من النهايه ملقتش عنوان غير ده لأن الموضوع تخطى الهواية او الحب انا بمعنى اصح وصلت الفترة الاخيرة لجنون البرفانات بكل انواعه الاوريجنال او التركيبات او معطرات الجو او البخور اى حاجه

بالنسبه للانواع الى بحبها
سيلفر سنت و بلاك اكس اس القديمه و ليكسيز و انفيكتوس و توم فورد بلاك اوركيد و لاكوست اسينشيال و انواع تانيه كتير جدا اغلبهم موالح و حمضيات و مقاييس نجاح البرفان عندى انه يبقى الثبات و الفوحان عالى جدا يعنى يستمر بالايام فى الهدوم و فى نفس الوقت الفوحان جامد مش عايزين نتكلم كتير على الاوريجنال لكن هنتكلم للاسف عن التركيبات نظرا لانها الاكثر استخداما مع اغلب الناس

من حوالى 4 سنين كدة كنت بشترى التركيبات دى من عند محل اسمه سفير فى فتح الله بتاع المندرة و استمر فترة طويله كويس لدرجة ان الناس مكانتش بتقدر تميز بينه و بين الاوريجنال و كان فوحانه مرعب و فى نفس الوقت من اول مابحط البرفان لاول مرة لحد اخر مرة نفس الريحة مبتتغيرش و للاسف بقى خربان حاليا هو نفس حال محل اسمه اريج و هكذا و جربت محلات بالعبط مرة فى محطة الرمل و مرة فى سموحة و مرة فى باكوس و مرة فى المندرة و هكذا كلهم حاليا للاسف مش بحس بالرضا معاهم

فكانت مشاكلى بتتلخص فى حاجتين كل محل ريحة البرفان فيه مختلفه لدرجة انك متعرفش اصلا هو ايه نوع البرفان ده بعد فترة يا اما تحس انه مايا مفيش ريحة فعلا خالص كأنك بترش مايا يا أما الكارثه الاكبر ان ريحته بتبقى قرف و الازازة لما برش منها بحس اننا برش من بكابورت

فكرت فكرة مجنونه
كدة كدة الاوريجنال هنجيبه جاهز

بالنسبه للتركيبات فكرت اننا مسلمش دقنى لحد تانى
انا قررت اننا يبقى عندى الخامات و اعملها انا بس مازال حتى الان كل دة طموحات لسه لم يتم التطبيق او الشراء حتى

اولا : الكحول و ده هيبقى ايثيلى تركيز 95 لان اكتشفت ان اغلب المحلات بتجيب الميثيلى لانه ارخص بكتير و بيسبب امراض جلديه و على سبيل المثال الايثيلى 95 سمعت ان اللتر ب50 جنيه و الميثيلى الجركن العشرين لتر ب55 جنيه فطبعا بيجيبوا الاوفر و فى نفس الوقت بيتفاعل مع الزيت و بيعمل ريحة مختلفه و لحد دلوقتى ببحث عن ايثيلى 95 يكون مش مضروب و مش لاقى

ثانيا : الزيت و ده يعتبر فى الظاهر اهم حاجه لكن كلهم مهمين لان البرفان كله تفاعلات كيميائية يعنى لو فيه حاجه فى النص بايظة هيبقى كله بايظ و افضل زيوت تركيز 2000 بس نادر جدا و برضه معرفش سعرة و لا اعرف بيتباع فين و هل فيه العبوات الصغيره ال100 جرام ولا لأ ؟ ولا كله العبوات المعدن الكيلو ؟

ثالثا : الماء المقطر و ده بيقولوا انه مذيب و ناس كتيرة قالت مالوش لازمه و ناس تانيه بتقول له لازمه بس انا حاسس انه مالوش لزمه نهائيا و العلم عند الله يمكن حد تانى له رأى و ده بيتباع فى الصيدليات الكيس 50 مللى بنص جنيه

رابعا : بنزوات البنزيل و ده مثبت و فى نفس الوقت بيسيح الكحول مع الزيت بحيث ان كله بيبقى علة بعضه و بيقولوا بيتحط نقطه النقطه دى كام سنتى فى السرنجه يعنى ؟ و كمان بيتباع فين ده العلم عند الله و سعره ايه محدش عارف بس حاسس انه مهم لان قبل كدة فى الحقيقه واحد كلمنى عنه

خامسا : زيت خشب الصندل و ده مثبت و كل البرفانات الاوريجنال بتحتوى على صندل فأكيد هو ده و الناس بتقول بيتحط منه نقطتين بس يعنى كام سنتى سرنجه برضه و فى نفس الوقت سعره كام الله اعلم

سادسا : مونو بروبلين جليكول و ده حاجة زى الجلسرين كدة بتخلى البرفان يثبت فى الهدوم لفترة اطول و اخف عشان كدة مش بيبقع و مش عارف ليها لزمه ولا لا و برضه بيقولوا نقطتين


كلامى بقى لعشاق او مجانين البرفانات
ايه رأيكم فى احلى انواع برفانات و سعرها لو الاوريجنال
ايه رأيكم فى الفكرة دى ؟
و الطريقه الى بقولها دى صح ولا فيه صنعه فى الموضوع ؟
و اجيب منين الحاجات دى حتى لو جيبتها من محل برفانات عادى ممكن ينصب فى الخامه او السعر وعلى فكرة انا من اسكندرية

لو عندكم اى اضافات متابعكم