الموضوع: كماليات ال301...مرايات كهرباء, عازل صوت للموتور, حساسات ركن, مثبت سرعة...الخ

المشاركة الأصلية كتبت بواسطة م/أحمد عبد الفتاح

بالنسبة للبريد السريع المصرى انت مش حايكون ليك معاه اى تعامل هو بس تليفون من البريد او من المندوب اللى جايب الحاجه علشان ياكدوا العنوان بالظبط وهما بييجوا لوحدهم للبيت بدون اى تدخل منك لانهم دافعين فلوس الجمارك من جيبهم وعاوزين يرجعوها فحايجيبوك حايجيبوك :)
كمان بعد مالبائع يشحن حتلاقى تراك نمبر ولينك مبعوتينلك على صفحتك على على اكسبريس بتخل على اللينك وتحط التراك نمبر تعرف حاجتك فين دلوقتى .
بالنسبة للحاجات اللى عاوز تعملها فى العربية :
- مرايا الكهربا :
لازم يكون فيه تجهيزات فى العربية تسمح بكده يعنى مثلا هل يوجد فى الباب لما تفك الفرش بتاعه سلك بفيشة علشان لو حبيت تركب مراية كهربا ؟ - هل يوجد مكان فى الباب بتاع السواق او فى الكونسوله مكان لزرار تشغيل المرايات الكهربا ويكون برضه فيه سلك بفيشة للزرار ؟ هل فيه فى علبة الفيوزات فيوز او مكان لفيوز المرايات الكهربا ( وده بيبقى مكتوب فى الكتالوج بتاع العربية عن قيمة الفيوزات ووظائفها ) - غير كده حاتعمل لهم سلك تغذية مخصوص وتوصيلات وده بيبقى بنسبة ٩٠٪‏ عك من الكهربائية لانه ممكن ياخد تغذيه من اى سلك احمر وممكن يكون السلك ده خاص بكهرباء اشارة للكمبيوتر بتاع العربية ويعملك مشاكل انت فى غنى عنها . لو العربية مجهزة لكده توكل على الله ولو مش مجهزة بلاش . بس اعتقد ان معظم السيارات الحديثة دلوقتى بيبقوا عاملين حسابهم - والاضمن التوكيل هما عارفين القصة كلها .
- بالنسبة لمثبت السرعة موضوع صعب بس ممكن يتعمل بس مش فى مصر . فبلاش احسن
- سينسور الركن موجود سواء الصوتى ابو لمبات او اللى بكاميرا وبيتعمل والصنايعية بقوا متمرسين فيه بس تختار حد كويس وليه سمعه ومش مهم لو كان غالى بس يكون بيعمل شغل مظبوط . لو عاوز تركب اللى بكاميرا يستحسن تشترى الكاسيت التاتش اللى بشاشة ويكون فيه خاصية توصيل الكاميرا بتاعة الركن - لو معندكش او مش ناوى تجيبه يبقى خليك فى الصوتى ابو لمبات .
بالنسبة لقفل الزجاج بتركب وحدات رفع ودى مافيهاش مشاكل غير انك تعملها عند حد كويس وليه سمعه كويسة بس فيه نقطة صغيرة لو عربيتك بتسوجر اوتوماتيك لما سرعتها توصل ٢٠ كم/ساعة تخلى بالك ان الكهربائى ماياخدش تغذية وحدات الرفع من المسوجر علشان لو مشيت بالعربية وحابب تفتح الزجاج حايتقفل لوحده تانى لما المسوجر يقفل :)
- بالنسبة لرفع وغلق الزجاج بتاع الابواب الامامية او باب السائق بضغطة واحدة فدى اوبشن فى كمبيوتر العربية ممكن تشغله او تلغيه من القوائم وبتبقى مكتوبة الطريقة فى الكتالوج - بس المهم يكون الاوبشن ده موجود فى العربية .

انا عارف اني طولت عليك, انا اسف

بس سؤالين و خلاص:
1-هل ترشح حد كويس اركب عنده سينسور الركن, يعني حد بعينه اروحله و مش مهم السعر فعلاً, انا هركب ال بصوت بس حتي مش عايز اللمبات انا عايز ال بييعمل بييب بييب ده زي في الفولكس
2-ممكن حضرتك تشرحلي او تديني لينك شرح مكنة الرفع دي بتعمل ايه بالظبط, انا لسه بتعلم و سمعت المصطلح بتاع مكنة الرفع كتير بس مش عارف وظيفته بالظبط, انا هندسة بردو ف بحب اعرف كل حاجة بالتفاصيل :)