الموضوع: الى وحوش الرينو استفسار بخصوص ميجان 2

السلام عليكم
احب احيي وحوش الرينو على مجهودتهم

معروض عليا ميجان 2 موديل 2006 ماشية 120000 كيلو وحالتها الخارجية جيدة وصاحبها بيقول ان صيانتها معمولة اول باول

بس انا الصراحة مقلق من لاقدر الله مشاكل فى السيارة بعد الشراء لان دى اول سيارة لى بعد سيارة والدى
ويادوب الفلوس الموجودة على قد تمن السيارة ومحتاج ان العربية تقعد مش اقل من سنة عشان اصرف عليها وانا مش هسافر بيها من البيت للشغل تقريبا كل يوم 30 كيلو مش هسافر بيها كتير

ولكن الى بيغرينى هو تمن الموديل ده فى السوق تقريبة ب 70000 جنيه وممكن ينزل ل 67 الف وانها ستيبترونيك وواسعة و 1600 cc وشيك ومالية مركزها

بس الى بيرجع يخوفنى المشاكل الى بنقراء عنها وان قطع غيارها مش متوافرة وغالية نسبيا خصوصا انى كنت بسوق اللادا الى ممكن اى حاجة فيها تتلم بمبلغ بسيط ومش بتقول لاء خصوصا ان لسه الفلوس يادوب اجيب بيهم العربية ف قلقان ان العربية تفتح منى مصاريف واضطر اركنها تحت البيت لغاية لما يبقى معايا فلوس اصلحها بيها

ف ايه رايكوا مع العلم انى بحب العربية دى اوووى وبحترمها ولما بشوف اى عربية منها ماشية جمبى بتهبل عليها
وايه الى اخلى بالى منه وانا بشتريها لو ليا نصيب واخلى بالى من ايه بعد ما اشتريها

واسف لو كنت طولت عليكوا

وشكرا لاعضاء المنتدى

المشاركة الأصلية كتبت بواسطة new soft

يا باشا العربية زي الفل
أنا معايا نفس الموديل وبصراحة رغم إنها تعبتني حبه إلا إنه في المجمل عربية ممتازة
أنا بالنسبة لحوار إنك متصرفش عليها لمدة سنة فحضرتك أكيد معندكش خلفية عن العربيات خالص انا شاري العربية 88 ألف كيلوا مش 120 ومتصينة وتمام لكن طبعا صرف عليها من شرخ زجاج لخبطة في الكارتيرة لتغيير الكباس بتاع التكييف وإنتهي الأمر بتشييك علي دايرة الكهرباء والدوران بالكامل
لكن الحقيقة العربية نفسها بريئة من المصاريف دي دي إستهلاكات عادية جدا
قطع الغيار موجودة مرطرطة في صقر قريش هيا غالية عليا حبتين لكن أرخص من الأوبل أو الإسكودا أنا بقارن بدول لأنهم هم البديل ليها محدش يقارنها بصفيحة الزبالة إلي إسمها فيرنا علشان خاطري ولا اللانوس أنيل يعني

لكن لو حضرتك عايز تجيب عربية مصاريفها رخيصة يبقي خليك في الفيرنا ممتازة في النقطة دي

انا فاهم ان كل العربيات ليها مصاريف وتصيين ودى مش مشكلة عندى لكن المشكلة عندى فى ان يطلعلى مشكلة او عيب فيها ب 5000 جم مثلا وانا لسه شاريها ودافع فيها تقريبا كل فلوسى اضطر اركنها ةتحت البيت لغاية لما ربنا يفرجها
العربية ماشاء الله تحفة كأمكانيات وسعر وركوبة اكيد احسن من مليون فيرنا ولانوس بس المشكلة فى الحاجات الى بتزعل فى فلوس كتير