الموضوع: إستشارة فى تغيير نوع الزيت

اختيار الزيت لا يتم بالماركة إطلاقا.. ووجود اسم ماركة زيوت معينة في الكتالوج هو مجرد اتفاق دعائي بين الشركتين لاأكثر...

القاعدة الأولى من القواعد الذهبية لاختيار الزيت المناسب بتقوللك : "اختار الزيت اللي مواصفاته زي مواصفات الكتالوج"

ولا بالماركة.. ولا ببلد المنشأ... إنما المواصفات.. والمواصفات فقط.

والمواصفات بيتقى عبارة عن حاجتين: لزوجة + مستوى أداء

ما ينفعش أشتري زيت مطابق للكتالوج في واحدة من الاتنين.. إنما لازم يكون مستوى الأداء كمان زي الكتالوج أو أحسن منه... بالإضافة للزوجة.


لمعلومات أكتر.. أنصحك تدخل على الموضوع ده:

http://www.nilemotors.net/Nile/341680-a.html


ولو لسه المسألة صعبة فأرجو من حضرتك إنك تصورلنا صفحة مواصفة الزيت في الكتالوج وإن شاء الله نساعدك.


...

المشاركة الأصلية كتبت بواسطة georock

دى صورة المواصفات الموجودة فى الكاتلوج

تمام كده...

بناء على الصورة دي .. مواصفات الزيت المطلوب هي:


اللزوجة:

5w-20 أو 5w-30 ودول هتلاقيهم زيوت تخليقية.

10w-30 أو 15w-40 أو 20w-50 ودول هتلاقيهم زيوت معدنية.


مستوى الأداء:

Api sj على الأقل... يعني يمشي معاك أي زيت عليه sl أو sm أو sn

النقطة دي تحديدا بتفتحلك باب التعامل مع كل الزيوت المخصصة لمواتير البنزين تقريبا.


بناء على المواصفات اللي فوق دي .. قدامك مجال اختيار واسع جدا... والموضوع دلوقتي يعتمد على أولوياتك وأسلوب استخدامك لعربيتك.


معلش... هتقل عليك شوية وهسألك شوية أسئلة تساعدنا نقلل الاختيارات المتاحة ونختار أفضل شيء يناسبك:

يا ريت تقوللنا معدل المسافات اللي بتسوقها يوميا.. وهل بتسوق بطريقة فيها حرق كتير ولا بطريقة هادية.

وكمان .. إيه أولوياتك من ناحية تغيير الزيت؟؟ هل بتدور على حاجة اقتصادية ؟؟ هل توفير البنزين مهم بالنسبالك؟ ناوي تغير العربية ولا عايزها تقعد معاك فترة طويلة؟

لو تقدر بردو تدينا فكرة عن الزيوت المتاحة في قطر بحيث نختار منها بقدر الإمكان.


منتظر ردك.


...

المشاركة الأصلية كتبت بواسطة georock

أولاً قبل أى شئ أحب أشكرك على أهتمامك
ثانياً إجابة الأسئلة
1- معدل المسافة اللى بمشيها يومياً حوالى 75 كم يومياً و بيوصل ل 100 كم فى الخميس والجمعة
2- طريقة سواقتى تقدر تقول متوسطة ياعنى هادية بس لما بتطلب شد مع حد بشد وبحرق
3- أنا عايز حاجة إقتصادية بس ماتجيش على حساب الموتور
4- بالنسبة للزيوت اللى عندنا فى قطر
موبيل أكس أتش بى 20w-50 سعر العبوة 4 لتر= 76 ريال و موبيل 1 صناعة إماراتى مسألتش على سعره
زيت مخصص لعربيبات النيسان إماراتى بينزل منه نوعين الفضى 20w-50 سعر العبوة 4 لتر = 60 ريال والذهبى تقريبا زى موبيل 1 وبرده مسألتش على سعره
زيت شل هايلكس 20w-50 سعر العبوة 4 لتر= 60 ريال
زيوت شركة وقود (شركة البترول الوطنية) زى مصر للبترول عندنا الصورة دى مقارنة بين زيوتها و الزيوت المكافئة ليها

بس أنا جربت الزيت المكافئ للموبيل الأكس أتش بى بس حسيت أن العربية مش مستريحة عليه فأنا قولت يمكن علشان ما عملتش غسيل للموتور من الداخل قبل التغيير و هنا بقى يجى السؤال المهم :-

هو أنا قبل ما أغير نوع الزيت لازم أغسل الموتور من الداخل ولا عادى مش لازم ؟ العملية دى بيسموها عندنا فلاشنج

معلش تعبتك معايا

منتظر ردك

أنا جبت الجدول من على النت

https://www.woqod.com.qa/net/downloa...t%20grades.pdf

نظريا.. المفروض ما تلاقيش فرق ملحوظ بين الزيوت اللي في نفس الصف في الجدول...لإن كلهم ليهم نفس اللزوجة ونفس مستوى الأداء (20w-50 api sl)


وبناء على طريقة سواقتك.. أقدر أقوللك تروح على لزوجة 10w-30 وانت مطمن... والدرجة دي هتديك حماية كافية بالنسبة لاستخدامك وتوفر معاك في البنزين وهتحس بإن العربية فاقت وسحبها اتحسن.

