العربية بتسقف في المطالع الطويلة (طريق اسكندرية الصحراوي)

**كرم الحمصي** · 16-06-2016 05:21 AM

السلام عليكم
وكل عام وانتم بخير
رمضان كريم

بعد ما اتباعت العربية رجعت تاني عشان الشاري سمع كلام مش ولابد على نوع العربية قال سعادته (ما تخدهاش ولو ببلاش) بالمناسبة دا بالتليفون من غير ما يشوف العربية.

العربية داتشا نوفا97 وعليها مكنه رينو 9 كامله

الموضوع:
العربية بتسقف في المطالع الطويلة (طريق اسكندرية الصحراوي) وبتروح التسقيفة لو خفين رجليه عن البنزين بس السرعة بتنزل جامد . يعني كنت على 120 تقريبا نزلت لـ 70 او 80 .
ولو فضلت ضاغط على العربية تسخن جداً.

ارجو الافادة من الاعضاء وخاصة م/ حازم لأني عارف انه خبير في العربية دي.

**svneleven** · 16-06-2016 06:53 AM

عامة الحركة ديه اي عربية بتعملها لو البنزين مش نضيف او مثلا بتحتاج 92 و حضرتك مفول 80 و العربيات ال كاربراتير كانت بتعمل كده لو مقدمة كهربا.

**tasaka** · 16-06-2016 07:18 AM

الرينو 9 دى كانت عربيه حلوه فى زمانها

تلاقى الشارى حط بنزين 80 .. و لو هى بتستعمل 80 من قبل كده .. شوف التقديم و التأخير فى الكهربا

**Colin Chapman** · 16-06-2016 11:06 PM

المشاركة الأصلية كتبت بواسطة tasaka

الرينو 9 دى كانت عربيه حلوه فى زمانها

تلاقى الشارى حط بنزين 80 .. و لو هى بتستعمل 80 من قبل كده .. شوف التقديم و التأخير فى الكهربا

**mohsen128** · 26-06-2016 06:15 PM

وعليكم السلام ،، موضوع التسقيف ده ظبط كهرباء ذي ما الاخوه قالو بس موضوع السخونه مع القرص ده كان قديم ولا ظهر جديد بعد ما رجعت العربية ،، كان حصل قبل كده مع احد الاعضاء واتحل بتغيير الرداتير .

**كرم الحمصي** · 28-06-2016 10:34 PM

طبعاً شكرا للدتشاوية الكرام على الردود

انا فعلا غيرت الريدياتير بردياتير جديد بتاع الاسكودا فيليشيا مع تعديل بسيط جداً في خرطوم الراجع للقربة (الكلام دا من ساعة ما العربية رجعت).
التسقيف بيحصل لما تكون في مطلع كوبري وانا على التالت او الرابع مثلا وسرعة العربية تقل واضطر اغير وانزل للغيار التاني لحد ناهية المطلع وإلا أمبير الحرارة يبرق بعينه ويروح للأحمر.
السؤال - هي لو المشكله ديسك واسطوانه يحصل تسقيف والا صوت العربية يزيد بس مفيش سحب.
- طيب موضوع الكهرباء لو في تقديم او تأخير . العربية تسقف في المطالع مع سخونه والا ملهاش دعوه بالسخونه.

انا احترت والله يا دتشاوية

**mohsen128** · 29-06-2016 12:20 PM

اعتقد لو ديسك واسطوانه الصوت فعلا هيعلي ومش هيكون في سحب انما موضوع الكهرباء والتسقيف مع السخونه ده هسئلك الميكانيكي وارجعلك او لو استاذ حازم شاف الموضوع ممكن يفيدنا فيه .

**mohsen128** · 11-07-2016 12:19 PM

كرم ،، عملت ايه في موضوع السخنيه مع السرعات العالية ... لو لسه موصلتش لحل ياريت تراجع الموضوع ده
http://www.nilemotors.net/Nile/472345-a-2.html ،، متابع معاك وعلى وعدي هكلم الميكانيكي بس يرجع من اجازة العيد .

**كرم الحمصي** · 09-08-2016 04:25 AM

تسلم محسن
مشكلة التسقيف طلعت بنزين.
جربت العربية بعد العيد . كنت رايح اسكندرية وفكيت الكيس وفولت العربية بنزين ٩٢ وعينك متشوف الا النور راح التسئيف وراحت السخونية والدنيا بقت تمام.
بس انا عاوز اظبطها على ال ٨٠ .

**mohsen128** · 10-08-2016 11:50 AM

طيب الحمد لله وحمد لله على سلامتك وان شاء الله تظبطها على 80 وتبقي تمام بس انت حسيت بفرق في السحب ونعومه العربية لما فولت 92 ، اصل انا عندي بيحصل كده بس الي هيجنيني ان حتي نقلات الفتيس بتكون خفيفه ميه معرفش ايه علاقه ده بالنزين بس بيحصل .