تقرير شامل-من يوم الشراء وحتى 13000 كلم للاخوه الاعزاء
طبعا بعد السلام عليكم ورحمة الله وبركاته
اللي مش فاضي مايبدأش لاني مطول شويتين حتى تعم الفائده وانا الحمد لله من الاعضاء اللي مش بفتي ولا بحب اجامل حتى افيد غيري بكل الثقه
انا اشتريت عربيتي جين 2 موديل 2008 من اوتو ماجد يوم 20 / 8 / 2008 يعني من 3 شهور تقريبا واناوهي طبعا اوتوماتيك سبورت باكيدج
كانت عامله 40 كلم تماما وانا بستلم جربت كل حاجه في العربيه وتمام كله شغال
واخدت العربيه وسافرت بها الى بلدي والتي تبعد عن القاهره 200 كلم
طبعا اخدت الطريق كله 100 او 90 او 110 بدون كبس الا مرتين كده اتزنقت
وواول ماطلعت على الطريق لقيت العربيه فيها خشانه بتيجي عند الار بي ام 3000 وتروح بعد مااعدي النقطه دي في الار بي ام
قلت يمكن العربيه دي كده علما باني كنت في الخليج وسقت سيارات بعدد شعر راسي بكل الفئات
وحاليا اخي معاه جيتا 2008 وكان ماشي قدامي على الطريق اليوم ده وعلى فكره انا كان معايا افيو 2008 قبل الجين 2 وماكملتش معايا 5 شهور ونصف ومشيت بيها 25000 كلم وبعتها والحمد لله
المهم
وصلت بيتنا
وتاني يوم طلعت اكمل تليين لاني مش بحب اكون محكوم في سرعتي وبحب القرص والجري جداااا
وكان عندي طبعا ملاحظات منها الخشانه دي وصوت المسمار بتاع الكنبه والعربيه كانت سفاحة بنزين في التليين وده اللي ضايقني لاني كنت بلين وبتاكل كده امال لما هقرص بقه هتعمل ايه
المهم خلصت تليين ورحت الصيانه 1000 كلم
وقلتلهم على الحاجات دي
ردوا عليا ان الاستهلاك هو كده بتاع العربيه
وصوت المسمار بتاع الشنطه عملوه
والخشانه قاللي الجلده مش موجوده وطبعا دي ضمان ومن حقك وغيرت زيت 5000 وفلتر وتوكلت على الله ودفعت تقريبا 180 جنيه
مشيت بالعربيه رجعت بلدنا على 170 و180 والتكييف كان شغال وقرصت على الغيارات
وكله كان تمام ورجعت البيت
ومشيت تمام بالعربيه يوم ورا يوم لقيت استهلاك البنزين زي ماهو كانت بتعمل 160 كم في الصفيحه-20 لتر- طبعا ده ادمااااااان بنزين من العربيه
قلت مش مشكله وقلت لنفسي بجملتي الشهيره
الرفاهيه مش ببلااااااش
المهم رحت صيانة ال5000 بدون اي عيوب اخرى
وغيرت زيت وفلتر وسألت على الجلده بتاع الخشانه دي قاللي لسه ماجاتش
ومشيت ودفعت يومها اعتقد280 جنيه والله مش فاكر
المهم على 7000 كلم كده بدأت اسمع صوت تزييق بيجي من الابواب مع الفرامل ومع انطلاق السياره
وبيجي بمزاجه وبيروح بمزاجه وهو مش عالي صوت واطي جدا تكتكه كده في البيبان
وكمان لقيت ان في صوت تزييق وانا بركن في حته فيها مطبات وده من جوه الصالون بس في علبة الدريكسيون بس بسمعه فين وفين
وكمان لقيت ان استهلاك البنزين بدأ يقل فعلا ووصل معايا حاليا 10 كلم في اللتر
يعني 200 كلم في الصفيحه وعلى سرعات عاليه
انا بقول ده راجع اني فهمت ادوس امتى واريح امتى على دواسة البنزين
طبعا كمان ظهر صوت هوا بيدخل من الابواب الخلفيه او من الشنطه مش متاكد
وكمان لقيت الرفرف الامامي يمين ادوس عليه يتكتك وارفعه بايدي يتكتك
المهم رحت بقه صيانة ال10000 كلم وهناااا بدأ الزعل
واللي حصل اني رحت وذكرت العيوب دي
قالولي ان صوت الهوا الخلفي ده مش بيروح ده طبيعي
والبيبان هنظبطها
وجلدة الخشانه جات
ومفتاح المرايا كان تقيل شويه غيروه
وصوت التزييق في علبة الدريكسيون هنعمله والرفرف هنربطه
المهمطلعت العربيه قالولي كله اتعمل كانت الساعه 5 مسااااءا
طلعت بالعربيه وراجع بيتنا العربيه اولا تقلت على الارض اكتر من الاول
ولكن 90 وطالع غربله بتزيد في العربيه لاتطاق تنمل رجلك
والتزييق بتاع البيبان موجود والرفرف بيتكتك
والدريكسيون زي ماهو
والعربيه بتحدف شمال
رجعتلهم بعدها بيومين تاني مانا فااااااااااضي جدا اصلي ماوريش شركه ولا حاجه ولا معرض
