عندنا شقة نبيعها ولا نأجرها ؟

**EgyArmy** · 27-06-2016 02:27 AM

عندنا شقه بنفكر يا اما نبيعها يا اما نأجرها اشتريناها من 6 سنين زاد سعر بيعها حوالى 10% و ده لان المنطقه متوسطه ولا شعبيه ولا راقيه هيا فى عمارة 7 ادوار و هى الدور الاول علوى مساحتها حوالى 90 متر و قريبه جدا من المواصلات يتمشاله دقيقه و السوق يتمشاله اقل من 5 دقايق و المنطقه كلها متعمرة و سكنيه كلها
بس لظروف بنا بيت للعيلة و الحمد لله كامل تماما فمبقاش ليها لازمه الا انها هتبقى موجودة بس كدة
بالنسبه لاحتياجنا فلوس كاش فهو متوسط مش محتاجينه بشكل مميت يعنى يعنى اتباعت خير و بركة متباعتش عادى برضه الحياة شغاله
و هنا هندخل فى مرحله الايجار الى هيبقى متوسطه حوالى 750 جنيه او اعلى قليلا فى الشهر و مش عارف هيتدفع تأمينات كام شهر و بيستردها المؤجر لما يمشى ولا لا مش عارف بصراحة الفكرة دى لكن احنا ولدين و بنت و الحجه يعنى لو اتأجرت محدش هيبقى مستفيد برضه فمش عارفين بصراحة نعمل ايه نأجرها و نعمل بفلوسها كلها مثلا تأمين للحياة زى مصر للتأمين و لما يخلص يتقسم علينا بس ده اقل مدة 5 سنين

انتوا لو مكانا هتعملوا ايه ؟

**waelfarid** · 27-06-2016 06:31 AM

لو العمارة التي بها الشقة حالتها كويسة خليها مش حتخسر اما لو بناء قديم البيع افضل مالم تجد مستأجر منضبط او تنفع مكتب عيادة -معمل تحاليل -او دروس او ترزي او سكن طلبة شوف تنفع ايه ما يضايقش الجيران واهي احسن من فلوسها وانتم ادري بظروفكم وفقكم الله للخير

**Mahmoud Naguib** · 27-06-2016 08:23 AM

شوف الموضوع ده هيتوقف على كام عامل

1. عمر المبنى .. يعني لو قديم اوي بيعها ولو جديد خليها
2. المنطقة .. يعني لو ف منطقة كويسة والى حد ما ممكن تبقى احسن فيما بعد خليها ولو عشوائية او بتتجه للأسوأ بيعها
3. احتياجك اكيد للفلوس .. خصوصا ان 750 ميعملوش حاجة

في حل للموضوع لو مش هتبيع
ممكن تفرشها فرش مستعمل ب 20000 مثلا وتأجرها مفروش ب 2000 ل 4 طلبة مثلا

لو الحل ده مش هينفع انصحك تبيعها
لأن اصلا ف 6 سنين سعر العقار ميزيدش غير 10% دي نسبة ضعيفة جدا ف سوق العقارات والطبيعي ان ال10% تزيدها كل سنة او سنتين على الأكثر
خد الفلوس واعمل مشروعين او 3 افتح محلات اكسسوارات مثلا او عصاير او كافيه
ومتأمنش لأن التأمين ف مصر نصب ف نصب

رينا يوفقك للخير

**Bassem Youssef** · 27-06-2016 02:39 PM

البيع صعب جدا دلوقتي

**احمد المصرى** · 28-06-2016 07:40 AM

بص يا باشا انا هكلمك من واقع تجربتى الشخصيه

الشقه كدا كدا موجوده وحسب كلامك ان سعر بيعها عادى مش مبلغ وهمى تعمل بيه مصلحه كويسه يبق الصح انها تتاجر حاليا والايجار لو 750 جنيه مثلا حسب كلامك مش وحش فلوس جايه من عند ربنا بدل ما تقفل الشقه وخلاص

بس اهم حاجه فى الايجار تختار انت بتسكن مين لان لو طلع بلطجى مثلا يبق الشقه راحت ومفيش ايجار وحلنى عقبال لما ترفع قضيه وخلافه

التاجير يكون العقد سنه واحده فقط غير قابل للتجديد نهائي وبعد ما يخلص كان راجل كويس اجر تانى سنه وهكذا يعنى سنه بسنه

بتاخد تامين شهر واحد وهو ماشى بيخده بعد ما تخصم فواتير الكهرباء والمايه والغاز والطبيعى انه بيدفعهم شهريا اساسا

اهم ما فى الموضوع انت هتاجر لمين بلطجيه ولا ناس محترمه وابعد كل البعد عن الطلبه وجع قلب ومفيش فلوس