فكـــر المواطـــن البريــطانى عند الغــلاء

**m_elsabah** · 29-11-2008 03:38 PM

في بريطانيا في تسعينات القرن الماضي حدث تصادم بين سفينة نقل بحري وبين سفينة أخري أو بين السفينة ررصيف الميناء ( لست متذكرا بالظبط ) وكانت هذه السفينه محملة بالبترول ونتيجة لإمتلاء البحر المتوسط بالبترول ماتت كميات كبيرة من الأسماك مما أدى إلي زيادة أسعار الأسماك ولم يعترض المواطن البريطاني علي ذلك لإنه يعلم السبب. ولكن مع الوقت وشيئآ فشيئآ أخذت الأسعر في الإرتفاع مرة بعد الأخري . فأحس المواطن أن هناك من يسرقه فإمتنع المواطنون عن شراء الأسماك لفترة فعاد السعر إلي طبيعتة ( في ظل وجود كميات من البترول في البحر ) ولكن المواطنون رفضو الشراء لفترة أخرى . ثم إنخفض السعر إلي معدله العادي وكأن حادث الإصطدام لم يحدث ولكن المواطنون رفضو الشراء ( للمرة الثالثة ) . ثم إنخفض السعر أكثر وأكثر ليصبح السعر أقل من معدله الطبيعي والعادي ولكن المواطنون رفضوا الشراء أيضآ ( للمرة الرابعة ) وأكرر ( للمرة الرابعة ) إلي أن فسدت الأسماك عند التجار وتحمل التجار مصاريف إزالتها بصفتها قد أصبحت الآن ( زبالة ) وعندما سئل المواطنون في بريطانيا عن رفضهم للشراء بالرغم من عودة السعر إلي معدله الطبيعي وأكثر بكثير فكان رد أغلب المواطنون كالتالي .

لكي يصبح تجار الأسماك ( عبره ) لأي تاجر آخر في أي سلعة أخرى يفكر أن ( يسرقني أو يستغلني ) .
سؤال ؟ هل من الممكن أن يصل الشعب المصري لهذه الدرجة من النضج والوعي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟

**حاتم سليم** · 29-11-2008 03:56 PM

بعد الشر علينا من النضج و الوعى ...

**mixd99999** · 29-11-2008 07:35 PM

والله ده الممفضروض اللي نتفق عليه ونعمله
لكن احنا تفكيرنا اقل من كده بكتيير

**beautiful0mind** · 29-11-2008 09:05 PM

المشاركة الأصلية كتبت بواسطة mohamed_elsabah1977

سؤال ؟ هل من الممكن أن يصل الشعب المصري لهذه الدرجة من النضج والوعي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟

والله انا بعمل كدة ووصلت ان صاحب المحل قالى ابقى قبلى( لو أنت مشترتش غيرررررررررررررك كتير هيشترى مش هتقف عليك) .........وللأسف السعر بيذيد أكتر وأكتر ....

احنا بقينا بنسرق فى بعضنا عشان نعرف نعيش .....والسرقة دلوقتى وجشع الناس بقيت جريمة مشروعة

**mxz911** · 30-11-2008 03:25 PM

والله تفكيرهم نظيف ونفسى نوصل للمستوى الفكر بتاعهم ..

ده احنا أمه سيدنا محمد اللى اتذكرت فى القران .. المفروض نكون احسن منهم فى التفكير والتعامل بين الناس

والله لو وقفنا ايد واحده هنعلمهم الادب ولكن ازى هنقف ايد واحده بس اما كل واحد بيقول يلا نفسى !!!!

