السلام عليكم....
انتشار العربية يعنى ان العربية ذات اداء كويس و تستحمل و لا الشعب مبيفهمش حاجة ؟
قول رأيك مع التصويت
السلام عليكم....
انتشار العربية يعنى ان العربية ذات اداء كويس و تستحمل و لا الشعب مبيفهمش حاجة ؟
قول رأيك مع التصويت
انا رايى
الاتنين
هديك مثال
الفيرنا عربية كويسة مش وحشة ةشغالة وحمارة شغل وتروح بيها هنا وهنا مش هتقول لا
واحد لما يشوف زميلو جاب فيرنا ..يقول انا هجيبها انا كمان مهى شغالة مع زميلى اهة (مع انو مبيفهمش فى العربيات ولا يعرف انها 1600 ولا اى حاجة ) انا اعرف ناس كدة كتير
العربية ذات اداء كويس
لإن بصراحة مستحيل واحد هيدفع مبلغ كبير في سيارة من غير مايعرف إمكانياتها
وومميزاتها وعيوبها ومستحيل هيشتريها لمجرد انها منتشرة
على حسب ثقافة المشترى ولكن فى مصر هنا اعتقد ان جانب التقليد (يقولك زيك زى الناس) هو الطاغى على جانب اداء العربية وجودتها يعنى تلاقى الناس كولها جابت النترا يقوم لو جيت تسال حد اجيب اية يقولك النترا طبعا لمجرد انها منتشرة ودة ليس تقليل من الالنترا
اؤيد هذا الراي بشدة
انا مع رأيك تماما
لان معظم الناس مش هاويه عربيات ولا كماليات ولا الكلام ده كله
بالعكس معظم الناس بيشتروا العربيه عشان تقضي الغرض
وكمان اكتر ناس عليهم عامل كبير لانتشار العربيه هما المعارض
لانك ممكن تروح تشتري العربيه (ايا كانت ) تلاقيه بيطلعلك فيها (القطط الفاطسه )
وطبعا انت لما تلاقي العربيه مليانه عيوب !
فورا تقوله طيب انت رأيك ايه ؟
انت شايف ايه مناسب & طيب ايه بالسعر ده كويس
وكده يبقي وقعت يا حلو وفي الاخر هتشتري العربيه اللي هايقنعك بيها
مش العربيه اللي انت عاوزها .
وطبعا هايقولك عيوب العربيه ديه عشان يوريك انه محايد وعاوز مصلحتك
ابسط حاجه يمسك فيها قطع لغيار
طبعا هوا عارف كام قطعه كده (سعرها ) يقولك عليها
ويقولك ايه بقي ّ!
انا مش فارقه معايا انا عندي العربيه ديه و العربيه ديه
وطبعا تقتنع بسرعه
(وتقول في سرك( الله صحيح هوا مصلحته ايه يعني الراجل خايف علي فلوسي )
عشان كده لاازم لازم اللي عاوز يشتري عربيه يكون عارف هوا عايز ايه احتياجاته منها
وبعدين اسأل عن العربيه
ايه ممزاتها وايه عيوبها
وابدا اشوف العربيه ديه عيوبها هتفرق معايا ولا لا (زي البنزين :مش بيفرق مع ناس كتير لانه بيبقي الفرق بسيط )
:U_thin1[1]::U_thin1[1]::U_thin1[1]:
اهم عامل الناس بتشترى على اساسه فى مصر هو انتشار العربية
و الهدف هو انتشار و رخص قطع الغيار و انتشار مراكز الخدمة و سهولة اعادة البيع و حفاظها على تمنها مستعملة
بس تقدر تقول ان 80% من العربيات المنتشرة عربيات عملية و محققة المعادلة الصعبة ( متانة , سعر , اعادة بيع, الخ)
الشعب مبيفهمش.
و هو دة اللى بنقول علية: "رزق الهبل على المجانين"
[align=center]نحن شعب يفتقد الوعى الكافى للحكم على المنتجات وبيعتمد على انتشار السلعة وبيعتبر الانتشار ده دليل على كفأتها ونجحها .......[/align]
مع أحترامى لكل الأراء و بدون مهاجمة موديل معين.
انا مش فاهم الناس اللى بتقول الشعب المصرى مبيفهمش ولا بيشترى عميانى....لية بيشترى عجلة ؟!؟!؟.
