هو الغلط فين بالظبط

**mody1982** · 06-03-2016 10:15 PM

من حوالي 9 شهور انا كنت كتبت عن موضوع جواز كده و مكملش
و اللي متباع مواضيعي هيعرف ان بقالي سنين طويله حوالي 6 سنين بدور علي عروسه و في ال 6 سنين دول شوفت حوالي 13 واحده محصلش نصيب معاهم سواء اللي رفضني او اللي رفضته
من كام يوم كده هفني الشوق و قولت اشوف ال 13 دول حصل معاهم ايه كان في شويه ايام ما شوفتهم منت قدرت ادور علي الفيس بوك بتاعهم لقيته فلما دورت لقيت ان اللي معظمهم قالولي لا متجوزش لسه و اللي انا قولتلهم لا اتجوزوا
الغريب اني مش عارف اتجوز فعلا و من اكتر من 9 شهور مشفتش ولا عروسه
و الواحد عمره بيجري و علي ابواب ال 35 سنه
قعدت فكرت كده لقيت اني خلاص عجرت 5 سنين كمان و بقيت 40 سنه
و صحابي عيالهم بقوا في ابتدائي و الصغير فيهم في حضانه
المشكله كمان ان الواحد صراحه مش مستقر خالص بالوضع ده
و علي رأي احد الدكاتره اللي مش متجوز بيبقي انسان غير سوي لان عنده نقص في الحاجات الاساسيه اللي طبعا الجواز بيوفر واحده منها بجانب العامل العاطفي و الانساني
ساعات بسأل نفسي المشكله فين و ليه الحلال بقي صعب كده و الحرام عمال يبقي سهل
انا كأنسان معنديش اي مشاكل اني افتح بيت او اوفر متلطبات الجواز بس الدنيا مش ظابطه معايا
رغم اني بدور و بسعي كتير
و ساعات بقول ما كنت رضيت باي واحده من اللي كانوا قابلين بيا و السلام
مش احسن من الوضع اللي انا فيه دلوقت
و المشكله اني خايف اتجر علي النت لعلاقه زي ما ناس كتير عامله و المشكله ان ساعات الناس دي بيقعوا بسهوله مع ستات متحوزه و ازواجهم هاملاهم و دول غالبا بيبقوا مستعدين يعملوا اي حاجه علي الاقل علي النت ان مكنش في الواقع مقابل ان اي راجل يحسسهم بالاهتمام و الاعجاب
و الواحد بيشوف ناس حواليه ماشين في السكه دي في منهم اللي مقضيها علي النت بس و في منهم اللي غوط استغفر الله العظيم و لما تيجي تكلمهم يقولك هو انا لقيت الحلال و قولت لا و ده بيحلي الواحد بيبقي مشوش ومع الوقت نفسيا بيضعف و تبدء دماغه تلف

نتفق او نختلف لكن عيشه الانسان كده من غير جواز و في زمن زي دي مش حاجه كويسه بالعكس دي بتخيله معرض لضغوط كتير
بس ارجع و اقول الغلط فين حد عارف

**Egymagic** · 06-03-2016 10:34 PM

انا أولا مش بحب جواز الصالونات
بس عندي حل ليك ممكن تشوف أي معهد بيدي كورسات وتشترك فيه وهناك حيبقي ليك اكيد زميلات ممكن تتعرف عليهم عادي كزملاء دراسة ويا عالم يمكن تلاقي اللي تعجبك , انت كدا مش بتعمل حاجة حرام وفي نفس الوقت بتتعرف عليها بشكل اكبر

**amr011111** · 06-03-2016 11:23 PM

البنات الكويسين كتيره. بس اهم حاجه تاخد بالاسباب يعنى لما تدور تدور على نفس مستواك الاجتماعى والمادى او اقل شويه. ومتروحش للى اعلى منك علشان متبقاش بتضيع وقتك. الحاجه التانيه ان انت بالتأكيد قلقان من موضوع الجواز وكل ده احنا مرينا بيه كلنا وبالتوفيق

