ممكن نعرف من الاعضاء تجربتهم الشخصية فى الموضوع دة؟
ممكن نعرف من الاعضاء تجربتهم الشخصية فى الموضوع دة؟
السلام عليكم
في مصر الدافع الأول لإنتشار أي حاجة مش بس العربيات بيكون التقليد
يعني لو مزل نوع عربيات كويس مثلا الناس هاتفضل تجيبه للأبد حتى لو نزل حاجة تانية احسن نتيجة تطور التكنولوجيا او الصناعة برضه الناس هاتفضل عالقديم اللي حافظين انه كويس
ياراجل دا في ناس لسة بتدور على تليفزيونات ناشيونال مع العلم ان اسمها بقى باناسونيك
يقوم التجار يستغلوا نقطة الضعف دي عند الشعب ويعملو منتجات ناشيونال مضروبة (ناشيولان وناسيونال) وخد من ده كتير
الناس في البلد حافظين مش فاهمين
باتفقع لما الاقي واحد مثلا بيقولي انا عندي لانسر بومة
اسأله 1600 ولا 1300 يقولي مش عارف بس هي لانسر
واحنا في مصر ملوك التقليد من غير وعي ولا دراسة
واحد يفتح بقال 20 واحد يفتحوا حواليه
بين كل صيدلية وصيدلية 50 متر
واحد يسرق علامة Vw ويحطها عالتاكسي تبقى مذبحة علامات وكل التاكسيات الشاهين تبقى Vw بقدرة قادر
واحد يشتري بنطلون كل اصحابه يجيبوا من نفس النوع
اسف للإطالة
==
عمرو
==
اعتقد ان اتشارها دليل على تميزه في كذا حاجة
لام الدعاية والاعلان لوحدهم مش كفاية لو المنتج نفسه سيئ
التقليد اكتر حاجة بتضايقني في حياتي
وبصوا على التوقيع بتاعي وانتوا تعرفوا اقصد ايه
التقليد حاجة تخنق
انا بعتبر الإنسان المقلد إنسان يعيش على إبداعات وافكار الأخرين ولاغي عقله
واحد فتح محل بقال، تلاقي 20 واحد فتح حواليه
واحد جاب بنطلون كل اصحابه يجيب زيه
بين كل صيدلية واللي وراها 50 متر
وامثله كتير
والله لما بشوف واحد راكب سوبارو ولا فولفو ببقى عاوز اخده بالحضن واهنيه على شجاعته
اللهم اشفي المصريين من امراض التقليد زي اللانسريزم النوكيافرانيا
انا واحد من الناس المصابة بالنوكيافريزم حسب تعليقك و مش شايف ان دة غلط... طالما التليفون عاجبنى و شغال كويس يبقى ايه المشكلة انى اشترية؟؟
انا اعتقد ان من الغباء انى الاقى سلعة تؤدى الغرض المطلوب منها بكفاءة و بسعر مناسب و مشتريهاش لمجرد انها منتشرة مع كل الناس
MMamdouh
الشعب مالوش غير فى 3 - 4 عربيات اللى همه ليهم احسن سعر فى اعادة البيع (نجوم شباك).
غير كدة (الكومبارس) فين و فين لما عربية منهم تبتدى تاخد ادوار البطولة.
