مشكلة في سيات قرطبة ٢٠٠١

**mahaba** · 27-05-2016 03:06 PM

السلام عليكم ....
ازيكم..
سؤال بس لو سمحت انا معايا عربية سيات كوردوبا ٢٠٠١ موتور ١٠٠٠ سي سي 16 valve عاملة ٢١٢٠٠٠ عداد
لسه جايبها من شهرين، تم عمل صيانة من تغير السيور والبلي وطلمبة المية والبوابة والدينامو لظهور اعطال
وانا في العربيات ابيض شوية
المهم المشكلة عندي انا في رشح في الزيت بتاع الموتور بغباااء ...
لدرجة انا غيرت زيت ٣مرات في شهرين قبل ما يمر على كل واحد الف كيلو على الاقل ... لانه ينقص
جامد ..
المهم رحت لكذا ميكانيكي اللي قالي دة اولسيه كرنك امامي وغيرته مع تغير السيور في البداية
واللي قالى كارتية الزيت هقرط عليها كانت مفكوكة واللي دة الفلتر كان مفكوك
واخرهم امبارح رد صدمني وهو واحد من ضمن اللي فوق دول
قالي انت مكنتك خفيفة وعاوز شورت بلوك وكلام كدة ان الزيت مش عارف بينزل الكارتيرة مفهمتش والمفروض اني هوديله العربية انهاردة علشان يبتدي يشتغل في الشورت بلوك
...........................
رايك في الكلام دة اية
وياريت لو تعرف واحد متخصص اروحله يكون بيشتغل في العربية دي يحدد المشكلة فين وهل فعلا الموتور خفيف مع اني شايفه غير كدة
اسف للاطالة واتمنى الرد سريعا

**tasaka** · 29-05-2016 07:39 AM

قيس كبس الموتور فى اى مكان او بنزينه قبل ما تصرف كتير

و بعدين الموتور الخفيف اكيد سيظهر اثره فى الشكمان

و بعدين اكثر من ميكانيكى شافها و اللى قال اويلسيل و اللى قال تربيط كرتيره .. هل ما بصوش على الموتور و وجدوه خفيف ؟؟

**م أحمد** · 31-05-2016 03:45 PM

المشكلة حاجة من اتنين :
ترشيح زيت و دا له اعراضه او مكنة خفيفة و دى لها اعراضها

لو ترشيح زيت هتلاقى العربية بعد ما تركن فى آثار زيت تحتها و هتلاقى برضه آثار زيت على جسم الموتور
الحل : هتشوف اعلى نقطة فى جسم الموتور بيرشح منها الزيت و تكشف على الجوانات فيما تحت هذا الترشيح
ممكن غطا زيت بايظ او جوان وش التاكيهات بيسرب او جوان كارتيرة الزيت بيسرب او اولسيل الكرنك بيسرب او فلتر الزيت مش مربوط كويس او خرم فى كارتيرة الزيت

لو مكنة خفيفة هتلاقى دخنة زرقاء بتطلع من شكمان العربية بعد ما تسخن و خاصة لحظة التبديل بين الغيارات او لو كبست بنزين و انت واقف على السلانسيه او من خرطوم الفايظ هتلاقى دخنة طالعة منه و سببه الحريق بيدخل على الزيت و يسخنه جدا لدرجة التبخر و كمان بيختلط و يخرج مع العادم
الحل : طقم شنبر او عمرة كاملة و دى اللى بيحددها الميكانيكى لما بيفك الموتور

ولما تروح للميكانيكى ما تحددلوش انت سبب العطل سيبه هو اللى يحدد لانك بتشيل المسئولية لما بتحدد انت العطل