سلمت العربيه واعجبوا بيا جداااا لاني كنت عندهم من يومين ( على فكره انا بحترم كل من في التوكيل من مهندسين لانهم اصحابي جدااا من بره الشغل اساسا)
وقلتلهم الخشانه راحت بس جات غربله على طول بعد 90 كلم
والبيبان هي هي والدريكسيون ماذكرتوش لانه مش بسمعه كتير ومش هيتعبني
وزودت بقه ان في حتت في دهان الكبوت بتقشر بس صغيره جدا في اماكن موزعه وان في تلميس في الكاسيت بيفصل السماعات اليمين ولازم اقفله واشغله تاني
المهم قاللي نظبط زوايا قلتله ماشي وقاللي نرصص كاوتش قلتله ماشي وقاللي عملنا البيبان والرفرف تاني
قلتله ماشي ولكن وضحتله ان العربيه ماتقلبش حالها الا بعد الجلده اللي ركبت
قاللي لاااا مالهاش دعوه هي دورها تشيل الخشانه قلتله ماشي
المهم دفعني ترصيص بس 118 جنيه
وقاللي الزوايا علينا
قلتله من عينيا
ومشيت اجرب بقت الغربله بعد 120 بدلا من 90 كلم وزادت بقه عن الاول
قلت اروح لبتاع كاوتش اقلب الفرد اللي قلبوها يمكن في جنط في حاجه
قلبت نفس الحكايه وقلت خلاص بقه نخليها على كده لحد ماتعدي السنه ديا وابيعها لاني زهقت
وفجأه والدتي قالتلي تعالى وديني القاهره بعدها بيوم
وماشي على الطريق 130 و140 وراحت والدتي قالتلي العربيه دي فيها حاجه مش كويسه ومش مريحه مع انها لاتفقه شيء في السيارات ولا تعرف حتى كلمة غربله دي
رديت وقلتلها مش كده بردوا انا قلت يمكن انا بهلوس
المهم وصلتها القاهره وقلت والله هروح التوكيل تاني بكره
تاني اعجبوا بيا جداااااا بقه المرادي
وقلتلهم انا مش عاوز اي حاجه غير ان العربيه ترجع ماتغربلش تاني انتوا قلتوا زوايا وترصيص وعملت كل اللي انتوا عاوزينه قالولي طيب
اكدتلهم ان الموضوع ماظهرش الا بعد جلدة التوازن دي
مافيش فايده
المهم قاللي هنرصص تاني
قلتلهم اعملوا اللي تعملوه
المهم صص وظبط زوايا تاني
وقاللي تعالى نجرب
جربت وهي هي
المهم رد المهندس مصطفى اله يباركله وقاللي انت عارف ياحمد ده الكوبلن اليمين هو اللي عامل الغربله دي
وفعلا رفعوا العربيه وغيروا الكوبلن اليمين ومن غير جلدة توازن وجربنا تماااااام ولكن خشانة الار بي ام 3000 موجوده قاللي هنركب الجلده
قلتلوا ماشي ده طبعا رد المهندس هاني الله يباركله من الناس اللي تعبت معايا في الموضوع ده
المهم
انا تعبت من الكتابه
المهم بجد انهم ركبوا الجلده والكوبلن اليمين وراحت الغربله وان كانت العربيه خشنه شويتين عن الاول بس كناااااا فين وبقينااا فين
والبيبان طبعا بتكتك ومش هعملها لانهم مش واصلين لها لحل
والدريكسيون احيانا بيزيق ومش هعمله بردوا وثوت الهوا اللي من ورا مالوش بردوا حل
ودهان الكبود قالولي هاتها بعد العيد نرش الكبوت ضماان قلتلهم ماشي
بس انا طبعا مش هرشه لانهم 5 بقع صغيرين جدا مش باينين اساسا
وكده كله تماااااام من يومها على العيوب الطفيفه دي
وطبعا اخر مره غيرت زيت توتال 9000 وفلتر ودفعت 480 جنيه
وطبعا الباقي كله كان ضمام ماعدا الترصيص الولاني اللي انا اتلسعت فيه ده لانهم ماصدقونيش
انا بقه استنتاجي ان الفني المحترم الاولاني وهو بيركب الجلده دي خبط على الكوبلن عشان هي بتركب جواه فعوجه فغربل العربيه
الله يسامحه طبعا
ولكن حاليا البنزين زي ماقلت 200 كلم في الصفيحه سرعات عاليه وقرص مستمر 4000 اربي ام
السياره تمام معايا ربنا يكرمني بيها ويحرصها وانا من النوع ياجماعه اللي بسافر كتير وطبعا سرعات عاليه دايما 140 الطبيعي واحيانا بطول شويه 170 وخطفتين كده 185 وده اخر العربيه على فكره مش بتجيب اكتر من كده لو زقيتها حتى مع ان الدواسه فيها كتير
ولكن في المطبات بحسس على العربيه فعلا ومش بتاع امريكاني والكلام ده
اتمنى ربنا يكون قدرني وشرحت شرح واااااااااافي للجميع ودي كانت تجربتي مع الجين 2 حبيبتي
والسلام عليكم ورحمة الله وبركاته
ومع تمنياتي لكم بالخير دائما في سياراتكم ولاتنسوني من صالح الدعاء
اخوكم في اي استفسار
تويتي