زى لما حد يقول العربية دى منتشرة فى مصر بس لكن فاشلة برة أو العكس. كل بلد و ليها العوامل الخاصة بيها...السوق الأمريكي غير الأوروبى غير الخليجى.
و مش كل الشعب عاوز يشترى عربية عشان التميز ولا الاداء.
لو عربية أعتمادية و مريحة هتنجح و تنتشر و العكس صحيح.
سهلة يعنى.
فى رأى ان الأنتشار خير دليل عن أعتماديه السياره والأمثله كثير ولكن ايضا تدخل عده عوامل أخرى السعر كلما قل كلما زاد الأنتشار
سعر الصيانه كلما قل كلما زاد الأنتشار
وبعد ذلك السيارهتسوق لنفسها ويستغل التوكيل ذلك يقوم ايه .....رافع السعر يقوم ايه ...... تهبط مبيعاتها من جديد
وأكبر مثال على ذلك هيونداى
أما بالنسبة للاستطلاع لإانا محتاج اختيار في النص.
الناس بتفهم بس المثل بيقولsomebody's meat is some other's poison
أعتقد أن الشعب المصري بيحب يمشي بسياسة القطيع .. ومش مهم يعرف إيه اللي هيشترعه ... المهم يمشي وخلاص
عشان مبيحبش يخاطر وده سببه زياده أسعار السيارات في مصر والإهتمام بسعر إعادة البيع
ليه ياجماعة معتبرين الشعب مبيفهمش؟ ليه دايما كمصريين نحب سياسة جلد الذات و إننا وحشين و كل الناس بتفهم عنا و أحسن منا؟
مهو المنتدى هنا فيه فوق العشرين ألف شخص و يمثلوا شريحة هي كريمة المجتمع المثقف في مصر و جزء كبير منهم على أعلى مستوى من المعرفة بدنيا السيارات زي سبعاوي و محمد ممدوح و FlyingPeugeot و غيرهم و غيرهم من الناس اللي بيعقدونا دول :B4_611:؟
و موضوع إن موديل معين ينتشر في بلد دا راجع لمقاييس كتير مش منها إن الشعب مبيفهمش .. زي مثلاً الدخل في البلد و سعر و إستهلاك البنزين و طبيعة الشعب نفسه ... يعني مستحيل عربية زي الكابريس المنتشرة في الخليج تنفع في مصر.. مش معنى كدة إنهم بيفهموا و إحنا لأ.
بالنسبة لإنتشار موديلات معينة أنا شايف إن في شريحة كبيرة جداً من الناس مش بتفكر في الثبات على 190 كم/ساعة و إن الموتور الجبار لازم يطلع 800حصان و إن العربية لازم تقول بابا و ماما ...لكن بتفكر بطريقة منطقية و عملية جداً إن العربية وسيلة مواصلات للفرد و أسرته و يا سلام لما تبقى مريحة و مكيفة و بس خلاص.
فبالتالي لما الناس تلاقي اللانوس و الفيرنا منتشرين و ماليين الشارع و بدون مشاكل و أسعارهم مناسبة و كمالياتهم معقولة جداً ومراكز خدمة منتشرة و قطع غيار متوفرة و رخيصة.. أعتقد دي أسباب كافية إنهم يشتروا عربية زيهم، و أقول عليهم أذكياء جداً و إختيارهم صح 100%.
أعتقد أن مستوي الدخل بيؤثر في الشراء
يعني لو مستوي دخلنا زي دول الخليج
أنت اللي هتختار السيارة
لكن في حالتنا السيارة هي اللي هتختارك
أنا رأييى إن إنتشار العربيه معناه إن تمنها مناسب لما تقدمه من إمكانيات وأنها قليلة الأعطال نسبيا (الأعطال التى تسبب توقف السياره وليس أعطال العمر الطويل)
العربية ذات اداء كويس
و أنا مع الإختيار الأول " العربية ذات أداء كويس" و فى نفس الوقت عايز اقول ان انتشار العربية مش مؤشر كافى ...
مع وجود بعض الإستثنائات زي ما حضراتكم قولتوا ...
شكراً
هوا الدخل يا جماعة مش بيدى برده مساحة كبيرة فى الاختيار فالواحد بيختار احسن حاجة فى السعر ده و مع ارتفاع الجمارك عندنا كمان مكملها, علشان كده بلاش نظلم الشعب و الله انا كنت بفكر ان الشعب مش بيفهم بس صعب عليا الشعب ( الاغلبية يعنى) حرام منبقاش احنا و الاسعار ز:36_7_4[1]:
بس مننكرش برده ان فيه اقبال ساعات على موديلات من باب القليد بس و متهيألى دا عادى فى كل الشعوب .