يا جدعان هو ليه احنا ربطنا انتشار اى عربية بان اللى جايبنها ناس غنم؟؟ (دى النتيجة الوحيدة لوصفهم ب"القطيع")
هو عشان فيه عربية او اى سلعة منتشرة فى السوق يبقى الناس بتشترى اى حاجة و خلاص؟؟
و لو واحد اشترى حاجة محدش يعرفها ولا سمع عنها يبقى دة اللى مفيش زية؟؟
ما يمكن السلعة اللى منترة اوى دى تكون فعلا حلوة جدا و احسن من الموحود فى السوق و بالتالى نتشارها يبقى امر منطقى و طبيعى
و يمكن السلعة النادرة اللى مع ناس قليلة غالية جدا او بتخدم غرض معين مش مطلوب عن كل الناس... او يمكن الناس اللى اشترت السلعة دى اساسا مبتفهمش
مينفعش نعمم المبداء دة اساسا لان انتشار سلعة ملوش علاقة بسياسة الغنم ولا القطيع دى... من الطبيعى ان السلعة الممتازة تكتسح السوق و مش معنى انى اشتريت حاجة منتشرة انى ابقى عضو فى "القطيع"... و مش معنى انى اشتريت حاجة مش منتشرة انى انا العبقرى اللى بفهم فى كل حاجة
موضوع الشراء فيه عوامل كتير جدا منها القدرة المالية للمشترى و توافر قطع الغيار و تكاليف الصيانة و استهلاك البنزين و سعر اعادة البيع
لو واحد معاه BMW M3 مقدرش اقول عليه انه مبيفهمش... دا يبقى راجل استاذ و رئيس قسم... بس فى بلد تانية مش مصر
لان ببساطة لا سعر العربية و لا تكاليف بنزين العربية و لا صيانتها يقدر عليها اى حد ولا قطع غيارها منتشرة مقارنة باى عربية تانية و اكيد اكيد لما تتباع حيخس تمنها كتير اوى و حتاخد وقت فى البيع
معنى كدة ان العربية دى مش مناسبة لمصر ولا لكل المصريين (يعنى محدش يحلم انة يصحى الصبح يلاقى البلد كلها M3) و بالتالى العربية مش من عربيات "القطيع" زى ما بتقولوا و عمرها ما حتتنتشر تحت لظروف الحالية للبلد و الشعب... اذا قرار شراء العربية دى قرار خاطىء 100% طالما انت من عامة الشعب
تعالى بقى لعربية تانية مش من عربيات "القطيع"... حد سمع عن العربية الاولست؟؟
دى عربية لقيطة ظهرت فى السوق المصرى من حوالى 10 الى 12 سنة كدة و كان سعرها فى الارض و تقريبا 1300... يعنى فيها كل مواصفات العربية العملية للشعب... العربية دى ممشيتش خالص لانها برضة ملهاش توكيلات و لا قطع غيار و كل سن و انت طيب لو فكرت تبيعها... اذا الناس مبتشتريش اى عربية رخيصة و خلاص
عربية تانية مش من عربيات القطيع هى الفولو.... حد يقدر يقول على الفولفو وحشة؟؟؟ دى اكتر عربية امان فى العالم... تعرف مش منتشرة فى مصر ليه؟؟؟... من بق واحد شغال مبيعات فى فولفو "الفولفو لو اشتريتها زيرو و جيت تبيعها بعد سنة تخصر نص فلوسك"... طبعا العربية مش رخيصة بالتالى "نص فلوسك" دة مبلغ محترم مش اى حد يقدر يفرط فيه لمجرد انه عايز يبقى اسمة راكب فولفو
عربية كمان مش من عربيات القطيع و هى السوبارو... و اعتقد ان كلهكم شوفتوا الموضوع بتاع الزميل اللى حصل معاه مشاكل فى عربيتة و التوكيل شخصيا قال لة ان العربية ملهاش قطع غيار عندنا و حاجات كدة غريبة... مينفعش اقول على عربية كانت مكتسحة بطولة العالم للراليات فى التسعينات انها وحشة... لكن لما حتى توكيلها ميعرفش يصلحها تبقى متنفعش عربية للشعب
تعالى بقى شوف العكس... عربية زى الماتركس ( و محدش من المتركساوية يزعل لانى مش قاصد اى اانة لحد فيهم)... العربية لا يختلف عليها اتنين انها منتشرة فى مصر
العربية دى لا باين لها هى ميكروباص ولا MPV ولا اى حاجة... تركبها تحس بوسع غريب فق دماغك و تحس انك فى الصحراء الغربية... لكن ممكن جيب بنطلونك يبقى فيه وسع اكتر من شنطتها
