الموضوع: الجواب الشافى لعملية سحب هوا دورة التبريد

المشاركة الأصلية كتبت بواسطة nor2005

بسم الله الرحمن الرحيم
اخوانى واخواتى الكرام اعضاء المنتدى الغالى
بعد قرائتى لموضوعات كثيرة عن عملية اخد هوا دورة التبريد واذاى نقدر نحرج الهوا دا
لقيت كلام كتير جدا فية اللى يقولك فك خرطوم الراجع بتاع القربة وفية اللى يقولك زود مية والعربية دايرة لحد ما الخرطوم يجيب مية علطول واستنا المراوح تشتغل ............ كلام كلام كتير
بس وانا بدور لقيت اخ كريم كاتب الموضوع دا وشارحة وبصراحة كلامة مقنع وسليم
وعلشان كدة حبيت انقل الموضوع هنا علشان يستفيد الجميع

Khaled Kasem



وكل سنه وانتم طيبين بمناسبة قرب حلول شهر رمضان الكريم اعاده الله علينا بالخير دائما
وبعد
بمناسبة دخول الصيف واحتياجنا الشديد والاطمئنان دائما علي سلامة دورة التبريد المياه في العربية كنت قبل كده نوهت وقلت عشرات المرات علي طريقة أخذ الهوا من الدورة المغلقة بتاعتنا انها تختلف عن الدورة المفتوحة. فاللي حتقرأوه حضراتكم دلوقتي كان مجرد تعليق علي بوست لعضو من الاعضاء بيسأل عن سبب سخونة العربية وطريقة أخذ الهوا من الدورة فلما ربنا قدرني ورديت عليه رد شامل ووافي ومتكامل ومقنع وعلمي ومنطقي حبيت انزله في بوست لانه يستاهل حضراتكم تشوفوه جميعا وعلشان نشيل من دماغنا الطريقة الخاطئة لاخذ الهوا من هذه الدورة المغلقة اللتي نملكها في الدايو وهي هاجس خرطوم الراجع اللي يتفك وكأننا امام دورة مفتوحة او عربيه فيات قديمه
اليكم التعليق كامل
كل الدايو بل كل الجنرال موتورز تقريبا
يمتلكوا دورة تبريد مغلقة ودي معناها الطبيعي او العكسي ان فيه حاجة اسمها دورة تبريد مفتوحة!!!!!!!!
طب الكلام ده صحيح ؟؟؟؟؟؟
اه صحيح
طب ازاي
حقول تاني ازاي وامري لله
ببساطة كل ماهو غطاء الضغط في القربة والريداتير مصمت مفهوش اي فتحات {زي عندنا يعني} اسمها دورة تبريد مغلقة زي الدايو والاوبل والشيفروليه {جنرال موتورز}
وكل من هو غطاء الضغط في الريداتير ويوجد ايضا غطاء عادي للقربه فهي دورة تبريد مفتوحة زي كل الياباني والفرنساوي ومعظم الاوروبي
بمعني الدورة المغلقة لها منفس واحد فقط هو نفسه المدخل والمخرج للماء والهواء
طيب ازاي الكلام ده
لو بس وقفنا قدام القربه بتاعتنا وتأملنا لحظات شكلها ومكان ومنسوب وجغرافيه الخرطوم بتاع الراجع اللي الناس مصممه تفكة من مكانه علشان تخرج الهوا وكانهم امام عربيه فيات او بيجو او شاهين
حيلاقوا الخرطوم في اعلي نقطة في القربة ويعلو علامة الmix االي المفروض منسوب الميه يبقي عندها يبقي بسم الله الرحمن الرحيم وبالعقل كده اي هوا حيخرج من الخرطوم عند اكتمال الدورة وفتح الثرومستات حيخرج ويخش القربه ويتجحز فوق علي سطح الميه ويفضل محبوس يعييني لحد لما اي حد ابن حلال ييجي ويهوي الغطا ويخرجوا برة القربة
الحته دي بس قعدت اشرح فيها لفطاحل وزعماء الريداتير في المنصورة
