الموضوع: صيانة كاملة عند متخصصون الاميرية لانسر بومة 2007

السلام عليكم ورحمة الله وبركاته

الحمد لله ربنا أكرمني واشتريت لانسر بومة 2007 اوتوماتيك 1600 من شهر تقريبا
العربية كمجمل كويسة لكن كان بيها بعض الملاحظات زي تسريب من أولسية الكاتينة وهكذا

وكالعادة لاي مالك سيارة نضيفة ..... قولت اعملها صيانة كاملة في مكان نضيف وفاهم عشان افوقها واخليها تعيش معايا فترة طويلة من غير ماتتهان

أستخرت وسالت وتوكلت علي الله وروحت علي المتخصصون الاميرية يوم الجمعه الصبح بدري
وشهادة حق تتقال في الناس دي .... أنهم حافظين العربيه جدا وفاهمين كل نقطة فيها وعندهم أمانة ونضافة شغلهم ماشفتهاش في مكان تاني

والاستاذ خالد تعب معانا جدا عشان نقدر نظبط كل المشاكل اللي فيها

للأسف بعد الكشف المبدئي طلع العربيه كانت قاطعه سير كاتينه قبل كده ومكسرة وش التقسيمة وحاجات كتير في الجنب بتاع السيور والراجل اللي اشتغل فيها حاطلها قطع غيار مش بتوعها نهائي وشغل كله عك وبهدلة من غير تفاصيل مملة

قولت لاستاذ خالد يعمل الصح فيها عشان معطلشي بيها في اي حتة لاني مجرب العطلة قبل كده
وبدأنا نفك الجزء بتاع السيور بالكامل وغيرنا كل الاجزاء المكسورة واللي مش اصليه زي طمبورة كرنك وطرمبة زيت وقاعدة كاتينة ودي بعض الصور











وتم عمل الاتي :-
صقم كاتينة كامل أصلي
سلوك وأويل سيل بوجيهات
جوان غطا التاكيهات
كحلة زور الشكمان
فلتر هوا (مش أصلي - انا اللي طالبه)
فلتر بنزين (مش أصلي - انا اللي طالبه)
فلتر زيت أصلي
زيت موتور ميجان 5-40 اللي بيقولوا عليه 10000
زيت فتيس ATF SPIII (8 لتر + لتر تنضيف)
مقاس زيت موتور + طبة زيت
طمبورة كرنك + طرمبة زيت + قاعدة كاتينة (أستيراد)
تنضيف بوابة وحساس ايدل
رجلاش لفرامل اليد

النتيجة بعد الصيانة :-
طبعا العربية اختلفت لان كل شئ رجع لاصله والصيانة لسه جديده ومعظم أصوات الخشانة والغربلة اللي في العربية راحت (معظمها مش كلها)

المشاكل بعد الصيانة :-

1- تشغيل العربية صباحا
قبل الصيانة كنت لما ادور العربيه الصبح كان الار بي أم بيكون 1100 وبينزل ل 900 لما العربيه تسخن لكن دلوقتي الار بي أم بقي 2000 وبينزل ل 900 لما تسخن فطبعا صوتها الصبح بيبقي عالي جدا جدا وعاملة زي جرار الحرث

هل ده طبيعي وكيفية علاجة ؟

2- السحب

قبل الصيانة مكنتش بزود بنزين نهائي علي الطرق السريعه كنت بثبت رجلي فقط علي البنزين وتبدأ هيا تسحب واحده واحده بهدوء كامل من اي مشاكل لدرجة انها وصلت لسرعه 120 علي ار بي أم 2500 وده شئ طبيعي لانها فتيس CVT

لكن دلوقتي العربيه بتبقي ثابتة علي سرعه 60 ومستحيل تزيد الا لما اكبس بنزين جامد
فطبعا قلقت وطلعت بيها علي الدائري اللي عند كارفور زهراء المعادي وجبت بيها 150 لكن علي ار بي أم عالي تقريبا 4500

هل ده طبيعي وكيفية علاجة ؟

الخلاصة :-

1- ماتشتريش عربية الا لما تكشف عليها في مركز متخصص او التوكيل وسيبك من شكل العربيه والكماليات اللي فيها حتي لو بترقص عشرة بلدي

2- بلاش تسخسر في عربيتك وتحط قطع غيار مش اصليه لانها عربيتك ولازم تستمتع بيها وبلاش تتأخر في الصيانة وتقول ماهي ماشية ..... انت اللي بتعطل في الاخر وبتتبهدل

3- أفضل عربيات في السوق المستعمل هيا الباباني فقط (لانسر وتويوتا) بعد تجربتين معاهم
عربيات حمالة قاسية ومناسبة جدا لشغل وبهدلة المصريين