أعتقد الدرجة دي موجودة في السوق عندك من كذا شركة.. وأنا شخصيا شفت منها هنا في السعودية كاسترول ماجنتك بمستوى أداء api sl... يعني المفروض ما يكونش غالي (أتوقع يكون بنفس سعر الموبيل xhp إذا ما كانش أرخص)... وإذا ما كانش موجود.. شوف الزيت بتاع شركة وقود.. مواصفاته مناسبة (api sl).


عموما... لما تيجي تشتري الزيت.. بص على العلبة وشوف مكتوب عليها درجة api كام (ده حقك على فكرة ومحدش يقدر يقوللك حاجة) .. ولازم الدرجة دي تكون مكتوبة على العلبة.. لا يمكن ما تلاقيهاش.

أقل حاجة تحطها هي api sg.. لو لقيتها sl يبقى أحسن... ولو لقيتها sm يبقى أحسن وأحسن...



بالنسبة للفلاشنج... أنا ما انصحش بيه نهائيا إلا في حالات إن الزيت يكون بيطول في الموتور وبدأ يعمل ترسبات طينية.. لإن عملية الفلاشنج بتسبب تآكل للموتور لإن فيها مواد مذيبة ومواد تنظيف معدنية (زي الصنفرة).

عموما... الثبات على نوع واحد من الزيوت أفضل.. بس المهم يكون زي ما الكتالوج قايل.



وابقى طمننا عملت إيه


...

المشاركة الأصلية كتبت بواسطة georock

السلام عليكم

دلوقتى أنا سألت لحد ماوصلت لتوكيل زيت كاسترول فى قطر
المهم رحت له بالعربية علشان أسأله على الكاسترول ماجنيتك اللى أنت قولتلى عليه
لقيت فى نوعين ماجنيتك 5w-30 و نوع 10w-40
قولت له خلاص حاخد 5w-30 الراجل قالى بالنسبة لعربيتك الأفضل أنها تاخد 10w-40
فأنا أجلت التغيير لحد ما أسألك الأول
أنا عربيتى هيونداى جيتز 2007 ليه الراجل قالى أن أحط 10w-40 أفضل رغم أنه أرخص ؟
و أنت أيه رأيك أسمع كلامه ولا أديها 5w-30

منتظر ردك و شكراً لك

بصراحة.. أنا مش ميال أبدا لاستخدام زيت الـ10W-40... لإن اللزوجة دي مش مذكورة في الكتالوج...

مش معنى إن لزوجة الـ10W مذكورة في أحد درجات الزيت (10W-30) ولزوجة الـ40 مذكورة في درجة زيت تانية (15W-40) إننا ينفع نعمل الخليط الجديد بتاع الـ10W-40.

الخلطات دي غير مأمونة العواقب.



عموما ما تقلقش... اشتري الـ5W-30 وانت مطمن.


الراجل اتكلم بناء على الأساطير الغلط اللي ماشية في السوق..

ناس كتير بتقول إن العربية لما تقدم ما ينفعش نحط فيها زيت تخليقي... وماحدش سأل نفسه ليه ما ينفعش.


الموضوع باختصار إن الموتور لما يبقدم بتبقى الجوانات بتاعته نشفت وقابلة للتسريب.. والزيوت التخليقية "الحقيقية" بتشيل الترسبات اللي مغطية الجوانات وتكشفها ... فالموتور يبدأ يسرب زيت.


زيت الكاسترول ماجناتك ماهواش من الزيوت التخليقية الحقيقية... إنما هو من الزيوت المصنوعة بطريقة تخليقية (بيسموه Hydrocracked).. وده مش بيعمل التأثير اللي اتكلمنا عليه.


الموضوعين دول فيهه تفاصيل أكتر..

http://www.nilemotors.net/Nile/477071-100.html
http://www.nilemotors.net/Nile/453047-a.html


ولو كان بيقوللك الكلام ده علشان الجو الحر في قطر... فبرده مفيش مشاكل ما دام اللزوجة دي مكتوبة في الكتالوج...

وأنا شخصيا بستعمل الدرجة دي في عربيتي وتقريبا عايش في نفس ظروف الجو في قطر (انا مقيم في جدة في السعودية).


والحالة الوحيدة اللي تخليك تغير اللزوجة دي هي إنك تلاقي الزيت بينقص.


...