السلام عليكم
مرحبا بكم اليوم اقيم سيارة جديدة في السوق المصري وهي جاك أس تو Jac S2
اشتريتها لزوجتي ب 135 الف جندي قءة اسمها لوكشري Luxury
أولا الشكل الخارجي والتقفيل
ممتاز جدا - اعطيي الشكل الخارجي 9 من عشرة فالنواكل في كل مكان على الابواب فى المقابض في الجريل الأمامي والخلف والسيارة ابعادها بالنسبة لفئتها ممتازة وارتفاعها 20 سم يعني عالية وتعدي اي مطب بسهولة خاصة ان ابعاد السيارة تساعدها على ذلك فقاعدة العجلات 2500 مم
التقفيل الخارجي ممتاز مفيش فروقات او فواصل أو اعوجاجات - السيارة واقفة بسم الله جامده ولا المرسيدس فئة ال بي كلاس ويمكن احسن - الصاج متين وقوي وثقل الكبوت يديلك الانطباع بكده - غلق الأبواب اعطي له 7 من عشرة يعني عامل زي الكوري مش الياباني ولكن احسن من البروتون مثلا
الخامات المستخدمة عالية جدا وخاصة بطانة الكبوت من الداخل - كاوتش الأبواب - حمالات السقف - عزل الموتور - الجنوط وهكذا
نقاط الضعف في الشكل الخارجي :- كنت اتمني ان يكون فيه ليد في فوانيس الخلف كانت هتزود الشياكة وكمان كنت اتمني يكون فيه غطاء موتور زي اختها السينوفا - ويكون فيه تصفيح من اسفل الموتور لكن مفيش -
التقييم العام للسيارة من الخارج - 8 من عشرة
السيارة من الداخل
السيارة شكلها جميل من الداخل - واسعة والشنطة واسعة بالنسبة لفئتها اوسع من السانديرو مثلا
التابلوة فخم ولا تشعر بأنك تجلس فى سيارة متوسطة المستوى بل مستوى عالى جدا - يوجد تطعيمات كروم في كل مكان حول فتحات التكييف المقابض وغيره ايضا يوجد في التابلوه ما يسمونه ابانوس هو طبعا ليس خشب ابانوس فعلي ولكن لونه رصاصي فاتح مشبح في غامق يعطي احساس اكثر بالفخامة
الخامات المستخدمة في الداخل :- حقيقي ممتازة جدا جدا وأفضل من سيارات أوروبي بكثير زي الرينو السانديرو مثلا وفي جودة البيجو 301 او الستروين السي اليزيه والكيا الريو ويمكن افضل كمان
الكرسي مريح جدا جدا ويمكن التحكم في أوضاعة الستة - يوجد كروز كنترول ومالتي فانكشن ويو اس بى وايه يو اكس (USB - AUX)
الرؤية ممتازة وخاصة الأمامية اما الخلفية فالزجاج ضغير والرؤية محدودة
المساحات الأمامية والخلفية جيدة جدا ويمكن أن تأخذ ثلاثة ركاب في الخلف براحة تامة
خامات الأبواب محترمة جدا ومطعمة بالجلد - لوحة العدادات الأمامية بسيطة وسهلة ونورها ابيض
الأزرار مخملية جميلة وناعمة وليست من النوع الرديء الذي يعطي الأحساس بأنه سوف تقع او تتلف مع الوقت - للأمانة السيارة مصروف عليها كويس جدا جدا
الأنوار الأمامية ممتازة وتوزيع الأضاءة جميل
اماكن النخزين ليست كثيرة ولكن كافية فهناك مثلا المكان المفضل لدي وهو فوق التابلوه في المنتصف للتليفون ولم يفوتهم أن يكون مصنوع من مادة مطاطية بحيث لاينزلق التليفون بسهولة مع اي فرامل -
يوجد مخدع لكرسي السائق وهي لمسة جميلة وان كنت اتمني كونصول ف المنتصف بدلا منه ولكن غير موجود ويمكن اضافته من اي محل اكسسوار سيارات - الدرج الأمامي واسع ويمكن تخزين حاجات فيه كثير
- في الأبواب أيضا اماكن لزجاجات المياه والجرائد والمجلات .