السلام عليكم
انا رائى ان التقليد هو سمة اصيله فى الشعب المصرى لا استطيع ان اعمم لاكن الشريحه الكبيرة من المجتمع
لو لاحظتو مثلا هتلاقو العربيات الفيات منتشره بكثرة مش علشان هى كويسه بالعكس البلد اللى صنعت الفيات فى الاصل اوقفت كذا موديل منها من الثمانينيات تقريبا ولاكنت لازالات تصنع فى مصر وحتى العربيات اللى فيها مشاكل مصنع النصر بيصنعها كل سنه بمشاكلها دون ان يلفت لتفادلى العيوب والناس برده بتشتريها مش عارف ليه مثلا كله بيشكر فى الشاهين
وكل واحد او مابيفكر يجيب عربيه مستعملهبيفكر بنسبه كبيره فى الفيات 128
لو بصينا حتى على التليفونات المحموله كل الناس عايزه نوكيا مش علشان نوكيا هو الافضل فى ماركات تانيه جيده جدا لاكن هنعمل ايه
حتى نظارات الشمس مثلا لما حد من المطربين يلبس نظاره فى فلم او اغنيه اغلب الشباب يشتروها حتى فى مجال الكمبيوتر تلاقى الواحد بيبالغ فى المكونات بدون مايعرف هى ايه فايدتها
علشان مانطلعش من الموضوع مش كل عربيه منتشره فى جيده
ومن الخطا ان الواحد يعمل حاجه علشان كل الناس عملاها
انا رائى بالذات فى شرا العربيه ماتشتريش عربيه علشان فلان جايبها
الافضل ان الواحد يشوف ايه احتياجاته ويحدد كذا نوع بنفسه وبعدين يعمل عليهم دراسه من ناحية اولا السعر وقوة الماتور والعفشه واتساع السياره من الداخل واستهلاكها للبنزين والشكل الخارجى
وبعدين يقرر يشترى
مع احترامي لكل الآراء... بس دايما في نطاق كل فئة سعرية... بيكون فيه عربية أي كلام و عربية كويسة جدا (و عيبها الوحيد انها مش منتشرة - زي السوبارو و السيريون في الفئة الأقل شوية ... على سبيل المثال لا الحصر)
و دايما اللي معاه الفلوس بيختار العربية المنتشرة مش الكويسة
طبعا الشعب المصري مبيفهمش حاجة
وأكبر دليل العربية إياها المشهورة إللي فشلت فشل الفيل في العالم كله باستثتاء المحروسة و بتحرق دمي كل أما أشوفها في الشارع
مين اللى بيقول الشعب مبيفهمش دا
للاسف هو اللى مش فاهم شوفوا تمن العربيات هنا ودخل الناس ياجماعة
يعنى لو معاك 100 الف مصرى وقااعد فى اى حته فى الخليج ممكن تشترى ايه سواء مستعمل لان سوق المستعمل هناك ببلاش
اما فى مصر فانتوا عارفين بقا ...