**tasaka** · 07-03-2016 02:35 AM

1- بلاش تطلع اول سلمه فى سكه النت دى .. علشان متطلعشى بقيه السلالم .. ان كيدهن عظيم
و الانسان النظيف لو طلع السلالم دى .. حتكون حالته النفسيه اسوء جدا من حالته السابقه .. يعنى طريق ملوش لازمه ( على الاقل للانسان النظيف )

2- حاول تقلل متطلباتك شويه فى شريكه الحياه .. الكمال لله وحده
فلو وجدت انسانه فيها معظم مواصفاتك فحاول ان تتقبلها و تعطيها فرصه .. بشرط ان تكون المتطلبات المفتقده فيها من الاشياء الثانويه

3- بلاش تنبش الماضى .. و الانطباع الاول هو الاخير .. فمن رفضتها انت سابقا .. ستمر الايام و يعود نفس الشعور اليك بعد الزواج
و من رفضتك سابقا سيعود نفس انطباعها لاحقا بعد الزواج
الكلام ده مؤكد 100% عن تجارب حقيقيه

4- من ستتزوجها ستكون هى زوجتك فى الدنيا و الاخره ان شاء الله .. ده مكتوب .. فكن واثق بالله

5- رددت عليك كثيرا فى موضوعك السابق و اتذكره .. انت بتشوف عروسه بمعدل واحده كل 6 اشهر او اكتر .. و اتذكر اننى نصحتك باسراع ايقاع اى موضوع تريده و اهمها طبعا الزواج .. يعنى ال 9 دول كان لازم كنت شفت العدد ده فى سنه واحده موش 6 سنين

تمنياتى و دعواتى ان يحقق الله امالك و يرزقك بالزوجه الصالحه و يقر عينك بالاولاد و الحياه الهنيئه

**Bassem Youssef** · 07-03-2016 04:32 AM

العادات و التقاليد المصريه العقيمه + انهيار اخلاقي اجتماعي مالي سياسي + مستوي جمال الفتيات المتدني

**ashekwalaa** · 07-03-2016 07:53 AM

عرضت عليك قبل كدة اني اجوزك وانت متواصلتش معايا ... وقلتلك عند والدتي قاعدة بيانات كفيل انها تجوز سليمان الحلبي ذات نفسه ... عموما ربنا يهديك للصواب ويعوضك خير عن سنينك اللي عدت

**volociximab** · 07-03-2016 09:03 AM

متتجوزش الا واحده انت مقتنع بها لكى لا تطلقها بعد ذلك
عاوز اسألك سؤال تسأله لنفسك
انت عاوز ايه؟؟؟؟؟؟؟؟؟؟؟؟؟؟؟؟
الدين و الجمال و ما الى اخره كلنا بنحبه
لكن
بينك و بين نفسك ما هى التفاصيل الدقيقة للبنت التى تريدها؟

لما تحدد هدفعك مش هتروح لأى بنت الا البنت التى لاقت قبول مبدئي او يظهر من الخارج انها تتطابق مع مواصفاتك
و لن تجد مواصفاتك كلها لكن يكفى تحقق الجزء الاهم منها
و حاول بالطرق غير التقليدية--زى المكاتب و الستايل الجديد للخاطبة دلوقت
الكلام ده مش عيب و بيحل مشاكل و بيوفق ناس مع بع بعض
كانت موظفة الحضور و الانصراف فى مستشفى اعمل بها قاعده تتفرج على البنات (الطبيبات ) و الاطباء و توفق ما بينهم
ما تيجى اجوزك يا دكتور؟
عندى ليك عروسه؟
كانت بتعملها تقريبا هوايه
و كان البنات و الرجال يأتون لها من خارج المستشفى
و تلف الدنيا و نسافر و الاقى احد اقرب اصدقائى فى الغربة هى الى مجوزاه و بيت مستقر و اولاد و زى الفل ما شاء الله
وقصة زواجى كتبتها فى المنتدى ايضا و هى غير تقليدية ايضا
الخلاصة: لازم تعرف انت عاوز ايه بالضبط
و لا تتوقع الوصول الى كل ما تريد
و فى نفس الوقت مفيش حاجة اسمها جوازة و السلام و الا هتندم(لازم تبقى ماليه عينك)
و حاول بالطرق غير التقليدية

hh · 07-03-2016 12:55 PM

اسعى تاني و و خلى معارفك و قرايبك يدورولك و شوف واحدة و اتنين و عشرة و ادعى ربنا في كل صلاه انه يقر عينك بزوجة و اولاد صالحين.

