أيه أفضل زيت للداستر 4*4 مع شوية إستفسارات أخرى
أيه أفضل زيت للداستر 4*4 موديل 2012 وعاملة 27500 كم وإستخدامى ليها قليل جداً ومشاويرى كلها صغيرة
وتقريباً اللى فيها زيت شل الأصفر 10 الاف 4لتر + 1 لتر 5 الاف !!!! على كلام الميكانيكى اللى حطلها
فى شهر 1 اللى فات كنت ماشي عادى وعلى المطب نفسه أديت غيار من التالت للتانى بعد المطب مباشرة العربية دايرة بس مش عاوزة تتحرك نهائى وبتآخد غيارات عادى من الأول للتانى للتالت وبصينا على حركة الغيارات فى الكبوت لقيناها بتتحرك عادى لما بننقل الغيار ، المهم مركز صيانة قريب قاللى كده عاوزة طقم دبرياج أسطوانة وديسك وعلى كلامه أنه غيرهم (أنا مش واثق فيه لأنى ماشفتش حاجة بعينى!!) والعربية قعدت عنده 3 أيام وغير زيت الفتيس ، وأنا قلتله غير بالمرة زيت الموتور والفلتر وقاللى غيرتهم بزيت شل الأصفر 10000 جركن 4 لتر وحطيت عليهم ا لتر شل 5000 !!!!! وقاللى مش هتفرق حاجة ومتخافش ، ومن ساعتها وأنا قلقان جداً وحاسس أنه نصب عليا ومغيرش حاجة لا طقم الدبرياج ولا الفلتر حتى !! ممكن كل اللى عمله أنه غير زيت الموتور بس ولغبط الدنيا وحط تخليقى على معدنى!! تغيير الزيت ده كان عند 23500 كم وكده يبقى مشيت بيه 4000 كم
السؤال الأول :
دلوقتى عاوز أغير الزيت والفلتر لزيت أمسويل (نوع الموتور عندى K4M 16v 1.6L) وكتالوج العربية بيوصى بمواصفات ACEA1, A2, A3, A5 - API SL/ API SM - RN 0700
الزيت اللى كان قبل ده كان ليكوى مولى توب تيك 10W40 والللى قبله كان وولف 5W30 ياترى أغير لزيت أيه مواصفاته؟
السؤال التانى:
أغير زيت الفتيس ولا نكشف عليه بس (طبعاً أنا شاكك أنه غيره أصلاً ولو غيره ممكن ميكونش بالمواصفات المطلوبة!!!!)
السؤال التالت:
أزاى أتأكد أنه فعلاً تم تغيير أسطوانة الدبرياج والديسك ؟
السؤال الرابع:
لغاية دلوقتى مغيرتش سير الكاتينة ولا الدينامو ، لازم أغيرهم ولا عادى ممكن يقعدوا معايا ؟
السؤال الخامس :
البطارية دلوقتى بقالها معايا حوالى سنتين وكانت العربية عاملة 10000 كم ودلوقتى العربية عاملة 27500 كم أغيرها ولا أستنى لما تفصل لوحدها ؟ وهل لو أشتريت واحدة جديدة ينفع أحطها وأخزنها فى الشنطة وأبقى أركبها لما التانية تقف ولا لأ ؟
معلش إستحملونى شوية وكل سنة وأنتم طيبين
