الموضوع: حادث بسيط وتغير الرفرف اليمين خلفي نيسان صني

السلام عليكم ورحمة الله
بسم الله الرحمن الرحيم
نبتدي الحكاية من الأول
- من 3 أسابيع حصلي حادث بسيط على الكورنيس ( بجانب معرض مفكو حلوان)
وبفضل الله طلعت منه سليم ( وده أهم حاجة - شوية آلام بسيطة في الرقبة والحمد لله)
المهم عشان ماطولش عليكم نزلت من العربية لقيت الرفرف اليمين خلفي تقريبا بقى كفته طبعا مع الفانوس وحته من الشنطة والزجاج الخلفي بقى فتافيت والباب الشمال خلفي اطبق شوية والاكصدام الخلفي بقى على الارض ( من الاخر العربية ملووحة ناحية الشمال من ورا شوية )
- استعوضت ربنا وقلت الحمد لله وخدتها وركنتها في جراج ( عشان ماتتسرقش طبعا )
- وسألت عن سمكري كويس في حلوان ( قالولي ورشة الحج حلمي في الحرفيين)
خدت العربية ورحتله ( وبعد ما فك الكنبه اللي ورا ) قالي مبدئيا الرفرف اليمين خلفي عايز يتغير ونحاول نستعدل الشنطة والباب ونركب الاكصدام وربنا يسهل
المهم ده هيتكلف كام يا سيد قلي رقم غريب قوي ( 3000 جنيه ) طبعا قولتله بس ده عالي شوية
طبعا قعد يغني كتير عن ان العربية ملووحة ناحية الشمال وهتاخد شغل كتير عشان يستعدلها وحاجات كده كتير المهم قلتله خلينا نشتغل الاول وبعدين نتكلم في الفلوس
ونزلت طبعا ادور على الرفرف اليمين ورا استيراد
طبعا قالولي مش هتلاقي غير في صقر قريش أو حرفيين السلام وممكن التفيقية
المهم السمكري قالي في واحد على الكورنيش عند المعصرة
نزلت صقر قريش ولفتها كلها تقريبا ملقتش غير محلين فيها هما اللي عندهم حاجات نيسان استيراد وقالولي ان مفيش حاجة اسمها رفرف لواحده ولازم اشتري ربع كامل (فاخده) مقصود رفرف خلفي بجزء من العتب مع شوية حاجات تانية
المهم بكام يا جماعة ( 2000 جنيه ) وممكن ينزلوا شوية
بصراحة لما سمعت الرقم فوجئت ( وكنت قرأت قبل كده ان الرفرف الخلفي في التوكيل عامل 1800 جنيه ) فقلت أسأل في التوكيل قالولي فعلا 1820 جنيه + ضريبه ( 2000 جنيه)
بصراحة كنت محتار اشتري مين فيهم ولما سألت السمكري قالي هات الاستيراد عشان فيه حاجات تانية هتكون معاه هنحتاجها
وخلاص نويت اشتري الاستيراد وبعدين قولت انزل المعصرة أسأل هناك وفعلا رحت لواحد اسمه (ابراهيم الطناني ) وسألت لقيت عنده والحمد لله ولما سألت عن السعر ( 1000 جنيه) صعقت من فرق السعر وكنت فاكر انه مش واخد باله انا عايز ايه بالضبط لكن تاكدت بالضبط انه نفس الحاجة
وطبعا اتفقت معاه بسرعة بس قلت اجيب السمكري يبص عليه قبل ما يقطع ( عنده نص بيقطعه حتتين - تحس انك في محل فراخ ) والسمكري بص عليه وقال تمام هو ده اللي احنا عايزينه وخدناه بعربية للورشة
وجاري تصليح العربية

يا ريت لو فيه اي نصائح حول السمكرة والدوكو
دعواتكم .................... والسلام عليكم ورحمة الله وبركاته

1400 رشتها عدا السقف بس معجبتنيش الرشة دى