السلام عليكم

انا بتعلم جديد من شهر تقريباً بطلع مرتين كل اسبوع مع اخويا..

المهم انا اتعودت على اسلوبه .. وهو اني امور الاول قبل المطب واهدي واحدة واحدة .. لحد ما اطلع على المطب واخد العيار المناسب ..

بس مشكلتي اني بخاف العربية تقف مني على مطلب منحدر او عريض لإنها هتريح على الخلف .. ووقفت مني 3 مرات نتيجة الارتباك مع الدبرياج .. والحاجة التانية اني مش ببقى عارف حساسية السرعه المناسبه للمطب .. فممكن اهدي خالص لحد ما تقف وارتبك.. وبالتالي تعطل مني وتريح عالخلف..

ايه الحل في النقطة دي .. انا عارف ان عمري ما هوصل لها وانا مبتدئ خصوصاً ان كل مطب بيكون له سرعه مختلفة حالة .. ده غير ان في مطبات عامله زي مطبات الزمن...

ده استفساري الاول ... هل في نصائح بالنسبة لهذا الامر وهل لو مورت وهديت قبل المطب واخدت غيار مثلاً الاول او الثاني يبقى افضل ولا لازم اطلع المطب الاول وانا ممور وقبل ما انزل اغير؟

استفساري الثاني: المشكلة اني لما بمسك الدريكسيون وعصاية الفتيس في نفس الوقت العربية بتلعب مني خصوصاً في الملفات والنيو ترن... ايه الحل معاها؟ لما باخد غيار مثلاً وانا بلف بلاقي اعصابي مسكت في الدريكسيون وحدفتها يمين شوية.. .. عملت ده وانا اعلى كوبري

ايه الحل مع المشكلة دي..

الاستفسار الثالث: اني مش عارف ابعاد العربية رغم انها ابعادها صغيره بس مش عارفها كويس..
نظرتي بتكون فين علشان تقدر ابعاد العربية؟

وفي نقطة اني مش بقدر اتحكم في الدريكسيون كويس لو ماسك الدريكسيون عادي وماشي على الثالث بلاقي العربية بردوا تيجي يمين سنة او شمال سنة .. فازاي اتحكم فيها على سرعه عاليه..
مسكتي للدركسيون 9 وربع بتوقيت مصر .. ازاي اخليها مستقيمة ايه هو المعيار او المحدد للوصول للنقطة دي..

الاستفسار الاخير: والي تقريباً اصعب استفسار عندي او مشكلة وعائق كبير عندي.. وهو ان السيارة بتخليك تشغل كل حواسك في وقت واحد وانا معنديش سرعة بديهة كل حواسي ساكنة من زمن .. المشكلة الاكبر اني معنديش ذاكرة معالم وطرق لا مطبات ولا شوارع ولا اي حاجة رغم ان مدينتي صغيره لكن مش عارف فيها حاجة للاسف حتى لو عديت من الشارع 100 مرة مش هحفظ مكان المطب او ودي مشكلة فيا نتيجة عدم خروجي كتير والانعزال مع البلو فيري..

فهل كان في حد زيي كده ومشت معاه كويس ولا هعاني بردوا وهل الحواس دي كلها هتشتغل ولا هتفضل نايمة كده..
انا لو بشرب مخدرات من اول يوم اتولدت فيه كنت هبقى فايق اكثر من كده

الله المستعان