اشتريت مرسيدس 230 مو78 من سنة وبعتها والمشترى عاوز يرجعها
يا جماعه...انا اشتريت مرسيدس 230 مو78 من سنه وشوية وكان فيها رخصه سنة...دلوقتي ببيع العربية دي المشتري اخدها ومشي ورجع تاني يوم زي المجنون: عاوز ارجع العربيه دي.
انا- خير ايه اللي حصل؟
هو- الميكانيكي بتاعي بيقول العربيه دي مغيرة نص !
انا- ازاي؟
هو- العربيه موديل 78 والحوض اللي فيها ده مش بتاع 78 !
انا- ايه الكلام ده؟
هو- الميكانيكي بتاعي قال كده بمجرد ما فتح الكبوت! وانا لازم ارجع العربيه دي لانها مغيرة نص ولو دخلت بيها المرور مش هتخرج من هناك!
انا- حضرتك اتفضل لو شاكك في العربيه هاتها وحد فلوسك ومتشكرين بس متقولش الكلام ده حرام عليك تطلع القطط الفاطسه انت والميكانيكي بتاعك عشان العربيه مش عجباك انت وهو وعاوز ترجعها !
هو- اقسم بالله يا استاذ ام الكلام ده صحيح دانا منمتش من امبارح من ساعه الميكانيكي ما قال لي كده ونصيحه اخويه ما تبيعش العربيه دي لاي حد لانها هترجعلك تاني!
انا- حضرتك مش واخد بالك ..العربيه دي انا عملتلها فحص واجراات نقل ملكيه كامله وطابقت بصمة واستعلام مباحث وكله تمام والاورنيك اهوه قدام حضرتك لاني جيت علي اخر خطوة وكان اليوم خلص وشديت مع المهندس عشان يمضيلي عالورق عشان الحق اخد الرخصه ومشيت مكملتش الاجراءات. بس قلبي اطمن ان العربيه سليمه ومش مسروقه وشفت ملفها بعيني في مرورها الاصلي وكمان استعلام مباحث...وهي كان فيها رخصه سنه قلت امشي بيها السنه.
دلوقتي يا حضرات السؤال : هو فيه حاجه اسمها عربيه 230 تغير حوض وميبانش ويعدي في المرور ؟
بلاش دي....الميكانيكي اللي بيعمل لها الصيانه مش ميكانيكي مرسيدس صحيح بس هل تعدي عليه حكايه ان عربيه زي دي مغيرة حوض؟
بلاش كل ده......فرضا ان اخينا ده هو والميكانيكي بتاعه كلامهم طلع صح ؟ انا اعمل ايييييييه؟
المشتري بيقولي بلغ في اللي باعلك عشان يتجاب ويتحقق معاه وترجعلك فلوسك لان العربيه دي نصين!
واصحابي بيقولولي مش هتاخد حق ولا باطل حتي لو كان الكلام ده صحيح.
السؤال دلوقتي انا اعمل ايييييييه؟ اوديها لخبير مرسيدس وهو اللي يحكم؟ طيب لو طلعت زي ما بيقول المشتري انا اعمل ايه ؟ بلغ في اللي باعهالي من سنه وشويه واستعوض ربنا في فلوسي واخش في سين وجيم وقصص ملهاش اخر؟ ولا اسيب العربيه مرميه في الشارع الصدا ياكلها ؟ ولا ابيعها لمشتري واعرفه عيبها وهو حر يتصرف في المرور ولا ابيعها خرده ولا اعمل ايه؟
