الموضوع: رحلة

السلام عليكم،،،
إليكم رحلة 8 سنوات قيادة لأوبترا أتوماتيك موديل 2009 عداد 180.000 كم
الحمد لله على كل الأحوال
الموضوع باختصار مش العربية
إطلاقا
الموضوع انت!!
أيوه أنت،، انت بتعاملها ازاي؟
بتعمل صيانتك في مواعيدها؟
بتشتري قطع غيارك أصلية؟
ضامن المكان اللي بتشتري منه؟
بتراعيها قبل السفر؟
الكلام اللي فات ده ينطبق على أي سيارة في الدنيا
العربية مش هنتكلم عن إمكانياتها ولا صور ولا الكلام ده، أعتقد أنه قد قتل بحثا.
خلاصة الثماني سنوات:
لم تقابلني فيها معضلة محددة أو مشكلة ملهاش حل، في الإجمالي لم أغير قطع غيار في غير ميعادها إلا خراطيم المياه وقربة المياة.
القربة حصل لها شرخ مكان الجزء الخارج منه وصلة الخرطوم العلوية ولاحظت تسريب منه وبالكشف تبين انه شرخ في جسم القربة وغيرتها بنفسي والتكلفة كانت 90 جنيه وهو ثمن القربة فقط.
خراطيم المياه: حصل لواحد منها قطع مفاجئ (العلوي للردياتير) قمت بتغييره هو السفلي معا للاطمئنان
طبة المياه الخلفية للموتور تآكلت ودي كانت أرخم حااااااااااااجه لأن تغييرها لا زم العربية تبرد نهائيا ونفك المنافولد والإنجيكشن وبرده المكان مزنوق واللي يغيظك بأه أن ثمنها خمسة جنيهات، يعني تعمل فيلم وبوليكة لمدة نصف يوم عمل كامل وتتكلف فك وتركيب رقم أهبل وكل ده علشان بتاعة بخمسة جنيه وحسبي الله ونعم الوكيل
مشكلة الثرموستات (بعد 6سنوات): ودي بتتغير بالكوعة وفكها وتركيبها سهل ومدة العمل قليلة تقريبا نصف ساعة
غير مشاكل المياه لا توجد أي مشاكل أخرى ولم أغير قطعة غيار واحدة بشكل مفاجئ أو في غير موعدها.
طيب هو ده سوء استعمال؟؟
أبداااااااااااااااااااا
كل شيء إلى الان في السيارة بيتغير في ميعادة طبقا والمانيوال الخاص بالسيارة.
المياة كل 40.000 تتغير بعد دورة غسيل بنوع مياة IADA السعودي لونها أحمر.
يبقى فين المشكلة؟ أعتقد أنها جودة خامات الأجزاء المشاركة في دورة المياه.
ولكن!!
مع اعتبار عدد الكيلو مترات المقطوعة وعدد السنين وعدم تغيير قطعة الغيار سبب المشكلة أكثر من مرة واحدة فهذا يعتبر مقبول تماما من سيارة بالقيمة المادية المدفوعة فيها
بينما ولله الحمد لم تظهر مشكلة ميكانيكا ولا مرة
ولا عفشة ولا مرة
ولكن هناك بعض العيوب اللي تقريبا متفق عليها من مستخدمي هذه السيارة
كضعف صاج الكبوت
ضعف العزم في بداية الانطلاق (مقبول نظرا لوزن السيارة)
زرار غلق دائرة التكييف (في منتصف مجموعة زاير التكييف) بيبوظ عند 70% من السادة الملاك
غير كده كلها أمور عادية جدا يعني مثلا تغيير البطارية كان بعد 4 سنوات
تغيير الكاوتش كان بعد 100.000 كم (مش عايز غلط )
كلها أمور أكثر من رائعة قلما تحدث في أي سيارة أخرى
استهلاك البنزين لما تعمل الصيانة في موعيدها وتغيير قطع الغيار الأصلية أكيد عمرك ما هتحس بالمشكلة دي لأني بصراحة ماقبلتهاش إلا في أول 5000 كم فقط وده عاااااااااااااااادي جدا
اسعار قطع الغيار عااااااااادية جدا ومش مبالغ فيها خالص بل ومعمرة
طبعا متبقاش عبيـ..... وتروح تشتري كل قطع الغيار أصلي
بخلاف اللي هكتبهم دول أنا بجيب البديل الكوري (البوجيهات - تيل الفرامل - السيور وملحقاتها) إنما بقى تقولي فلاتر (زيت-هواء-تكييف-بنزين) كوري يا معلم غيرت المساعدين الأماميين مرة واحدة بـ KYB وكانوا ممتازين ومازالوا يعملون بدون مشاكل
الخلاصة ثلاثة سطور
- العربية قيمة مقابل فلوس تعتبر صفقة هايلة
- الصيانة في مواعيدها بقطع غيار أصلية مضمونة المصدر
- مكان مضمون تصاين فيه (عن نفسي مع مهندس هاني ميخائيل وتركت الضمان بسببه "محترف")
آسف على الإطالة بس لو الزمن رجع بيا مرة ثانية برده كنت هجيب أوبترا