طنط و الدولار

**hobiko** · 17-03-2016 04:04 PM

طنط و الدولار
ألو إزيك يا حبيبى؟
إزيك يا طنط
موش إنت بتاع إقتصاد و كدة, فكنت عايزة اسألك سؤال
بلاش يا طنط
بلاش إية يا براوى !!!!
بلاش تشترى دولار
هااااااااا, عرفت منين يا واد , ماشاء الله عرفت منين أنى هسألك السؤال دة ؟
عادى دة سؤال الساعة و ردى بوضوح, بلاش تشترى دولار و وديعة البنك الأهلى أم 12.5% كفاية اوى و مناسبة ليكى
إسمع بس , اصل الواد البقال بيقولى هيوصل ل 12 جنية و إنت عارف يعنى ....
لأ موش عارف إن البقال بيفهم في فلوسك, حضرتك خبيرة مضاربة على الدولار؟
لأ طبعا, بس شاكلة طالع طالع
و إذا نزل , موش هترقعى بالصوت زى ما عملتى في الدينار العراقى !!!
إنت لسة فاكر, بكلمك على الدولار إنسى العراقى دلوقتى
و أنا بقول لحضرتك لو إشتريتى الدولار ب 9.3 دلوقتى لازم يوصل فوق ال10.5 في سنة علشان متكونيش خسرانة
إزاى يعنى !!!!!
حضرتك فلوسك في البنك الأهلى ب 12.5%, لو سحبت 9300 جنية من البنك و إشتريتى ألف دولار, هتخسرى فايدة بنك 12.5% لمدة سنة قيمتها 1162 جنية, علشان تعوضى الرقم دة الدولار لازم يوصل إلى فوق ال10.5 و إلا تكونى خسرتى فايدة البنك المضمونة
ما أنا بقولك يا بنى ممكن يوصل إلى 12 جنية
فى رأيك يوصل 12 إمتى , بكرة مثلا و لا بعد سنتين؟
نقول بعد سنتين
برضة لو وصل 12 بعد سنتين هتكونى كسبانة حاجة صغيرة جدا جدا
طب إشرح
سحبت 9300 جنية من البنك, إشتريتى 1000 دولار, بعد سنتين وصل إلى 12 بقى معاكى 12 ألف جنية, بينما 9300 جنية فى البنك ب12.5% هتكون فى أول سنة 10,462 و تانى سنة 11,770 , يعنى فرقت عن الدولار فقط حوالى 300 جنية !!!!
300 بس
أة و ممكن جدا لا يصل إلى 12 و تكونى خسرتى جامد, ممكن لا يوصل إلى 12 و إنت تترعبى فتبعية و تخسرى كمان
بس أنا باخد فايدة البنك و موش بسيبها, حسبتك كدة موش مزبوطة
لا مزبوطة يا طنط لأنك لو إشتريتى دولار هتسيبية فى مكانة و مفيش فايدة, فلازم اقارنة بالجنية فى البنك من غير ما أخد الفايدة, علشان الفايدة تتراكم و المبلغ يكبر
ممممممممممممم
تعالى كركرى معايا يا طنط و أنا اشرحلك
بطل يا قليل الأدب
-----------------------------
لكل الطنطات و معاهم المهندسين و المحامين و أى مهنى حرفتة ليست المضاربة على العملة, إحترس و لا تضارب على مدخراتك, إكتفى ب 12.5% بتوع البنك الأهلى, المضاربة على الدولار خطر, موش لعبتك, متسمعوش أى كلام, تانى الموضوع موش لعبتك و مدخراتك مهمة, خليك فى المضمون, المضاربة خطر إلا لو إنت محترف
-------------------------------------------------------------

كل الحسابات ديه على شهادة البنك اللى ب 12.5% ............ دلوقتى كمان فيه الشهادة اللى على 15% لمدة 3 سنين ....... فعيد حساباتك بقى على النسبة ديه :)

منقول من الأستاذ مالك سلطان برضه

**ali ashraf** · 17-03-2016 06:32 PM

استثمار ا قد يناسب س و لا يناسب ب و استثمار ج قد يناسب ع و لا يناسب غ , بمعنى انت عايز ايه من الاستثمار و قدرتك على الاستثمار ........يعنى لو انسان متقاعد و معاه قرشين عايزهم يسندوا مع المعاش مثلا يبقى الشاهدة ب 12.5% معقولة بس فى واقع الامر ده مش استثمار بمعنى الربح لأن المتوقع مثلا هذا العام نسبة التضخم من 11 الى 14% يعنى ممكن تزيد عن نسبة الفائدة بس ده اقل الضرر , و اتفق مع حضرتك المضاربات فى العملة و البورصة مش لأى واحد ,,,,,,,, طيب لو معاى قرشين و مش محتاج منهم ريع او دخل شهرى ...يبقى حرام على احطهم فى شهادات فى البنك الافضل طبعا شراء عقار فى مكان مميز و عليه طلب و قد يتضاعف سعره فى سنوات قليلة , شراء الدولارات و المضاربة فيها مربحة جدا بس ده ضرب فى اقتصاد البلد و مش مفروض نعمل كده و انما من الناحية النظرية دى عايزة كم كبير من المال مع ترن اوفر سريع بمعنى لو معاك 100 الف دولار و سعر الدولار زاد 10 قروش حضرتك تبيع و تكون كسبت 10 الف جنيه , و لو زاد الدولار جنيه تكون حضرتك كسبت 100 الف جنيه و علشان كده شركات الصرافة و تجارة العملة ارباحها عالية جدا , و لو حضرتك مضارب و تقدر تصبر شوية ارباحك هتكون عالية جدا , الخسارة فى ظل الوضع الاقتصادى الحالى تقريبا غير واردة و لكن برضه ده موضوع له ناسه و ارجع و اقول المضاربة بالدولار فى وقت الازمة الاقتصادية عمل يخلو من المرؤة و ضرب فى اقتصاد البلد .

