استفسار عن عمر الزيت

**m_hapashy206** · 12-05-2016 01:36 PM

السلام عليكم

ممكن حد يفيدنا بمعلومه عن عمر الزيت في الموتور اقصي مده ممكن يقعدها في الموتور . ده طبعا بالنسبه للعربيات الي مش بتمشي كيلومتر كتير .. بمعني ان لو الزيت الي في العربيه المفروض تمشي عليه 10000... ال 10000 دول ممكن يتعملو في ست شهور سنه اتنين ؟؟ عادي ولا لازم مده معينه اقصي حاجه ويتغير

شكرا

**amr011111** · 12-05-2016 01:40 PM

يفضل تغيره كل سنه حتى لو العربيه مش بتمشى كتير وبالتوفيق

**borio1704** · 12-05-2016 02:22 PM

مواعيد التغيير دايما بتبقى حسب كتالوج العربية.

أغلب كتالوجات العربيات بتقول التالي:

أحوال القيادة العادية : كل 10 آلاف كيلومتر أو 6 أشهر ... أيهما أقرب
أحوال القيادة الشاقة: كل 5 آلاف كيلومتر أو 6 أشهر ... أيهما أقرب

بعض الكتالوجات بتخلي المدة في القيادة الشاقة حوالي 3 شهور
وبعض الكتالوجات مش بتفرق بين أحوال القيادة.

وأحوال القيادة الشاقة (في أغلب كتالوجات السيارات) هي مع تكرار التالي:

* المشاوير القصيرة (أقل من 8 كيلومتر)
* التشغيل على السلانسيه لمدد طويلة
* القيادة في الزحام (توقف/انطلاق)
* القيادة في أجواء حارة (أعلى من 32 °م)
* القيادة في الجو المغبر
* القيادة على الأسطح الرملية والحصوية
* القيادة بسرعات عالية (دوران عالي للمحرك أعلى من 2/3 مدى الدوران المسموح)
* القيادة كسيارة خدمات (تاكسي - دوريات شرطة .. إلخ)

طبعا... كلنا بيعدي علينا حالة من دول على الأقل.

وعموما.. نادرا لما تلاقي ماركة زيت بتوصي بالتغيير عل كيلومترات معينة أو مدد معينة... والوحيدة اللي بتعمل توصيات زي كده في مصر هي زيوت آمسويل.

يعني لو البروشور بتاع الزيت بيوصي بمدة أو مسافة معينة.. ساعتها بس نمشي معاه.

غير كده تمشي على كتالوج عربيتك.

...