الموضوع: لوجان 2016 اوتوماتيك اتخبطت قبل ماتعلق نمر

العربية أوتوماتيك الفئة التالتة لسه مستلمها من العبور من اسبوع ومعلقتش نمر عشان ورقها متأخر.

اللي حصل: فجأة لقيت ال rpm بيعلى ومفيش سحب. وفي ثواني لقيت العربية كلبشت في الأرض وفولكس جيتا لابسة فيا من ورا. المشكلة اني مش فاكر أي حاجة بين المشهدين. ولا فاكر دوست على ايه ولا حصل ايه.

سألت مراتي اللي كانت جنبي وقتها، قالتلي إنها شافت حرف i بدل d على الشاشة. أنا مش عارف هل فعلاً فيه حرف كده؟ ولا دي تهيؤات؟ ولو فيه هل ظهوره مؤشر على حاجة؟ أنا فعلاً مش فاهم ولا قادر أفتكر.

سؤال تاني، هل فيه سيناريو للعربية الأوتوماتيك يخليها تقف فجأة وتكلبش في الأرض. أنا مش فاكر أي تفاصيل لدرجة إني مش فاكر دست فرامل ولا لأ.

أنا عايز حد خبرة في الفتيس الأوتوماتيك يديني كل التفسيرات الممكنة للي حصل.

---------

اللي حصل للعربية بسبب الخبطة:

- الاكصدام الفيبر اتطبق والحمد لله مفيهوش قطع او شرخ. فيها حاجات فردتها بإيدي وفيه أماكن أعتقد محتاجة تسخين.
- الباركنج سنسور شغال.
- فانوس اللوحة الخلفية اتكسر.
- الفانوس الورا يمين اترحل من مكانه 1 سم.
- الشنطة مكنتش عايزة تفتح، ولما ضغطتها لجوه ونا بادوس الزرار فتحت. لكنها مش عايزة تقفل تاني ورابطها بسلك دلوقتي.
- ده اللي خدت بالي منه لحد دلوقتي.

السؤال بقا أوديها لمين يلم الدنيا دي كلها بدون مايعور العربية، أروح التوكيل ولا أشوف سمكري بره. العربية كان المفروص تترخص ويتأمن عليها الأسبوع ده، مش عارف تأثير الخبطة دي على الفحص الفني والتأمين.

ربنا يحفظ الجميع ويحفظ شقاهم والحمد لله على كل حال.