين و عشرة و ادعى ربنا في كل صلاه انه يقر عينك بزوجة و اولاد صالحين.
نييجي بقى لمواضيعك القديمة, انا كنت متابعة أغلبها و مبرضاش اعلق. بصراحة شديدة انا كنت شايفة في موضوعاتك نمكية شديدة سواء في الاختيار المبدئي او في المرات اللي حاولت تكمل فيها و بعدين فشكلت الموضوع يعني كنت شايفاك محبكها شوية.
مبدأيا انا كنت حاسة من كلامك انك شايف نفسك زيادة شوية, بمعنى انك اكتر من مرة تتكلم انك جاهز و اي واحدة تتمناك و البنات هما اللي فيهم عيوب انت بتتنازل و تتغاضى عنها. ال attitude ده كفيل انه يقفل اي واحدة منك و انه يخليك تتخلى بسهولة عن اللي ترضى بك لأنك مقتنع انك أحسن دايما. لازم تعرف انه كل واحد في نفسه ملك, و كل أهل شايفين ابنهم او بنتهم أحسن و احد في الدنيا, لو قررت تدخل علاقة لاااااازم تبقى مقدر اللي معاك و شايفها تستاهل مش مستخسر نفسك فيها. و مفيهاش حاجة ان اي عروسة تبقى ليها طلبات او أهلها يبقى فيه حاجات مش عايزين يتنازلوا عنها, ما هو انت كمان عندك طلبات و شروط, عادي يعني كل حاجة بتتحل بالتفاهم و مرة ليك و مرة عليك.
ثانيا انت عندك مشكلة انك طول الوقت خايف و مرعوب انك تدبس مش عارفة ليه!!!! و ده بيخليك تتلكك لأي واحدة تبتدي موضوع معاها. دي قالت كلمة لأختى معجبتهاش, و دي أهلها رجعوا في كلامهم في حاجة (مع ان ده عشان يرضوك), و دي شكلها لطيف بس خايف بعد الجواز ابص لغيرها و غيره و غيره. طبعا ممكن كلامي يبقى مش موضوعي و انت ادرى ان كانت ملحوظاتك تستاهل تفركش الموضوع و لا لأ بس ده اللي انا حسيته.
ثالثا, انت بتسمع كتير لناس تجاربها سيئة او للشباب بتوع البنات كلهم زبالة و ميستهلوش نتفضل عليهم و نتجوزهم و دول صنفين مينفعش تمشي ورا كلامهم. يمكن النوع الاولاني مهم تاخد عبرة من تجاربهم بس مينفعش نعمم على كل البنات. يا راجل دول كرهوني انا شخصيا في الستات :)
رابعا بقى انت لازم تعرف ان الجواز زي اي علاقة في الدنيا مش مثالي و ماشي بالورقة و القلم زي ما انت عايز. مفيش انسان في الدنيا كامل و مفيش اتنين متفصلين على بعض. المهم انك تختار واحدة الحاجات اللي عاجباك فيها اكتر كتير من الحاجات اللي مش عاجباك. و لازم تعرف انها حتغلط و حتعمل او تقول حاجات تضايقك هي او أهلها, زي ما انت و اهلك ممكن جدا تعملوا حركات تضايق برضه. لو معندكش استعداد تدخل الموضوع و تتعامل بحسن نية و تفوت الحاجات البسيطة يبقى مش حينفع. مفيش جوازة مبيحصلش فيها مشاكل قبل و بعد الجواز, لو مش حتتنازل ساعات و تتفاهم ساعات و تصفي بعد الخناق مش حتكمل في علاقة. حسن النية, حسن النية, حسن النية, و تقدير الطرف الأخر و تقدير مشاعره و طريقته و ظروفه من غير كدة تبقى عايز ملاك بجناحات و ده مش موجود لا رجالة و لا ستات.
خد الموضوع ببساطة و متبقاش متوتر و حاطط نفسك و اللي معاك تحت ضغط. ربنا يا رب يوفقك و يرزقك بالزوجة و الزرية الصالحة.