نييجي بقى لمواضيعك القديمة, انا كنت متابعة أغلبها و مبرضاش اعلق. بصراحة شديدة انا كنت شايفة في موضوعاتك نمكية شديدة سواء في الاختيار المبدئي او في المرات اللي حاولت تكمل فيها و بعدين فشكلت الموضوع يعني كنت شايفاك محبكها شوية.

مبدأيا انا كنت حاسة من كلامك انك شايف نفسك زيادة شوية, بمعنى انك اكتر من مرة تتكلم انك جاهز و اي واحدة تتمناك و البنات هما اللي فيهم عيوب انت بتتنازل و تتغاضى عنها. ال attitude ده كفيل انه يقفل اي واحدة منك و انه يخليك تتخلى بسهولة عن اللي ترضى بك لأنك مقتنع انك أحسن دايما. لازم تعرف انه كل واحد في نفسه ملك, و كل أهل شايفين ابنهم او بنتهم أحسن و احد في الدنيا, لو قررت تدخل علاقة لاااااازم تبقى مقدر اللي معاك و شايفها تستاهل مش مستخسر نفسك فيها. و مفيهاش حاجة ان اي عروسة تبقى ليها طلبات او أهلها يبقى فيه حاجات مش عايزين يتنازلوا عنها, ما هو انت كمان عندك طلبات و شروط, عادي يعني كل حاجة بتتحل بالتفاهم و مرة ليك و مرة عليك.

ثانيا انت عندك مشكلة انك طول الوقت خايف و مرعوب انك تدبس مش عارفة ليه!!!! و ده بيخليك تتلكك لأي واحدة تبتدي موضوع معاها. دي قالت كلمة لأختى معجبتهاش, و دي أهلها رجعوا في كلامهم في حاجة (مع ان ده عشان يرضوك), و دي شكلها لطيف بس خايف بعد الجواز ابص لغيرها و غيره و غيره. طبعا ممكن كلامي يبقى مش موضوعي و انت ادرى ان كانت ملحوظاتك تستاهل تفركش الموضوع و لا لأ بس ده اللي انا حسيته.

ثالثا, انت بتسمع كتير لناس تجاربها سيئة او للشباب بتوع البنات كلهم زبالة و ميستهلوش نتفضل عليهم و نتجوزهم و دول صنفين مينفعش تمشي ورا كلامهم. يمكن النوع الاولاني مهم تاخد عبرة من تجاربهم بس مينفعش نعمم على كل البنات. يا راجل دول كرهوني انا شخصيا في الستات :)

رابعا بقى انت لازم تعرف ان الجواز زي اي علاقة في الدنيا مش مثالي و ماشي بالورقة و القلم زي ما انت عايز. مفيش انسان في الدنيا كامل و مفيش اتنين متفصلين على بعض. المهم انك تختار واحدة الحاجات اللي عاجباك فيها اكتر كتير من الحاجات اللي مش عاجباك. و لازم تعرف انها حتغلط و حتعمل او تقول حاجات تضايقك هي او أهلها, زي ما انت و اهلك ممكن جدا تعملوا حركات تضايق برضه. لو معندكش استعداد تدخل الموضوع و تتعامل بحسن نية و تفوت الحاجات البسيطة يبقى مش حينفع. مفيش جوازة مبيحصلش فيها مشاكل قبل و بعد الجواز, لو مش حتتنازل ساعات و تتفاهم ساعات و تصفي بعد الخناق مش حتكمل في علاقة. حسن النية, حسن النية, حسن النية, و تقدير الطرف الأخر و تقدير مشاعره و طريقته و ظروفه من غير كدة تبقى عايز ملاك بجناحات و ده مش موجود لا رجالة و لا ستات.

خد الموضوع ببساطة و متبقاش متوتر و حاطط نفسك و اللي معاك تحت ضغط. ربنا يا رب يوفقك و يرزقك بالزوجة و الزرية الصالحة.