انطباعاتي واستفساراتي عن فلوانس 2017 هاي لاين
بسم الله الرحمن الرحيم
اشتريت العربيه الفلوانس الجميله من شهر تقريبا وفيما يلي بعض انطباعاتي واستفساراتي لملاك السيارة الاكثر خبره فيها اذا سمحتو
مبدأيا العربيه ما شاء الله جميله وناعمه ومريحه وتكييفها والكاسيت بتوعها جمال جدا
1- اماكن التخزين قليله اوي:
مكان الاكواب رخم حبتين وخصوصا اني بدخن وبحتاج الطفاية تبقى مش في الفتحه البعيده اللي قدام ...
مفيش مكان حلو للموبايل وخصوصا لو كبير زي الايفون 6 بلس ...
مفيش مكان للجنيهات الفضيه ...
ومفيهاش درج صغير حتى في كل التابلوه ده .. رغم ان الدرج بتاعها ملعب.
هوا صحيح الدرج فيه تبريد؟
فيه حلول او اكسسورات متجربه لعلاج موضوع اماكن التخزين ده؟
2- الفوجات:
لونها اصفر مبوظ شكل العربيه وسط الزينون والليدات ... هل ممكن اركب لمبات تلجي او زينون من غير متطلع من الضمان؟
دا غير انها مش مظبوطه وبتفرش على الارض ويادوب بشوف النور بتاعها... هل ليها رجلاش؟ وممكن اعمله انا ولا صعب؟
3- مخادع الرأس:
هيا ازي المخادع دي بتنزل تاني لاقل مستوى ... انا رفعتها وهيا حلوه بتريح بصراحه .. بس مش عارف انزلها تاني .. ازاي؟
4- الكاسيت:
مفيش حل اني اقلب فولدرات في الفلاشه من غير مدوس على البكره اللي في الكاسيت واعمل رجوع؟
ويا سلام لو حد من محبي المزيكا يقولي احلى ظبطه للكاسيت ايه ... طبعا لما عملت Sound Localization على Vehicle الصوت بقى احلى كتير ... بس الصوت عالي اوي بزياده يعني بعمله على 16 بيبقى عالي واحيانا الصوت بيبوظ ... اعتقد ان حد حريف كاسيت ممكن يوقلي احلى ظبطه اذا سمحتو.
5- البصمة:
العربيه ما شاء الله صوتها واطي ... سعات بنسى وانزل والكارت في جيبي وافتكر ان العربيه دايره ... حاسس اني هسيبها دايره مره ... مفيش اوبشن يخليها تبطل لما الكارت يبقى مش جواها؟
6- السحب:
العربيه CVT وانا معايا عربية تانيه لانسر سوبر اكشن فواخد على الفتيس ده ... بس العربيه ساعات بتتنح شويه ثانيه كده بعد المطبات مثلا ... ومش دايما .. فدا علاجه ايه ولا لما اروح الصيانه اقولهم؟ علما بان موتورها بتاع السنترا ..السؤال هل السنتر بردو كده؟
حبيت اعرض انطباعاتي وبعض الاسئله لخبرا الفلوانس يفيدونا ويفيدو الناس في المنتدى العظيم ده
دمتم بكل خير ... وشكرا مقدما