ما كان بنقصها الكونصول وجريل تكييف في الخلف و فرش جلد و شاشة تاتش وتكييف تاتش ولكن موجودين في الفئة الأعلي ولا اعلم سعرها هيكون كام لكن انا شخصيا لا احب الشاشة التاتش الا علشان كاميرا الباركنج فقط ويمكن تركيبها وخلاص - كما ينقصها البلوتوث وايضا يمكن تركيب كار كيت ونخلص - لم اختبر السماعات بعد وهم اربعة سماعات وفي الفئة الأعلى ستة سماعات
نأتي للسافتي باكدج - وقبل ان اتحدث عنه فأنا لا اعلم ان مدى جدية وفعالية السافتي في السيارات الصيني ولابد من اختبار منفصل لها - اما من حيث المواصفات فأبدا بأنها فول باكدج - ABS - EPD - ESP - BA - HL
وترجمتم مانع الأنغلاق وموازن توزيع الفرامل و مانع الأنزلاق و مساعد الفرامل للطوارىء - مساعد الفرامل في المطالع والمنازل وذلك بالأضافة الى اثنين وسادة هوائية
لو كانت الحاجات دي شغالة فعلا تبقى السيارة اوبا جامدة قوي
تجربة القيادة
الموتور 1500 سي سي 114 حصان بتكنولوجيا VVT , وهي تغيير توقيت فتح الصمامات حسب السرعة والفتيس CVT وهو دائم متغير متحسش بنقلات زي كده الهوندا السيتي القديمة وهو فتيس له مميزاته وعيوبه ابسطها أنه موفر في الوقود ونقلاته متحسهاش خالص لأن مفيش نقلات أصلا
التجربة العملية أثبتت أن الطلعة الأولي بطيئة زي الألماني مثلا الاوكتافيا كده - وان الموتور صوته عالي شوية ولكن مش مزعج - العزل ممتاز جدا بمعني الكلمة - الثبات متوسط الى جيد لأن السيارة عالية عن الأرض - النعومة في الدركسيون فائقة (حريمي ) وثابت لأنه كهرباء يعني مبينقلش زنة الأرض والموتور في ايدك لكن التوجيه ضعيف ومش متجاوب بصورة عالية زي الكوري أو الياباني
السيارة عفشتها ناعمة جدا جدا بالرغم من ان الجنوط 16 بوصة (على فكرة شكلها جميل قوي)
استجابة المحرك مش سريعة قوي ولا بطيئة ولكن اتوقع تحسن مع الوقت لأن السيارة لسه في الأول بتلين
التكييف رائع ومتحسش لما بيشتغل بصوته او نتشة الكمبرسور
أنا شايف انها صفقة محترمة وان الصيني قادم وبقوة لا محالة واننا في مصر هييجي يوم ونقول الصيني جيد زي الكوري وهينتشر بكثرة خاصة ان الكوري سعرة اصبح عالي ومش في المتناول فضلا عن الياباني والألماني
السيارة ممكن تكون السيارة الأولي للعائلة - وممكن تكون حريمي كمان - لأن وسعها حلو وابعادها مدمجة -
اعتقد ان استهلا البنزين هيكون ممتاز نظرا لوجود موتور VVT مع فتيس CVT - مش هتحك في مطبات مهما كان عالي - الرفاهية موجودة بحد ادنى - الخامات عالية و الشكل شيك - الوكيل ممتاز والضمان خمس سنين او 150 الف كيلو متر (طبعا حلو جدا) الصاج متين - السيارة تقيلة في الأرض - الكراسي مريحة - وضعية القيادة ممتازة - موجود مانول مود للفتيس لو عاوز تحرق وتشد للشباب - التكييف ممتاز جدا
الفرامل لسه مجربتش في موقف طوارىء ولكن يبدو لي انها جيدة وسوف افرد للسافتي باكدج موضوع منفصل لما اجربها ز
كنت أفضل أن تزيد اماكن التخزين ولكن يمكن معالجة هذا الأمر بوضع كونصول في المنتصف - كنت اتمني يكون البلوتوث اساسي ويمكن الأستعانة بسماعة ونخلص - مفيش فتحة سقف (مش مهم ) الفرش مش جلد (يركب عادي من اجود الأنواع او تلبيسة مش قضية) توجيه الدركسيون مش دقيق في الأستجابة وعاوز تعود ورأيي ان ده اهم عيب فيها اللي مش هنقدر نصلحه زي الفرش والكونصول والحاجات دي - الموتور طلعته بطيئة يمكن بسبب الفتيس أو انه ضعيف لكن لما يكون التكييف مش شغال بيتحسن كتير
القول الفصل هل ينصح بشرائها أم لا في نفس الفئة السعرية وهقولكم رأيي مش علشان انا اشتريت لكن بأمانة والله لو قارنت هتلاقي موجود الرينو لوجان وسانديرو عادي فئة اولي او ثانية وكمان سينوفا X25 فئة اولى وكمان حاجات ثانية زي البي واي دي F3 واللادا ولكن من رأيي الجاك افضلهم وأفضل من الرينو وذلك لجودة الخامات وجودة التقفيل والشكل العام ودي مسائل شخصية انا فتشت كويس قوي في الرينو ومعجبنيش خامات التابلوه والأبواب وكنت راكبها في الشغل بصراحة مش ثابته خالص
المفضلات