**رحالة** · 17-03-2016 07:38 PM

ايوة حتى الدولار ليه مخاطره
لكن مش لدرجة انك تقارنه بالدينار العراقي ههههههه

**volociximab** · 17-03-2016 08:07 PM

اشترى شقة و اجرها
ريع شهري و قيمة راس المال بتزيد مع الوقت

**Bassem Youssef** · 17-03-2016 09:39 PM

حاليا الدولار متوفر

اللي عايز يشتري يتفضل

لما تحصل ازمه للدولار

يبقي تشتري يورو مثلا

**هيثم مجدي** · 18-03-2016 01:01 AM

الدولار مش هينزل, الجنيه لو قيمته زادت هيتقال اصطلاحا ان الدولار نزل.
امتى الجنيه يزيد؟ مش هيزيد الا بمشاريع كبيرة تدفع الاقتصاد بنسبة نمو عالية تخلي الجنيه يتحرك. او بقروض ضخمة تنعش الاحتياطي. او باستثمارات كبيرة بعد رضا امريكا وصندوق النقد الدولي.
الأقرب والأوقع ان الجنيه ينزل اكتر امام الدولار. وفي احسن الاحوال يثبت في القيمة الحالية.

لو الجنيه فضل ثابت. فمحدش خسران حاجة.
لو الجنيه زاد, اللي حول دولار مش خسران برضه حاجة. لأن نسبة نمو الجنيه مش هتقدر تساوي قيمة نمو الدولار. يعني الاحتفاظ بالدولار أمان أكثر للفلوس. ولما يحول لجنيه حتى لو التحويل دا اقل من سعر الشراء مش مشكلة لان الجنيه قيمته ارتفعت والاسعار هتقل.

نقطة تانية. اللي يخلي واحد ياكل ربا محرم من فوائد الجنيه, مايشتري شهادات ودائع دولار و يحطه في البنك وياكل ربا محرم من فوائد الدولار. ماهو كله حرام. على الاقل الحرام الأمريكاني مضمون اكتر ولا الدولار لازم يتشال تحت البلاطة ومش بيقبلوه في البنك ودائع؟ اظن شهادات الودائع فوايدها 4%.

**رحالة** · 18-03-2016 01:54 AM

المشاركة الأصلية كتبت بواسطة هيثم مجدي

وولا الدولار لازم يتشال تحت البلاطة ومش بيقبلوه في البنك ودائع؟ اظن شهادات الودائع فوايدها 4%.

هم هيقبلوه بس تعمل حسابك ان ممكن ما يرجعوه
يقولولك خد بالجنيه بالسعر الرسمي
او الدولار بتلاته جنيه مثلا هههه

**hobiko** · 20-03-2016 07:58 AM

الفكرة من الموضوع شرح حقيقة المضاربة فى الدولار اللى بقت على كل لسان ........... و توضيح ان المضاربة مش لأى حد و احتمالات الخسارة كبيرة غير ان هامش الربح للمضاربين الصغار او للمواطنين العاديين مقارنة مع وسائل ادخار تانية ....... مش كبير ابدا و ممكن يكون اقل

**amrelsha3er** · 20-03-2016 11:12 PM

معاك حق وكلامك سليم ومنطقى
المضاربه بالعمله موضوع خطر ومظنش هتعيد بالنفع الملحوظ لمواطن عادى زى وزى حضرتك
هى عاوزه رجل اعمال او حد معاه مدخرات بالاخضر كتير زى ماحد الاعضاء قال 100الف دولار او خمسين الف دولار كده حط فبطنك بطيخه صيفى لانك ان شاء الله فعلا كسبان حتى لو 10قروش هيفرقو معاك
اما انك يبقى معاك قرشين اخضر وتفكر تضارب بيهم ملهاش لازمه اوى يعنى عليك وعلى الودائع واخرهم ام 15% بتاعه البنوك الحكوميه واهو منك برضو فدت بلدك المهم تعقد النيه وانت رايح عشان تؤجر
بالرغم ان دى فوائد وربا طبعا بس هنا هندخل فى الشق الدينى وده موضوع كبير اوى مش هندخل فيه
والبقاء لله فى الجنيه بتاعنا ياجماعه هو نازل نازل :(

**samyyousef** · 20-03-2016 11:18 PM

لو حد عاوز يضارب في العملة ...عليه بسلة العملات...يورو دولار ين الخ ...فيوزع المخاطر
لكن تحس ان الناس بتتعامل مع الدولار ليس كمضاربة في العملة...هي تتعامل معه على السمع...و على الضجة الاعلامية...ناهيك عن اولئك الموتورين اللي عاملين نفسهم زعلانين على البلد و هم يتمنون لها كل الشر