وما ادراك ما المنصورة حتي فهموا وعرفوا ان المنطق السليم يوافق العلم الصحيح وانهم علي باطل وهذا ما وجدوا عليه آبائهم فاعلين وحافظين مش فاهمين. وهي دي مشكلة. بلدنا انتشار الخرفات والاشاعات والفتي حتي اصبح الباطل والخطأ هو الصح وهو السائد والمشهور والمتبادل بين الناس والصحيح هو اللي غريب ومستغرب بين الناس
وابسط شئ ممكن تقولوه لبتاع ريداتير. حافظ مش فاهم علشان تفحمه وتعرفه انه مش اسطي ولا صنايعي ولا حاجه وهي مجرد ارزاق
قوله لو فيه كولمان ميه وعايزك تخرج الهوا اللي فيه حتخرجه منين حيقولك طبعا من الغطا من فوق
قوله طيب لو عاوزين نخرج ميه تخرجها منين حيقولك من تحت. قوله صح انت فاهم اهو وبرااااااااااااااافو
برافو عليك اعمل كده بقي في القربة. بتاعة العربيه لو سمحت
هههههههههههههههههه 100% حيتكسف ويخجل من نفسه ويعرف انه عمره في حياته مشغل عقله وان حافظ مش فاهم او ومش عايز يفهم
اخيرا بقي علشان انا طولت حبتين
اخراج الهواء من الدورة المغلقة بيتم عن طريق ترك السيارة تسخن وتوصل لدرجة حرارة التشغيل الطبيعية وبعدين نقف عند القربة وايدينا علي الغطا واول ما المراوح تشتغل وتبطل{الثرومستات فتح } فورا نقوم لفين غطا القربة نص لفة بحيث نسمح للهوا فقط بالخروج من غير ما نسمح للميه بالفوران طبعا وساعتها حنسمع صووت. فسسسسسسسسسسس اول ما يخلص نقوم قافلين الغطا تاني باحكام
وكده مبروووووووووووك يا افندم حضرتك خرجت الهوا من دورة التبريد المغلقة بكل نجاح
ولا تفك خرطوم راجع ولا تدلدق ميه وتبهدل الدنيا ولا حاجه
اذن يبقي كدة فهمنا القاعدة الاساسية من كل ده وهي
لايؤخذ هواء الدورة المغلقة مثلما يؤخذ هواء الدورة المفتوحة
كل دورة فيهم لها مميزات وعيوب
معلومة اثرائية
كل السيارات التي تستعمل دورة تبريد مغلقة لها عازل او لباد في الكبوت وده لييييه لان الدورة التبريد المغلقة لها كفاءة تبريدية عالية لانها تعمل تحت ضغط رهييييب وبالتالي معظم التبادل الحراري بين الموتور والريداتير المصمت {مغلق} بيحصله عمليه اشعاع حراري في حوض الموتور {غرفة المحرك} فلابد من وجوود لباد وعازل حراري اولا علشان مينقلش الحرارة للخارج ويصبح الكبوت اشبه بمقلاه البيض من شدة السخونيه وثانيا علشان السخونيه المفرطة متأثرش علي طلاء الكبوت وتخليه يكلح ويجرب وكل صاحب عربيه دايو شايل اللباد او العازل بيعاني من تكليح الكبوت بشكل وااااضح جداااااااااااااااااااااا
وده هو التفسير الوحيد للحرارة المفرطة لغرفة الموتور في الدايو {الاشعاع الحراري}
التبريد بمساعدة البث الحراري في الهواء الخارجي
فكل مالكي الدايو يعرفون هذا العيب شدة سخونه غرفه الموتور بمجرد تدوير السيارة بدقائق معدودة
وده دليل علي كفاءة الدورة المغلقة التي تمتلكها دايو
مرفق مع البوست 4 صور لعربيات جنرال موتورز تملك الدورة المغلقة
نوبيرا
لانوس
اوبترا
اوبل
عاوز حضراتكم تلاحظوا مكان وموقع وجغرافية خرطوم الراجع حتلاقوه في اعلي نقطة فوق علامة الmix. اللي المفروض منسوب الميه يكون عندها وده توضيحا لكل كلامي علشان الصنايعيه او الاسطي حكشة بتاع الريداتيرات يبطل خلع وسحل في خرطوم الراجع علي الفاضي وبدون فائدة