**ahm3d ham>ed** · 30-11-2008 03:32 PM

ههههههههههههههههههه
دا الللى اقدر اقوله

**waled369** · 30-11-2008 03:49 PM

و الله يا شباب ما أنا عارف أقول ايه .
أنا عايش بالكويت ( خدوا بالكم الكويت ) من حوالي 14 سنة و بانزل أجازات كل سنة أو أقل أو أكثر و فاكر مرة فضلت فترة حوالي 3 سنوات منزلتش مصر ( شاب بقى لا زوجة و لا عيال و لا وجع دماغ ) المهم قلت آخد أجازة و أريح ( الجتة ) شوية . طبعا نزلت و كالعادة ( لا شغلة و لا مشغلة ) كان معايا ابن أختي عمر ( حوالي 5 سنوات ) و أثناء مشينا طلب أني أجيب له فاكهة و دار الحوار التالي :-
عمر : خالو .
أنا : نعم .
عمر : جيب تفاح و موز و كيوي .
أنا : حاضر .
رحت عند أول فكهاني .
أنا : السلام عليكم .
الفكهاني : و عليكم السلام و رحمة الله و بركاته . أؤمر يا باشا طلباتك .
أنا : عايز 4 صباع موز + تفاحتين + 2 كيوي .
الفكهاني ( باستغراب ). نعم يا أستاذ بتقول ايه ؟
أنا . كررت له الطلب .
الفكهاني ( باشمئزاز ) . ايه يا أستاذ اللي بتقوله ده ( مابنبعش ) هنا فرط .
أنا . فرط ايه يا حج هوه أنا قلت سجاير أنا عايز فاكهة .
الفكهاني . يا فتاح يا عليم يا رزاق يا كريم يا أستاذ هنا تشتري بالكيلو مش بالواحدة .
أنا . ( طبعا و الله كنت نسيت موضوع الكيلو لأننا هنا بالكويت ممكن تشتري صباع موز واحد بس انته حر ) أيوة ياحاج ما أنا قصدي 4 كيلو موز و 2 كيلو تفاح و 2 كيلو كيوي بس الظاهر حضرتك مخدتش بالك م اللي قلته ( طبعا اضطريت أكذب لأن منظري كان زبالة جدا ).
الفكهاني : حاضر يا باشا تحت أمرك .

دي قصة واقعية حصلت معايا و كان لازم اتصرف كده لأن شكلي مكانش حلو أبدا . فضلت أفكر طيب لما أكون عايش لوحدى و عايز آكل تفاحة مثلا يعني لازم أشتري كيلو علشان ميبقاش شكلي وحش مثلا . طيب و لو حصل يعني أرمي الباقي أو أخليه في التلاجة لما يضرب و لا ايه .
احنا محتاجين تغيير ثقافة شامل في موضوع الأكل ده فيها ايه لو الشعب كله قاطع اللحمة اسبوع . ما هو احنا بنضحك على دول الخليج و نقول عليهم متخلفين بالرغم انك هنا تقدر تشتري قطعة لحمة أو سمكة مثلا دون التقيد تآخد كيلو أو طن انته حر و محدش هنا بيبص عليك كأنك ارتكبت ذنب .

**عبدالحميد** · 30-11-2008 03:58 PM

هل المشكلة فى إن إحنا نتحد و نعمل حاجة زى كده تكون فى الجينات ولا التربية ولا التعليم ولا طريقة معاملة الحكومة لينا ولا طريقة معملاتنا مع بعض ولا قلة وعى ولا ضعف إرادة ولا فقر ولا طيبة ولا أنانية ولا إحباط من تجارب سابقة ولا جهل بالعمل الجماعى ولا إيـــــــــــه بالضبط ؟؟؟؟

ممكن تكون بعض أو كل الحاجات دى و ممكن تكون أسباب أخرى

راجع الموضوع ده
فــكرة لخفيض أسـعار السيارات الزيــرو
http://www.nilemotors.net/Nile/showthread.php?t=47474
و شوف الردود واتعلم ......اتعــــــــــــــــلم :k49:

**mokhtar** · 30-11-2008 04:08 PM

المشاركة الأصلية كتبت بواسطة حاتم سليم

بعد الشر علينا من النضج و الوعى ...

+10000000000000000

..mokhtar..

**aif** · 30-11-2008 04:24 PM

يا ريت يبقى عندنا الوعي ده
انا لي ملاحظتين
1 - احنا في مصر ما عندناش اختيارات .... جميع السلع الاساسية كمية المعروض منها .... اقل من الطلب بكتير ... في 90% من السلع ....
عشان كدة صعب جدا اننا نتحكم في السوق كمستهلكين ... لو انت ما اشتريتش .... السلعة ح تتباع لوحدها ... لأنها اقل من المطلوب بكتير .....
ده طبعا بالاضافة لإستحالة اتفاق الناس علي امر واحد مهما كان بسيط او سهل ... دي طبيعتنا للأسف .....
2 - انا شايف ان القصة جميلة جدا ومعبرة ..... لكن أعتقد انها مبالغ فيها ....
القصة بتتكلم عن المستهلكين اللي هما ملايين كأنهم واحد قاعد يشرب شاي ويقرر ... واللي يقرره يبقى في حكم الي حصل فعلا ..... هما مش ملائكة ....
انا معاك انهم ممكن يقاطعو سلعة عشان ارتفاع غير مبرر .... لكن انهم يفضلوا مقاطعينها حتى بعد ما ترخص عشان الباقي ياخد عبره ..... دي انا بصراحة مش مقتنع بيها خالص
ده كدة مش ناقص غير انهم ينزلو ياخدو التجار قلمين من باب الأدب
انا مش بأقصد صاحب الموضوع طبعا .... انا بأقصد اللي نشر القصة اساسا