ناس بتعتبرها انها بديل للعربيات ال 4x4 بالرغم من انها جر امامى و 1600 و مش عالية عن الارض... ناس بتعتبرها عربية شبابية رياضية على الرغم من ان مركز ثقلها يجى متر عن الارض و ناس بتعتبرها عائلية على الرغم من ان مفيهاش شنطة... العربية دى انتشرت لانها بتؤدى غرض (لا يعلمة الا الله ثم اصحاب العربية) و ليها قطع غيار و صيانتها مش مكلفة و سهلة فى اعادة البيع
تعالى للانوس.... نص مصر معاها لانوس.... هل هى احسن عربية فى العالم؟؟؟ لا طبعا... هل هى احسن تكنولوجيا؟؟؟ لا طبعا... امال الناس ماسكة فيها ليه؟؟؟؟ ارجع لقسم الدايو و افتح الموضوع بتاع قطع الغيار حتلاقى انك ممكن تجمع عربية من قطع الغيار بتكلفة سرفيس لعربية BMW... و لو فكرت تبيعها حتلاقيها اتباعت قبل ما تكمل تفكير اصلا فى الموضوع
اللانسر و الكورولا... هل هى عربيات وحشة؟ ... البى ام و المرسيدس... هل هى عربيات وحشة؟؟.... طيب مهى تعتبر عربيات قطيع زى ما بتقولوا بس لانها عربيات حلوة و تناسب السوق و حاجة الشعب انتشرت... و دى مش حاجة عيب فى حق الشعب
النيسان الالتيما وحشة؟ الكابرس وحشة؟ السوبربان وحشة؟؟... طبعا لا بس العربيات دى متناسبش البلد و الناس بالتالى مش منتشرة... يبقى لما انا اشترى عربية من دول يبقى ماخدتش قرار صح الا لو العناصر اللى سبق و كتبتها متفرقش مع متخذ القرار
من الاخر مش معنى انى راكب عربية مع كل الناس ابقى "واحد من القطيع" و مش معنى انى راكب عرية مش موجودة انى انا مميز... شراء عربية اعقد بكتير من مجرد عملية انتشار و تفرد.. قرار الشراء لازم يبقى منطقى و عقلانى قبل اى شىء
فى النهاية الموضوع دة بيفكرنى بنكتة قديمة..." مرة واحد بلدياتنا رايح حفلة تنكرية قطع دراعة"...
اهو دة فعلا مش ماشى ورا القطيع و عمل حاجة مميزة جدا... بس مش حيعرف تكلفة العمل دة الا لما الحفلة تخلص
MMamdouh
لا بيقلدوا بعض
في مصر الشكل الخارجي مهم عن الامكانيات و الخليج الموتور القوي و الكماليات
في اوروبا السياره العمليه في امريكا مش بتفرق علشان عربيه عائليه و عربيه الشغل و الواحد بيجيب اكتر من عربيه
هو انتشار السياره فى مصر يعنى قطع غيارها متوفره ورخيصه
والميكايكيه ليها كتير كمان لكن بصراحه فى عربيات كتير منتشره
وهى فى الاصل مش كويسه زى الشاهين مثلا عربيه جديده طراز قديم
وناشفه وتحس فعلا انك راكب عربيه قديمه لكن انتشارها موفر قطع غيارها وارخص من قطع غيار ال128 وميكايكيه وخدمه فى كل مكان وده اللى بيخللى ناس كتير تشتريها بس مش علشان ادائها
لكن عندك مثر عربيه زى الفورد سكروت عربيه ممتازه فعلا فى الشكل والاداء والرفاهيه لكن فلة انتشارها تسببت فى قلة قطع غيارها وغلائها بشكل غير عادى وميكانيكيه غير متخصصين طبعا
مما ادى الى انخفاض سعر السياره نفسها وصعوبة بيعها مع انه احسن من الشاهين بمراحل عديده طبعا
فعلا فى مصر معظم الناس يتقلد تقليد اعمى
انتشار العربية يعنى انها كويسة وقطع غيارها رخيصة ومعمرة
انا بقول اننا اساسا بنبص اول حاجه على السعر بمعنى انا لو معايا 150 الف يبقى ممكن اجيب كرولا او ماذدا او شارك مثلا واقارن بينهم فى الاداء والكماليات والساوند سيستم والمنشأ
ولو معايا 10000 يبقى 127 او 128 تعبانه او داتسون او نيسان قديمه
طب هل هافاضل بينهم فى الاداء ولا قطع الغيار ؟
هاقول يا عم اهى اى حاجه ربنا يرحمنى بيها من المواصلات وهاتغاضى عن الاداء بس ههتم بقطع الغيار.
