المشاركة الأصلية كتبت بواسطة mafoshams
أنا لسه مشتري فيرنا موديل 2004 أوتوماتيك ب 63000 ألف .. على أد اللي معايا و قبل ما أشتريها كنت بأستغبى (آسف) أي حد يشتري فيرنا عشان لما كنت باركبها تاكسي كنت بالاحظ جداً إن العربية ضيقة .. ده لما ركبتها تاكسي
لما إشتريتها أقدر أقوللك رأيي
مع إني ماركببتهاش أكتر من 20 يوم:
العربية ضيقة بجد .. الكرسي رخم و مهما إتظبط غير مريح بالمرة ... العربية شكلها كده رخيص و خصوصاً من جوه ... تحسها كده عربية هفأ من أقل خبطة ولا حكة هاتتبهدل ... مفهاش أي أوبشن مقارنة بالعربيات الصغيرة التانية يعني مثلا لو مشيت و فرامل اليد مرفوعة مفيش أي تنبيه الحزام نفس الكلام و زي ما أ. محمد دسوقي قال مفيش إيرباج واحد .. التكييف حلو لكن صعب تظبطه بالشكل المطلوب.
هاركز شوية على موضوع الضيق و هاتكلم عن اللي أنا باعاني منه بشكل شخصي:
- وضع السواقة رخم و الجزء بتاع التابلوه اللي حوالين الرجل بيرشأ في الرجل فتلاقي بعد نص ساعة سواقة الحتة بتاعة الركبة بتشتكي و طبعاً باطلع الكرسي أدام عشان اللي ورا ما يدعيش عليا
.
- المكان اللي في الكونسول تحت بكر التكييف صغير فيادوبك تحط الموبايل .. لو بتشرب سجاير هايحصل تزاحم :-) بين السجاير و الموبايل و كده و بالتالي لو هاتستعمل باور بانك أو راوتر مثلا تشوفله مكان تاني أو معاك حد عايز يسيب موبايله يبقي يرميه في الباب أكرمله أو معاك ورق مش هاتعرف تحطه في حتة.
- مراتي بتقعد جنبي و الأطفال ورا .. مفيش أي براح لشنطتها أو لشنطة اللاب بتاعي مثلاً.
يا سلامم لو هايركب معاك 3 و يا سلام بقي لو منهم واحدة معاها شنطة
- طبعاً مستحيل أرمي أي حاجة في الشارع و مفيش مكان في العربية أشتري أي حاجة يترمي فيها الزبالة فباضطر استعمل كيس يترمي فيه تلات أربع كياس شيبسي (بجد) المنطقة اللي أدام كلها بتتزحم أو لو فيه كيس أو شنطة ورا مع الأطفال مش بيعرفوا يعملوا حاجة ورا.
- كنت مسافر و معايا 4 .. جبنا عصاير و حاجات خفيفة .. بجد العربية إتزحمت جداً من الأزايز و الأكياس.
طبعاً حكاية الثبات مش محتاجة كلام مع إني كان فيه رجة في العربية و زودت السرعة عشان أشوف الرجة اتختفي إمتا وصلت ل 180 و عادي جداً ممكن عشان فيها جنوط 15 عريضة
أما موضوع إنفي و الكلام الصيني ده لا أنصح بيه سيبك من العربيات دي و هي في المعرض .. معانا في الشغل كان واحد معاه عربية من دي .. تلاقي زرارين تلاتة مخلوعين من مكانهم و طبعاً مستحيل يلاقي زيهم فبالتالي بيفضلوا على وضعهم و باقي الزراير الفاضلة تلاقي تلات ترباعهم ممسوح و شكلهم مقزز أما الأصوات اللى طالعة من التابلوه و الأبواب فحدث ولا حرج.
الراي الأخير: الفيرنا حرام يتدفع فيها فلوس كتير و الصيني حرام أكتر .. بأكتر من 100 ألف تشتري لانسر أو أوبترا ولا حتي صني موديل كام سنة فاتت و تكون حالتها عظيمة.
صحيح: ما ننكرش إن الفرنا قطع غيارها موجودة ببساطة و أي حد يشتغل فيها.
بالتوفيق
المفضلات