# شكر خاص للأسطي عمرو اللي تعب معايا جدا
# اللي عايز يسأل عن أسعار أو اي شئ انا في الخدمة

موضوع لفات الموتور .... ممكن يتظبط بعد كام يوم لوحده ان شاء الله ... و لو متظبطش .. مش مشكلة خالص
موضوع السحب معنديش معلومات عنه .. و فى انتظار مشاركات اخرى

طب دلوقتي بقي في رعشه ورجة جامده علي ال p و ال n
كانت بسيطة في الاول لما جيت من الصيانة لكن دلوقتي بقت بترج العربيه كلها

اخبار قواعد الموتور ايه ؟

مغير قاعدة موتور اللي تحت قربة زيت الباور في الصيانة ولو كانت المشكله في القواعد كانت ظهرت في كل الغيارات مش ال p و ال n فقط

لما تظهر رجة فى العربية ... و خاصة على السلانسيه .. اول حاجة تبص عليها هى قواعد الموتور ...
ايه اخبار بقية القواعد ؟؟؟

على ما اتذكر ... القاعدة الى حضرتك غيرتها دى بيسموها قاعدة الكاتينة ... مش كدة ؟؟ حضرتك جبتها اصلى و لا تقليد ؟

احيانا قليلة ... بيكون العيب ده من الفتيس نفسه ... بس ده اخر حاجة نبص عليها

المشاركة الأصلية كتبت بواسطة ahmed_eng2001

لما تظهر رجة فى العربية ... و خاصة على السلانسيه .. اول حاجة تبص عليها هى قواعد الموتور ...
ايه اخبار بقية القواعد ؟؟؟

على ما اتذكر ... القاعدة الى حضرتك غيرتها دى بيسموها قاعدة الكاتينة ... مش كدة ؟؟ حضرتك جبتها اصلى و لا تقليد ؟

احيانا قليلة ... بيكون العيب ده من الفتيس نفسه ... بس ده اخر حاجة نبص عليها

انا قريت الفاتورة تاني وفعلا اسمها قاعدة كاتينة مش موتور واستبدلت باستيراد أصلي مش جديده لان القديمة كانت مقطوعه خالص زي ماموضح بالصور فوق
والرجة مش بتيجي علي السلانسية لكن بتيجي علي ال N و ال P يعني والعربيه واقفه مش ماشية

المشاركة الأصلية كتبت بواسطة nodey

كل اللي حضرتك قولت عليه ممكن يتم فعلا نتيجه لاعمال الصيانه
جرب تعمل ايديل ليرن وتنظف البوابه والحساسات
الرجه في التفتيس ناتجه من نوعيه الزيت وكان لابد من تنظيف الفالف بودي بتاع الفتيس قبل تغيير الزيت
الارم ام هيظبط بعد ما تعمل ابدب ليرن وتنظف البوابه والحساسات
غير فتر هوا وبنزين بواجي وسلوك بواجي
واي استفسار انا تحت امرك

* قبل ماروح الصيانة كان عندي برجله في الار بي ام وصلحتها بنفسي عن طريق الايدل ليرن
لكن مفكرتش اعملها تاني لما جيت من الصيانة لاني قولت اكيد هما عملوها

* تم تنضيف البوابة والحساسات بما فيهم حساس الايدل بمنظف كاربراتير قدام عيني وبقيت العبوة معايا والبواية كانت مطلعه طين وسواد فظيع

* بخصوص زيت الفتس هما حطوا زيت الفتيس بتاع التوكيل 8 لتر + لتر تضيف عن طريق الكبس عشان يطلع كل السواد والرايش من الفتيس ودي الطريقه علي اليوتيوب

https://www.youtube.com/watch?v=MsdPAadc9fY

* فلتر الهوا والبنزين والبواجي والسبوك كلها تم تغيرها في الصيانة كما ذكرت فوق

* صوت العربيه العالي بيكون في فترة الصبح فقط وقت التسخين يعني في أول 10 دقايق فقط وده معناه ان زيت الموتور اللي هما بيستخدموه سئ جدا جدا لاني لما استخدمت كاسترول ماجناتيك في التويوتا كان متفوق جدا في النقطة دي (نعومة الدوارة صباحا)

*** متشكر جدا ياشباب علي سعة صدركم لمشكلتي

كل اللي حضرتك قولت عليه ممكن يتم فعلا نتيجه لاعمال الصيانه
جرب تعمل ايديل ليرن وتنظف البوابه والحساسات
الرجه في التفتيس ناتجه من نوعيه الزيت وكان لابد من تنظيف الفالف بودي بتاع الفتيس قبل تغيير الزيت
الارم ام هيظبط بعد ما تعمل ابدب ليرن وتنظف البوابه والحساسات
غير فتر هوا وبنزين بواجي وسلوك بواجي
واي استفسار انا تحت امرك

مبروك ع الصيانة
مقلتش الاسعار بتاعت الحاجه اللي ركبت
واسعار المصنعيه

معذرة علي التاخير في الرد اتفضل