طب معايا 5000 هاجيب سيات وادور اشحت بيها على الميكانيكيه
يبقى الاختيار على اساس السعر اولا
وطبعا انا مؤمن اننا شعب ناصح مش مبيفهمش وبيقلد وخلاص عشان كده مش هاشترى صينى مثلا بكماليات عاليه لكن هاجيب لانوس فاضيه عشان العربيه لو معرفش عنها حاجه بتبيع من 99 ولسه الناس بتشكر فيها لكن الصينى لسه محدش قال رايه بحياد تام او عن خبره فى الاستعمال وده رأى شخصى
تحياتى
المشكلة عندنا في مصر ان ناس كتير مش فاهمة وبتفتي ولما تيجي تكلم معه يؤلك انا سمعت كدا
نفسي اعرف بيسمعوا من مين
ويؤلك العربية دية تحفة عشان مجرد شافها في الشارع والناس غالبة بيسدؤا اي حاجة
روح اتفرجوا علي مندوبين بيع العربيات بيعملوا اية في الناس عشان يبيعوا ويكسبوا ويخلصوا المخزون اللي عندهم من العربيات وتسمع كم من الحلفنات المغلظة ان هو مش كسبان حاجة وكل للة
الإستطلاع لم يعطني خيار آخر فاضطررت للإختيار الثاني و إن كان رايي مختلف عن الخيارين.
فشعبنا أكيد بيفهم و آسف على اختيار أن الشعب لا يفهم
و لكن انتشار سيارة ما ليس دليلا قاطعا على أدائها الخارق و لكن ربما لإنخفاض سعرها مثل 128 مثلا طوال العقود الماضية و هي واحدة من اسوأ السيارات في العالم.
أو لوجود وكيل قوي اسنطاع أن يبيع أعداد قياسية منها مع صيانة و قطع غيار في متناول يد الجميع كما في حالة غبور مع هيونداي اكسيل في التسعينات مثلا وإن لم تكن سيارته تلك هي افضل ما في السوق.
أستطيع من هنا أن أصف الكثير من صناع السيارات المحترمين في العالم بالغباء لأنهم اعتمدوا على وكلاء غشاشين همهم الأول هو الكسب الفاحش دون العمل على مصلحة الماركة التي هم وكلاء لها.
خير مثال على ذلك هي كيا السيارة الأفضل في كوريا و لكنها الأقل مبيعا في مصر لأن الوكيلين الذين أخذا توكيل كيا على مدى العقدين الماضيين أسوا من بعضهما.
و بالتالي فقدت كيا المنافسة أمام مواطنيها هيونداي و دايو رغم انها أفضل منهما.
أهم حاجة تكون رخيصة و مش مهم إنها بتعطل كتير طالما قطع غيارها موجودة و رخيصة
كلام مضبوط 100% زي ما بتقولو عن سياسة السير مع القطيع...فيه كمان الذكاء الجماعي ومتحسش بكده الا لما تبص للموضوع من جانب واحد يعني لما تتورط في عربيه اعتماديه وسعرها معقول بس مش منتشره وبعدين تعوز قطعة غيار او تعوز اصلاح سريع ومتلاقيش حد فاهم حاجه فيها وتلاقي قطع غيار نار ومش موجوده او انتشارها محدود لازم يطلع روحك علشان تلاقيها, او لما تيجي تبيع وعاوز تسترد اكبر قدر من فلوسك و متلاقيش اللي يشتري (بسبب ان الناس اللي هتشتري مش فاهمه او مش عارفه اللي انت عارفه) مشكلة الشعب المصري محدودية التعليم (او لو وجد سوء النوعيه) و بالذات في اللغات العالم بيتكلم بلغه احنا مش فاهمينها وهما اللي بيعملولنا العربيات اللي احنا بنركبها بس احنا منعرفش هما بيقولوا ايه, ولو شفتم الاعضاء المتميزين في المنتدي تلاقيهم لغتهم قويه جدا علشان كده منفتحين ومطلعين وبيقولوا كلام بنفتح بقنا لما نقراه, عرفوه منين (وحي ولا قرايه لمواضيع ومواقع اجنبيه)