الموضوع: مشكلة متكررة في التكييف

بعد صيانة ال٣٠ الف في التوكيل لاحظت انخفاض اداء التكييف تدريجيًا على مدار اسبوع
رحت للتوكيل قالولي محتاج شحن ومشكورين شحنوه
.
٣ أسابيع ورجع تاني يجيب صهد
رحت التوكيل ونبهت على المهندس ان دي تاني مرة
شحنوه تاني وقاللي كان في تسريب بسبب شيء مش مربوط كويس واتربط خلاص
.
أسبوعين كمان وكفاءة التكييف انخفضت
روحت للمرة الثالثة
وقيل لي مروحة التبريد مكنتش شغاله وتم غسيل السربنتينه
.
دلوقت بعد اقل من اسبوع
التكييف لا يعمل
.
هل ينفع اكشف عليه بره التوكيل عشان افهم فيه ايه ؟ ولا ممكن يخربوه ويطلعوه من الضمان ؟
وهل في مسئول اقدر أكلمه عشان اتلافي تكرار العطل ده لان من الواضح ان في إهمال من جانب الصيانة
.
انطباعي عن العربية والتوكيل كان اكثر من رائع
وحتى في المشكلة دي تعاملهم كان في منتهى الذوق
لكن انا زعلان قوى على هدر الوقت ده
.
تنصحوني بإيه ؟

المشاركة الأصلية كتبت بواسطة humhum

الحمد لله النهاردة روحت مركز صيانة القطامية بدون موعد مسبق
وتم عمل استثناء ليا من المهندس محمود ودخلوا العربية
وقابلت مدير عام المركز الاستاذ محمد نبيل اللي تعامل معايا بشكل مهنى جدًا ورفض شكرى له وقاللي ان ده حقي
والآنسة موظفة خدمة العملاء كانت في منتهى التعاون
.
تم اكتشاف تسريب في الثلاجة (السربنتينه الداخلية) واتغيرت تبع الضمان بواحدة جديدة واتشحن التكييف للمرة الثالثة على الضمان برضه
.
بصراحة انا طالع مبسوط جدًا
وحاسس اني يتعامل مع توكيل شركة محترمة خايف على اسمه وسمعته ، طبعًا حصل خطأ ، لكن معالجته تمت بشكل حسسني انه غير مقصود
ودي شهادة امام الله
.
.
بالمناسبة
الموضوع محتاجش اني اتخانق ولا اعلى صوتي ولا اهددهم او استخدم عبارات حادة
انا بقول كده وبنصح اللي عنده مشكله يصر على طلب حقه بدون تجريح او اهانة لحد
.
وباذن الله لو حصل جديد في موضوع التكييف ح اكتبه هنا
وشكرًا لكل من شاركني هم التكييف

طيب والاخبار ايه حاليا بعظ تجربته فتره يافندم
انا بس عايز اعرف حضرتك شوية معلومات تحافظ على التكييف من التسريب
اولا لازم تشغله في الشتا على الاقل مرة اسبوعيا ١٠ دقايق
لازم تنظف التلاجه ببلاور هوا بعد ماتفك فلتر التكييف مره كل شهر عشان تتأكد ان مافيش اي رطوبه او مياه تركن تعمل تآكل او تملح المواسير من برا وتضعفها فيعمل تسريب لما يشتغل
وانت بتغير زيت حط مسدس الهوا في خرطوم صرف التكييف عشان تسلكه من اي رواسب بتحتفظ بالرطوبه ويفضل انك تنظف التلاجه كل شهرين تلاته وتتاكد انها جافة تماما عشان ماتملحش وتضعف المواسير من برا
وتشغل التكييف دايما في البداية وانت على السلانسيه او ماشي بسرعة هادية جدا ماتعديش ١٠ كم في بداية التشغيل اليومي وماتشغلوش على سرعة نهائي
والحمدلله ان ربنا وفقك وعرفت تاخد حقك
حاجه اخيرة ممكن وصف لعنوان مركز القطامية ولو مع حضرتك رقم التلفون لفرع القطامية عشان نعرف نحجز زيارة للصيانه ومشكلة الضمان في حساس الايدل على موتور الهوندا الجديد٢٠١٦ Byd f3