الموضوع: الميجان .. العشق الممنوع !!

الغريب أن كل الردود مش من ناس ركبت ميجان أو تعرفها
ممكن تكون بتشوفها ماشيها ممكن تكون ركبتها مع صديق او زميل
أستاذي الفاضل ميجان عربيه عاليه جداً في فئتها
والغريب اني هقولك انها عربيه اعتماديتها عاليه بناءاً علي قطع الغيرا الأصليه أو اللي حضرتك بتوفرها
كسواقه عربيه مريحه فوق الخيال
قطع غيار متوافره بشده وادخل جروبات الميجان في الفيس وهتعرف اماكن كتيره جداً
ليه أوبر أختارت 2007 او 2008 لأنهم أفضل موديلات الميجان طالما صيانتها سليمه وبتتعمل عمرك ما هتقف بيها

المشاكل السابقه للموديلات السابقه
1- كنترول ( وحالياً ناس كتير حلته ومشيين بالعربيات عادي جداً موديلات 2005 و 2006 ومبقتش مشكله )
2- طلمبة بنزين ( وده عيب ممكن تقابله في أي عربيه طالما أن طلمبة البنزين في التانك وانت بسيب البنزين لحد ما يخلص وبعدين تفول يعني أخطاء طريقة تعامل لكن طالما أنت بتفول عند الربع أو أعلي أنساها تماما )

3- حساس كرنك ( وبرضه عيب موجود في عربيات كتير ) علاجه أبعد عنه الزيوت اللي ممكن تتراكم عليه وتتسبب في عطله

أتمني إني أكون أجبت علي الأسئله

أشتري ميجان حاله نضيفه وأركبها وأستمتع بيها غير كده زي أي عربيه مستعمله متبهدله هتتبعبك

السؤال الأهم ينفع تشتغل بيها أوبر
أعتقد الموضوع هيبقي مكلف اكتر لأنك بكده هتمشي كتير وبالتالي صيانات كتير
كحسبه أقتصاديه أعتقد مش موافقك فيها رغم إني أمتلكها من سنتين أو اكثر قليلاً

كسياره تمشي بيها مسافات عايز أقولك انا كنت مزنزق في شغل لمدة سنه مشيت بيها ما يصل ل 40000 كيلو وعمرها ما قالت لأ بالعكس كنت مستريح جداً

المشاركة الأصلية كتبت بواسطة simo4ever

استاذي الكريم .. اولا شكر خاص لحضرتك على الرد الوفير
ثانيا انا والله عارف انها عربية كويسة جدا ويمكن مشترك في اغلب جروبات الفيسبوك الخاصة بيها .. حتى فكرت اجيبها مانيوال يمكن اتفادى ولو ٢٠٪ من اي اعطال خاصة بالاوتوماتيك .. والله انا مش بعيب في العربية ربنا يعلم انا بعشقها اد ايه ونفسي اشتريها جدا .. حتى زميل ليا رشحتهاله وهيجيبها اليومين دول ان شاء الله ...
بس الفكرة حضرتك اني متخوف من حاجه .. لما اقارن جروب الفيسبوك للميجان وجروب تاني لبروتون مثلا ولا اي عربية في رينج سعرها .. بلاقي ان كل كام ساعه تقريبا ينزل بوست في جروب الميجان ان واحد عطلان او عربيته مابتدورش .. البوستات اللي من النوع ده كتير جدا جدا .. انا عارف ان لو صيانة كويسة مش هيحصل كده غير قليل وده طبعا نصيب .. بس مش لدرجة ان كل شوية حد يعطل وحد عربيته متدورش ويمكن اتكررت مع كذا حد كتير .. الموضوع ده قلقني جدا .. ودي النقطة اللي عايز اوصلها لحضرتك .. مفيش عربية مابتعطلش .. بس في عربيات اعطالها يمكن اكتر شوية من عربيات تانيه ..
انا بس كنت محتاج حد من ملاكها يشجعني او يديني بصيص امل ويقولي هاتها ومتخافش

علي فكره في العاده وقتي مش بيسمح بالردود الكتير أعذرني
بس ردك الجميل أجبرني أوفر وقت مخصوص ليك
عايز تركب عربيه بمعني الكلمه فكر في العربيات الأوروبي بصفه عامه لأنهم بيتعاملوا معاك أنك بني أدم
عايز تركب وتجري وتكسر اركب كوري
عايز تركب عربيه اقتصاديه فكر في الياباني ولو ان المعادله ديه اتغيرت حاليا

العربيه اللي أحنا بصدد الحديث عنها الميجان فعلاً عربيه بمعني الكلمه اشتريها عربيه نضيفه وحافظ عليها هتركبها طول عمرك وتستمع بأفضل عربيه في فئتها

جروبات الفيس كلها مشاكل 2005 و 2006 وده بسبب اما انك شاري عربيه بدون كشف أو استرخصت عربيه وفرحت بيها وكمان لغيت الكشف فادبست
والسبب الأكبر أن دول كانوا اول موديلات الميجان اللي أتلعب فيهم كتير لحد ما الصنايعيه بهدلوها العطل اللي ميعرفهوش يعمل كوبري ويمشي حال العربيه ويمشي الزبون يعطل تاني وهكذا
لكن حاليا أنا عايز اقولك انا كمالك للسياره دي حفظتها سواءاً علبة فيوزات أو أعطال عاديه
وأصبح حاليا ملاك كتير بنفس الحاله تابع جروبات الميجان تلاقي الناس بترد علي بعض ولو تابعت المشاكل هتلاقي عدد قليل اللي كل شويه داخل يكتب مشكلته وعطلان وفي نفس الوقت معندهوش ثقافة اخلص من العطل لأ تحس أنه مستمتع بيه

عامة أعطال الميجان أتحفظت عن ظهر قلب
لو راكب 2005 أو 2006 والكنترول عندك فيه مشاكل غير وحدة الكنترول وانساه تماماً
باقي الأعطال عاديه زي أي عربيه
طلمبة بنزين ( حافظ علي مستوي الربع في التانك وأنساها )
لو عندك مشكلة حساس كرنك وفي الغالب هتبقي مشكلة المالك السابق وبقول لو ظهرت عندك ( اشتري الحساس أصلي بالفيشه بتاعته من التوكيل وأنساه تماماً ) لأنه هيبقي عيب المالك السابق لأنه عمال يصلح ويعطل وفي نفس الوقت معندهوش أستعداد للتغيير
علشان كده دايما بنقول اكشف علي العربيه
الميجان عربية حد حابب يركب عربيه نضيفه ويحافظ عليها

الجميل لسه شايفها أمبارح واحد مشغلها تاكسي كان نفسي أوقفه علشانك وأسأله بس للأسف الظروف مكانتش تسمح