مشكلة بالفيتس

**haithamaly** · 11-06-2016 02:10 PM

السلام عليكم و رحمة الله و بركاته

بسمع صوت الصبح لما بسخن العربية صوت بلية بدأت تبوظ و لما بدوس دبرياج يروح الصوت روحت اليوم لميكانيكي قلي دي بلية درك في الدبرياج و لابد من
تفوير الدبرياج و تركيب جديد و قالي موديلك لا يركب علية الاكسنت القديم ولا الفيرنا ممكن يركب دبرياج اوروبي
و الافضل الاصلي بتاعه اكسنت 2006 فما اقتراحاتكم و تكلفت الدبرياج كام تقريبا و لو قلبت اتوماتك يكون افضل
بالمرة مع العلم حالة ميكانيكا العربية ولله الحمد كويسة

**zastaffa** · 12-06-2016 10:39 AM

طب اسمعني كويس يامعلم عشان دي غلطة بيقع فيها غالبية ميكانيكية مصر الله أعلم عشان يدخلوا الزبون في حوار دبرياج ومصنعية وفي الأخر لما يطلع عيب بلية فتيس يدخلك في مصنعية فكه وتنزيله وبعته لبتاع الفتيسات وطبعاً حوار جديد بتكلفة جديدة
عموماً ياكبير طالما الصوت بيروح لما تدوس دبرياج تبقي بلية داخلية جوا الفتيس ومش شرط تكون بلية عمود الدريك علي فكرة ممكن اي بلية تانيه من بلي الفتيس لأنك ببساطة لما بتدوس دبرياج وانت مدور العربية بتبقي عملت عملية فصل الفتيس عن الماتور وبالتالي وقفت حركة الفتيس اللي كان بيتحرك بحركة الماتور وعشان كدا الصوت راح لأن الفتيس وقف والماتور هو اللي بيتحرك لوحده
عامة دلوقتي حاول تتعايش مع الصوت ده موقتاً وفيه حاجتين مهمين أووووووعي تعملهم
الحاجه الأولانية أنك تفكر تغير الزيت بزيت تاني أكتر لزوجة علي أمل أن الصوت يمنع لأنه مش هايمنع
الحاجه التانية وعن تجربه أوعي تغير الزيت والعربية سخنه لأنك كدا تبقي عجلت بنهايه الفتيس لأن بلي الفتيس لما بيتعرض للهوا البارد وأختلاف درجة الحرارة مره واحده بيتدمر وصدقني عن تجربه في عربية أمجراند 2014

**ahmed_eng2001** · 12-06-2016 02:21 PM

على حسب علمى ....
بلية الدرك بتكون موجودة فى الفتيس ... مش ف الدبرياج ... فيه بلية تانية فى الدبرياج اسمها بلية الدبرياج ....

و الاعراض الى حضرتك بتقولها .... الى حد كبير بلية درك ... بس مش اكيد ... لانه من الممكن تكون اى بلية تانية فى الفتيس زى ما قال الاستاذ zastaffa ....

الحل النهائى ... فك الفتيس و توديه لحد بتاع فتيسات يفكه و يشوف ايه المشكلة

و يالمرة .... الميكانيكى حيشوف ايه اخبار طقم الدبرياج ... و ان كنت انصح حضرتك بتغييره بالمرة طالما الفتيس اتفك
متابعين معاك

**ahmed_eng2001** · 12-06-2016 02:36 PM

المشاركة الأصلية كتبت بواسطة zastaffa

طب اسمعني كويس يامعلم عشان دي غلطة بيقع فيها غالبية ميكانيكية مصر الله أعلم عشان يدخلوا الزبون في حوار دبرياج ومصنعية وفي الأخر لما يطلع عيب بلية فتيس يدخلك في مصنعية فكه وتنزيله وبعته لبتاع الفتيسات وطبعاً حوار جديد بتكلفة جديدة
عموماً ياكبير طالما الصوت بيروح لما تدوس دبرياج تبقي بلية داخلية جوا الفتيس ومش شرط تكون بلية عمود الدريك علي فكرة ممكن اي بلية تانيه من بلي الفتيس لأنك ببساطة لما بتدوس دبرياج وانت مدور العربية بتبقي عملت عملية فصل الفتيس عن الماتور وبالتالي وقفت حركة الفتيس اللي كان بيتحرك بحركة الماتور وعشان كدا الصوت راح لأن الفتيس وقف والماتور هو اللي بيتحرك لوحده
عامة دلوقتي حاول تتعايش مع الصوت ده موقتاً وفيه حاجتين مهمين أووووووعي تعملهم
الحاجه الأولانية أنك تفكر تغير الزيت بزيت تاني أكتر لزوجة علي أمل أن الصوت يمنع لأنه مش هايمنع
الحاجه التانية وعن تجربه أوعي تغير الزيت والعربية سخنه لأنك كدا تبقي عجلت بنهايه الفتيس لأن بلي الفتيس لما بيتعرض للهوا البارد وأختلاف درجة الحرارة مره واحده بيتدمر وصدقني عن تجربه في عربية أمجراند 2014

شرح حضرتك لفصل الحركة بالفتيس جيدة جدا و بسيطة ... و بالطبع ... تغيير زيت الفتيس لاخر لزوجته اكبر بيعمل خفض مؤقت لصوت الفتيس .... بس مش حل دائم

موضوع عدم تغيير زيت الفتيس و العربية سخنة ..... انا مش مقتنع بيه ... فى اغلب الاحوال يتم تغيير زيت الفتيس و الموتور عند مركز خدمة او فى محطة بنزين ... و ده معناه ان العربية بتكون سخنة ... و محصلش مشاكل فى الفتيس او الموتور من سنين طويلة

موضوع الصنايعية .... زى ما ذكرت ... الحل ان العضو يفك الفتيس ... و يوديه لحد بتاع فتايس ... و الميكانيكى يشوف اخبار طقم الدبرياج ايه بالمرة ... و تكون الفكة مرة واحدة فقط ان شاء الله