السلام عليكم ورحمه الله تعالى وبركاته

وحووش الميجان عاملين ايه .. كل سنة وانتم طيبين وعيد سعيد علينا وعلى الناس كلها ..

من ٢٠٠٥ من ساعة ما الميجان نزلت مصر كنت بحب اشوفها جدا كنت ساعتها لسه في ثانوي :d وكنت منبهر بالعربية دي جدا وكانت بتنزل في جرنال السيارات وافضل كل شوية ابص عليها واقرا تفاصيلها .. و لحد دلوقتي بعشقها وكنت دايما بتمنى اني امتلك العربية دي .. على الرغم ان معايا سيتروين اكسارا عشان الماديات وكده .. بس الحمد لله ناوي ابيعها الفترة دي واخيرا هجيب الميجان ان شاء الله ومبسوط جدا والله !!
انا بقالي سنين في المنتدى هنا اكتر قسم متابعه بصفة مستمرة اكيد هو قسم الرينو .. وقريت كتير جدا من مواضيع و تجارب الوحووش عن الميجان على مر السنين .. وعارف انها عربية حساسه شويتين ..

انا في الطبيعي مش بمشي بالعربية غير لمشوار شغلي وبس ويمكن قليل جدا لما بخرج بيها او اعمل اي مشوار غير شغلي لاني مابحبش السواقه الكتير .. بس حاليا ولسبب الماديات برضو جاتلي فكرة اني اجرب موضوع " اوبر " .. واول عربية جات في بالي حبيبتي الميجان .. بس ساعتها قلقت .. اينعم انا عمري ما حطيت في دماغي كمية الاعطال والمشاكل اللي اتعرضلها وحوش الميجان هنا .. لاني قولت ان انا في الاساس مش بمشي بالعربية غير قليل فهي الي حد ما هتريحني .. بس لما اجي انوي اخوض تجربة زي اوبر دي .. اكيد ده الوقت اللي ممكن اراجع نفسي فيه كذا مرة ..لانها مش هتبقى عربية لمشوار الشغل بس .. فهل الميجان كفيلة انها تشتغل زي اي عربية كوري ياباني الماني زي اللي شغالين في اوبر حاليا ؟؟!

مش بتكلم في فكرة ان لو العربية اتحافظ عليها صح وبتعمل صيانة صح و في وقتها فهي كده تمام .. لاء .. انا اقصد العربية نفسها من ناحية اعطال مفاجاة كفيلة انها تمشي مثلا كل يوم ٦ ولا ٧ ساعات ؟؟ اللي خلاني اقول كده اني قريت ياما كتييير من ناس بتقف في الشارع بسبب اعطال طرمبة متكررة ، اعطال كهربا وميكانيكا ، علبة فيوزات ضعيفة ، ترس الديفيزر ، العربية مابتدورش اوقات كتير ، السخونية ، الرسايل اللي كل شوية تظهر على الرغم انها حاجه جميلة بس برضو بتخلي صاحبها قلقان وهو ماشي ، الخ الخ .. كل دي مشاكل عامة بيتعرضلها اصحابها يمكن بصفة شبة مستمرة الي حد ما .. فهل ده كله يخلي العربية دي تمشي بصفة دورية بمقياس ٦ ساعات مثلا يوميا ؟ ولا هي عربية الواحد يحمد ربنا انه راح بيها شغله انهارده ورجع بالسلامة ؟!

شركة اوبر كانت حاطة من ضمن العربيات الي تشتغل ميجان ٢٠٠٧ و ٢٠٠٨ .. انا عارف ان في تحسين دخل على العربية في الموديل ده .. وعارف انها عربية بريستيج عالي جدا .. بس خلاص هي عدى عليها ١٠ سنين واكتر .. ونزل الاحسن منها وشغال في اوبر برضو .. رغم انها في فئتها و رينج سعرها هتظل الافضل بس هل تبقى الميجان عربية تجعل صاحبها عاشق لها و متخوف منها ؟! مش هقيس اعتماديتها زي ما هقيس اللانسر والتويوتا مثلا ! بس هل هي تحت مسمى " عربية " تقدر تشتغل كل يوم عادي بدون ما صاحبها يحس انه لو راح بيها مشوار بعيد شويتين هيرجع يعملها صيانة تاني يوم !!

في ناس هتقولي دي مش تاكسي يا اخ انت وحرام عليك تشغلها ليل نهار دي عربية كيوت ومش بتاعت بهدله .. ايوة انا فاهم كل ده بس في الاخر اسمها عربية يعني يوم ما اعوزها في اي مشوار اي كانت المسافة والوقت يبقى لازم تكون اده ! وفي عربيات احدث منها وشغاله عادي ليل نهار مش بس في مصر ..

اسف ع الاطالة ..كان نفسي اشتري العربية دي في ظروف ا حسن من كده .. بس فعلا لما جيه الوقت عشان اشتريها لقيت نفسي هشتغل بيها .. و اهو يمكن تكون تجربة للميجان تحت الضغط !

الخلاصة عشان اللي مش فاضي يقرأ كل ده :d هل الميجان تصلح تشتغل في اوبر من وجهة نظر ملاكها .. وهل هي فعلا اعتمادية بشكل كويس ؟