الموضوع: المشكله المصريه في اختيار العربيه

عندنا في مصر في مشكله كبيره قوي في تقييم السيارات من قبل المشترين او المالكين ، اولها هو الانحياز التام سواء بالايجاب او السلب لماركة اوموديل معين وده طبعا بيصاحبه شتيمه وانتقاد لاذع للماركات الاخرى يعني مش عشان انت من محبين الياباني او الكوري وبيستحمل سواقتك يبقى الاوروبي ملوش لازمه او زي الزفت و ادائه مش كويس عشان طريقة سواقتك مش ماشيه معاه ، المشكله التانيه هو محاولة منطقت اللا منطق وده بيكون في المغاله في توقعات العيوب او المميزات لاي موديل خاصة بالمقارنه مع التكلفه يعني متقعدش تتخيل انك هتركب رولز وانت راكب بي ام فئه ثالثه او انك هتركب كورولا و انت راكب لوجان ، المشكلة الثالثه هو الحكم بدون تجربه سابقه او معرفه مؤكده بمعنى اخر الفتيي ، مادام مشوفتش او معندكش اي دليل على كلامك ياريت تسكت عشان كلامك بيأثر على واحد بيشتري حاجه معمره وهتبقى جزء من حياته ، المشكله الرابعه هي عدم التفرقه بين العيوب الفرديه و العيوب الشائعه في اي موديل وكمان العيوب الشائعه لاي عربيه حديثة او جديده لأن مش معنى ان عربيتك معيوبه يبقى كل العربيات اللي زيها وحشه ولا معنى ان عربيتك طلعت كويسه ما فيهاش عيب يبقى الناس اللي عندها عيوب بتفتري على العربيه القصه ملهاش اي مؤشرات للحكم و التحليل ، و لازم نحط في بالنا كذا حاجه بقى ، اولها ان كل العربيات لازم يكون فيها عيوب ياباني او كوري او الماني او ايا كان ومهما كان سعرها لان الكمال لله واحده ، تاني حاجه ان مش كل الناس سواقتها زي بعضها فمن الطبيعي ان في واحد بيهين الموتور و بيقرص عليه فلازم يطلعلوا عيوب مش عندك وفي واحد بيسوق كما قال الكتاب بس الشوراع و الجو برده يخليه يشوف عيوب مش عند حد الموضوع برده صعب تحكمه الا اذا تساوت الظروف ، كل الكلام اللي فات ده كوووم و موضوع التوكيلات وتوافر قطع الغيار كوم تاني ، لان برده بلدنا الجميل ما بتفرضش الرقابه على التوكيلات و لا بتلزم التوكيل بنسبة قطع الغيار المتوفره في السوق المتناسبه مع عدد العربيات المباعه فمن الطبيعي ان المستهلك يتلعب بيه الكوره ومن الطبيعي انه يركب عربيه مش حاببها بس المهم انها احسن الوحشين وهيعرف يصرفها وقت اللزوم لانه طبعا هيشتري العربيه المنتشره اللي كلا الناس بتشتريها عشان يعرف تبيعها تاني ...وفي الاخر تلاقي كام موديل بيجري في الشارع وكام تاجر بيحتكر قطع الغيارسواء استيراد او جديد وطبعا مع عدم التركيز على اي قطع غيار لاي عربيه تانيه متباعه في مصر