هذا وما كان من توفيق فمن الله وحده وما كان من سهوا او خطأ فمني
وتقبلوا جميعا تحياتي
اخوكم
خالد قاسم

كلام زين واتمنا للجميع الاستفادة

تقريبا غالبية موديلات رينو دايرة ماء مغلقة ّّ!!!

كلام منطقى وسليم ومقنع فعلا سؤال لحضرتك برضه محيرنى شويه عربيتى اوبل يعنى دايرة مغلقه السؤال هل المفروض منسوب الماء بالقربه وهى مقفوله بالغطاء الاصلى السليم والعربيه فى حاله التشغيل والمراوح شغلت وفصلت وكله تمام هل:
١-منسوب الماء يرتفع لاعلى القربه فوق العلامه المحددة من قبل الشركه نتيجه تمدد الماء بعد ان يسخن؟
٢-منسوب الماء ينخفض لاسفل وتظل عند العلامه المحددة نتيجه ضغط بلف الغطاء؟
٣- يتناوب الارتفاع نتيجه تمدد الماء الساخن ثم يتبعه انخفاض نتيجه ضغط بلف القربه لاسفل
جزاكم الله خيرا

المشاركة الأصلية كتبت بواسطة drsalah

كلام منطقى وسليم ومقنع فعلا سؤال لحضرتك برضه محيرنى شويه عربيتى اوبل يعنى دايرة مغلقه السؤال هل المفروض منسوب الماء بالقربه وهى مقفوله بالغطاء الاصلى السليم والعربيه فى حاله التشغيل والمراوح شغلت وفصلت وكله تمام هل:
١-منسوب الماء يرتفع لاعلى القربه فوق العلامه المحددة من قبل الشركه نتيجه تمدد الماء بعد ان يسخن؟
٢-منسوب الماء ينخفض لاسفل وتظل عند العلامه المحددة نتيجه ضغط بلف الغطاء؟
٣- يتناوب الارتفاع نتيجه تمدد الماء الساخن ثم يتبعه انخفاض نتيجه ضغط بلف القربه لاسفل
جزاكم الله خيرا

ارجو من حضرتك توضيح السوال اكثر وما المقصود بارتفاع وانخفاض الماء وتحت اى ظرف تقصد اى اشرح الحالة ولك منى كل التحية

انا اقصد وعربيتى دايرة عادى وواقفه بلاحظ ان مستوى الماء فى القربه بيبتدى يرتفع واحيانا جزء من الماء يخرج من فتحه الفائض ثم غيرت غطاء القربه وجدت ان منسوب المياه ىظل عند علامه الشركه وهى شغاله ودايرة فايمها الوضع الصحيح. فيه ناس بتقول المياه لما تسخن تتمدد وتعلى وناس تقول تنخفض عند العلامه اللى على القربه لان الغطاء السليم بيضغطها لاسفل وناس بتقول بتعلى وبعدين تنخفض بس مش بنشوفها لان عاده بتكون العربي ماشيه!!!! ارجو انى اكون وضحت المقصود من سؤالى

موضوع رائع

كده يبقى تمام اذن رتفاع الماء اللى كان بيحصل عندى دى نتيجه تلف الغطاء الخاص بالقربه كده حضرتك طمنتنى
اخيرا اذا العربيه سخنت للعلامه الحمرا لمدة دقيقه نتيجه تبخر الماء من الغطاء التالف مثلا قبل التوقف هل ممكن يبقى اتلف حاجه فى الموتور ولا مايبناش دلوقت الا مع الاستخدام ؟
جزاك الله كل الخير