بعد تغيير جوان وش السلندر ... امبير الحراره بيرقص

بسم الله الرحمن الرحيم

انا دلوقتي كان عندي مشكله ان العربيه سخنت مني واضطريت الحمد لله اني اغير جوان وش السلندر وده لينك الموضوع الاولاني
لوجان 2010 سخنت جدا و مش راضيه تدور تاني

دلوقتي لما استلمت العربيه ومشيت بيها شويه عداد الحراره عمال يطلع وينزل بمعني مثلا اني افتح التكييف الاقيه زاد في ساعتها شرطتين اقفل التكييف الاقيه قل ولاكلام ده بيحصل مع النور بردو وسعات بيحصل من غير مش اشغل اي حاجه الاقي امبير الحراره نط شرطتين و بعدها بثانيه واحده ينزل تاني وسعاتا يعلي للاخر ولما ابطل العربيه وادور يرجع طبيعي
المهم انا دلوقتي عملت كابل ارضي من سالب البطاريه للموتور من تحت وغيرت ثرموستات الكوعه ومافيش اي نتيجه
وبقيت طول مانا ماشي عمال اتفرج علي امبير الحراره وهوا بيتنطط قدامي
:crying2::crying2::crying2:
مش عارف ايه الحل

حضرتك عرفت ايه السبب اللى خلى العربية تسخن اول مرة والجوان يضرب ؟؟؟؟
لو مكنتش عرفت السبب يبقى حضرتك لازم تعرفه فوراً
- اكشف على مستوى مياه دورة التبريد ويستحسن تروح لميكانيكى ياخد الهوا من دورة التبريد .
- هل فيه تسريب من دورة التبريد سواء من الطلمبة او من الخراطيم او من الرادياتير
- فيه عربيات بيبقى فيها مروحتين قدام الرادياتير واحدة للموتور والتانية للتكييف وبتاعة التكييف بتبقى شغالة باستمرار اول ماتشغل التكييف اما بتاعة الموتور فبتشتغل وتفصل حسب حرارة الموتور- شوف مروحة التكييف شغالة ولا لأ ؟ وبالمرة اكشف على مروحة الموتور شغالة ولا لا؟
- اكشف على الترموستات
- فيه حساس درجة حرارة مياه التبريد وده بيدى اشارة للكمبيوتر واشارة لعداد الحرارة تكشف عليه
- اكشف على البطارية لانها لو تعبانة شوية بتخلى الكمبيوتر يهيس
وقبل كل ده هل عندك لمبة اعطال الموتور منورة ولا بتنور احيانا وتطفى - اكشف برضه سكان كمبيوتر وشوف لو فيه اعطال متسجلة active او pending

انا للاسف لاماعرفتش السبب اللي خلاها تسخن اول مره وبردو الميكانيكي ماعرفوش وانا مش لاقي سبب غير اني يمكن اهملت ابص علي المياه
دلوقتي مافيش تسريب في مياه الريداتير وانا متاكد من ده
العربيه فيها مروحه واحده وبتشتغل
في ارتفاع في استهلاك البنزين من 9 لتر ل 11 لتر كل 100 كيلو
الثرموستات انا غيرتها احتياطي مع انها كانت شغاله
مش فاضل غير البطاريه و حساس الحراره وانا شاكك في حساس الحراره لانه ممكن يكون بيزود استهلاك البنزين

اقتباس:

---

المشاركة الأصلية كتبت بواسطة م/أحمد عبد الفتاح

- اكشف برضه سكان كمبيوتر وشوف لو فيه اعطال متسجلة active او pending

---

ايه الفرق بين العطل لما يدى Pending او intermittent او current ???

اقتباس:

---

المشاركة الأصلية كتبت بواسطة ahmed_eng2001

ايه الفرق بين العطل لما يدى Pending او intermittent او current ???

---

الأكواد اللى بتتقرا فى السكانر بتبقى كل كود عطل موجود فى العربية مكتوب جنبه او فوقه إنه active أو إنه pending
فيه بعض الاعطال بتحتاج انها تحصل عدد معين من المرات علشان الكمبيوتر ينور لمبة العطل وممكن جداً تلاقى مافيش لمبة اعطال منورة بس فى السكانر تلاقى فيه كذا كود متسجل ومكتوب إنه pending وده معناه إنه لسه مخلصش عدد المرات اللى حايخلى لمبة الاعطال تنور زى مثلاً الميس فاير بيبقى فى الاول pending وبعد مايحصل الميس فاير عدد معين من المرات متبرمج عليها الكمبيوتر بتاع العربية بيتحول لـ active وينور اللمبة.
ساعات الميس فاير بيحصل بدون سبب مثلاً بطارية فيصت ولا بنزين مضروب وبعدين انت غيرت البطارية او البنزين خلص ومونت بنزين كويس يبقى الكمبيوتر حايسجل عطل ميس فاير بس pending طيب حايفضل العطل ده متسجل فى الكمبيوتر ومكتوب جنبه pending طول العمر ؟؟؟؟ لأ لان الكمبيوتر بيبقى مستنى برضه لزمن معين لو محصلش العطل ده تانى يلغيه مع نفسه .
لذلك لما تشترى عربية مستعملة مافيهاش لمبات اعطال منورة لازم برضه تكشف كمبيوتر وتركز قوى على الاعطال الـ pending لانه بيبقى احتمال كبير يحصل قريب - ممن تلاقى عربية كويسة جدا ومافيهاش لمبة منورة للاعطال وتكشف عليها تلاقى الـ pending فيه مثلاً كود لعطل من اعطال الفتيس !!!!! يبقى حضرتك ممكن تشترى العربية وتمشى بيها شهر ولا شهرين وبعدين تجيب فتيس لاقدر الله !!!!! حاتعمل ايه ؟؟؟؟؟؟؟

ده حساس الحرارة بيهيس وعاوز يتغير
صباع الحرارة بلغة الصنايعيه

انا غيرت الحساس النهارده وللاسف نفس الموضوع بردو

اكشف على البطارية ولو طلعت سليمة لازم تروح تعمل سكان كمبيوتر وتشوف الاعطال ال pending وتاخد الارقام بتاعتها من اللى كشف وتنشرها هنا وربنا يسهل ونقدر نوصل للسبب

اصل كده المشكلة هتبقى في العداد نفسه وديه عاوزة واحد بتاع عدادات
بس برده ده مظهرش الا بعد تغيير جوان وش السلندر
يعني العداد محدش قرب منه وسليم

هو المؤكد ان ديه حاجة كهربا مالهاش علاقة بجوان وش السلندر
بس هي ايه ؟
ده السؤال

حاجة غريبة فعلا