ياريت حد يفيدنى فى موضوع غش العداد دة

**kemo_nagy** · 28-11-2008 11:34 AM

انا سمعت ان العربية لو عداد المسافات بتاعها ارقام بيقدرو يقلبوه و يلعبو فية لكن سمعت ان العربية اللى عدادها ديجيتال ماينفعش يتلعب فيها عشان كدة لما فكرت قلت اجيب حاجة ديجيتال عشان أضمن ان عدادها هو دة اللى ماشيا بيه وجبت لانسر 99 كانت عمله 97 الف كيلو....الملاحظات اللى شفتها على العربية كان فى كام لمبة فى التابلوة مش بتنور و جيت اغيرهم بنفسى لقيت العداد مكتوب على ظهرة رقم كدة بخط الأيد قلت لنفسى اكيد كان فى مشكلة و صاحبها صلحة ولا حاجة وغيرتلها المض كمان فى لمبة البنزين مش بتنور أبدا حتى بعد ماغيرتها مش عارف دة عيب فى العداد نفسة ولا فى العوامة وكمان العربية غيرتلها قواعد موتور و قنطرة و كمان السيور و بعد تغير السيور أكتشفت ان السير القديم مش الأصلى بتاعها و غيرتلها تيل امامى و خلفى و بردو مش طلعو الأصلى بتوعها كمان عندى فى صوت بلية بس مش عايز اعملة عشان قلت هاغير الطقم كلة مع بعضوا أسف على الأطالة.....السؤال هل العداد دة قريتة سليمة او لآ؟....اللى خلانى أفكر فى الموضوع دة من كام يوم كدة سمعت من واحد صاحبى ان فى ورشة فى ..... ربنا لا يباركلهم المهم بتغير العداد الديجيتال ب 100 جنية وتكتبلك اللى انت عاوزة...هل ممكن يكون فى طريقة نعرف بيها العداد دة ملعوب في عداد المسافات بتاعو ولا لآ
ياريت اى حد هايشترى عربية مستعملة مايبصش للعداد نهائى
والف الف شكر ليكو واسف مرة تانية على الأطالة

**EZABY** · 28-11-2008 03:06 PM

بص يابيه
انت لو عندك طياره بوينج هتلاقي في مصر اللي يلعبلك في عدادها برضو
العدادات الديجتال بتنزل زي العدادات البكر وتكلفة الموضوع ده من 100 جنيه لغاية 500 جنيه واكتر كمان لو بتلعب في عداد عربيه غاليه بي ام او مرسيدس مثلا

انا معاك ان محدش يبص عالعداد ابدا وهو بيشتري بس الحاله هي اللي بتحكم
فانا اعتقد ان عربية حضرتك ماشيه اكتر من كده عشان حوار اللمبات الكتيره المحروقه
وعشان تتاكد قارن شده اضاءه نور التابلوه عندك بعربيات تانيه زي عربيتك
لو لقيت النور عندك مش تمام وتحس ان العدادت متربه يبقى فعلا العربيه ماشيه كتير لأن من كتر حركة العربيه العدادات بتضلم.

**shankosi** · 28-11-2008 03:20 PM

العربية اللي استعمالها خفيف بتكون ماشية في السنة من9-10 الاف كيلومتر
الاستعمال المتوسط بتكون ماشية 11-15 الف كيلومتر في السنة
استخدام كثير من 16-20 ألف كيلومتر في السنة او اكثر

شوف موديل السنه واحسب بناء على المعطيات المذكوره اعلاه ثم قارن نتيجتك بقراءة العداد ولو الرقم اللي طلعته قريب من القراءة الفعليه للعداد سيكون سليم ومش ملعوب فيه او الفرق غريب ممكن يكون ملعوب فيه بغض النظر عن ما اذا كان ديجيتال او انالوج

على فكره اللعب في العداد الديجيتال سهل جدا وممكن تحط اي رقم انت عايزه عن طريق جهاز تشخيص الاعطال الالكتروني ودي عمليه تستغرق بضع دقائق فقط ولاتتكلف شيء بس اللي عندهم الجهاز ده بيستغلوا جهل معظم الناس بالأمور دي وياخدوا منهم فلوس كتير وأهو حرامي بيسرق حرامي تاني.

سيبك من العدادات وخليك ذكي واحسب بنفسك......

**amirhamed** · 28-11-2008 03:28 PM

العدادات اغلب الناس بتلعب فيها سواء بالتضبيط او سمعت ان في ناس بتشيل الفيشه بتاعت العداد فميعدش كم وكل واحد وضميره.........؟
المهم في المستعمل اكشف على العربيه كويس حتى لو عامله كيلو

**HeMa_LanCeR** · 28-11-2008 03:31 PM

انا مش فاهم الناس ليه بتاخد بالعداد أصلا انا بضايق من الناس اللي كده
يعني مثلا لو جبتلك عربيه موديل 2000 ومخبطه وهلكانه بس عامله 10000 كيلو كده تبقي زيرو يعني
ولا العكس
العداد مالوش دعوه المهم حاله العربيه وحاله الأساسيات وحاله الموتور دول أهم حاجه
وبالنسبه لقطع الغيار والأستفسارات للكريستاله فا انا عامل قسم خاص ليها ممكن حضرتك تعرض مشكلتك ونحلها مع بعض علشان الكل يستفاد
وبالنسبه للمبه البنزين انا كمان عندي مش بتنور مع انها سليمه وده مش عيب عوامه لأن العوامه لو فيها حاجه مش هتشغل العداد

**shankosi** · 28-11-2008 03:49 PM

المشاركة الأصلية كتبت بواسطة amirhamed

العدادات اغلب الناس بتلعب فيها سواء بالتضبيط او سمعت ان في ناس بتشيل الفيشه بتاعت العداد فميعدش كم وكل واحد وضميره.........؟
المهم في المستعمل اكشف على العربيه كويس حتى لو عامله كيلو

الفيشة بتكون موجرد توصيل للـ Display Screen

يعني حتى لو فصلتها الكبيوتر بتاع العربية بيعد كيلومتر وبمجرد ما توصل الفيشة حتلاقي عدد الكيلومتر المعمول فعلاً وفي بعض العربيات بيكون الفيشه عليها برشام لو اتفك يتكسر ولازم تغير قطعة كبيرة من الضفيرة عشان يرجع تاني فبريكة

الكلام ده مش في كل العربيات بس كان عندي رينو كليو زمان فيها الموضوع بتاع الفيشة اللي مش فارقة في حاجة دي.....

والله أعلم.....

**Dr_Smart** · 28-11-2008 04:23 PM

فعلا الموضوع ده بيحصل

وفيه كمان ناس بيكون استخدامها كتير للعربية وممكن يعمل 60 الف كيلو في اقل من 3 سنين وبكده ضمانها بيخلص ...
يقوم يلعب في العداد عشان تفضل في الضمان طول مدة ال 3 سنين دي