موضوع شراء سياره فى مصر
بيعتبر شىء محفوف بلمخاطر ودا لان السيارات سعرها و سعر صيانتها يعتبر مرتفع جدا نظرا لدخول معظم الافراد فى مصر
فكل واحد بيشوف ابوه ولا اخوه و لا صاحبه او جاره شاريه ايه و يشترى زيه
يعنى كام واحد فى مصر بيدخل يقرى ريفيوهات عن العربيه اللى عاوز يشتريها فى مواقع اجنبيه معتمده و تقيماتها و الكراش تيست بتاعها فى النت
و بلاش كل دا يسوقها قبل ما يشتريها
معظم الناس بتشترى على السمعه حتى لو عربيه مبالغ فى سعرها و مسروق فيها عينى عينك زى الانسر البومه مثلا حققت انتشار عجيب مع ان سعرها كل شويه بيزيد ليه !! متعرفش ودا بسبب الاقبال عليها مع انها مثلا فى امكانيات عربيه زى البروتون واجا او الكيا سيراتو
الناس بتروح لثلاث حاجات
1-عربيه تكون مش معقده و قليله الاعطال
2-قطع غيرها فى المعقول والعربيه نفسها سعرها معقول
3-سعر اعاده بيع عالى وده الى بيحدده سمعه العربيه فى السوق
اذا تجمعوا الثلاث حاجات دول فى عربيه لازم العربيه ده تنتشر , وده بيرجع لظروف الناس يعنى واحد فاتح بيت ودخله مكفيه بالعافيه وفى نفس الوقت محتاج عربيه علشان تحفظ كرامته امام وظيفته مثلا ده ليه يجيب عربيه ميكنش فيها الثلاث حاجات الى اغلبيه الناس بتروح ليهم خصوصا ان اغلبيه عربيات الفئه الواحد الفرق بينهم فى الاداء مش جبار يعنى كلها فروق طفيفه
انا هقول رأيى
الناس هنا فى مصر بتمشى ورا الكلام والانتشار
ممكن كلامى يكون موافق على ان (الشعب مش بيفهم حاجة)
بس انا متفق مع الجملة دى بنسبة 50 فى المية
اولا لو بصينا للعربيات اكثر انتشارا فى مصر ودا على سيبل الذكر مش الحصر
1- التويوتا كورولا
2- المتسوبيشى اللانسر
معلش العربيتين دول اقل سعر فئة فيهم 90 الف جنية
الشعب مش اهبل برضو عشان يدفع 90 الف جنيه فى عربية تعبانة
طبعا العربيتين دول مش محتاجين كلام من العربيات اللى اثبتو كفاءة عالية حتى مواتير ال 1300 سى سى
رغم انو مش اهبل بس غبى ومش بيفهم ان ممكن بال90 الف يجيب عربية تانية احسن واقل انتشار واحسن فى الامكانيات واقل فى السعر كمان
زى الجين 2 - السيراتو - الصنى - الاوبترا......... وغيرهم
الشعب المصرى من الاخر
(بيجرى ورا الحاجة الحلوة المنتشرة وهوا مش فاهم هيا حلوة ليه)
وعلى فكرة فيه عضو ذكر حكاية الدخل
انا متفق معاه ان لو الدخل عالى مكناش قلنا على الشعب اهبل
فيه نقطة تانية
الطبقة المتوسطة اللى عندها عربية جديدة واحدة او عربية جديدة وعربية تانية قديمة(دى طبقة واسعة وكبيرة جدا)
هوا معاه كام 100 الف عشان كل شوية يجيب عربية
هوا بيدور على عربية اعتمادية تقعد 5 او 10 سنين متقولش لأ
ودى تجربة فعليه لما والدى قرر يجيب اللانسر عشان اعتمادية وسهلة الصيانة وقطع غيار منتشرة
بس الخلاصة
الشعب المصرى 50 فى ال100 اهبل!!
واسف للتطويل
بالنسبة للمستعمل:
اللادا قيمتها في انجلترا 200 جنيه استرليني أو 2200 جنيه مصري. ليه تتباع هنا مستعمل ب10 أضعاف السعر؟
اللانسر الكريستالة بتتباع في السعودية ب10 آلاف ريال أو 15 ألف مصري. ليه تتباع هنا ب55 ألف؟
بالنسبة للزيرو...
ازاي احنا لحد دلوقتي بنشتري لادا 2107 و 128 و شاهين زيرو؟؟؟
ازاي الصيني وصل لنفس سعر الكوري؟
ليه العربيات المبالغ جدا في سعرها (هيونداي بأنواعها, تويوتا كورولا/ياريس, ميتسوبيشي لانسر) هي نفس العربيات اللي مالية شوارعنا؟
غير كده خالص. ليه احنا لزقنا في موبايلات معينة دون غيرها (6600, 7610, 6630, N73, N70 مع انهم طول عمرهم كان سعرهم مبالغ فيه مقابل امكاناتهم.
ليه احنا من ساعة ما طلع حاجة اسمها كمبيوتر و لغاية سنتين فاتوا مكناش نسمع عن بروسيسورات غير من انتل, بينما طول الفترة دي كانت AMD أحسن منها مليون مرة.
ليه الرؤساء الأعزاء بتوعنا...واللا بلاش...
كشعب مصري, طبيعتنا اننا نخاف من التغيير عن اللي احنا متعودين عليه, و اننا نختلف عن الناس اللي حوالينا حتى لو كنا شايفين انهم غلط. عشان كده انا بنفضل زي ما احنا و بنخاف نجرب أي حاجة.
بس المنطق ده منفعش يتطبق دلوقتي لأن الانترنت فيه مصادر بالهبل عن جودة السلع المعروضة و مدى جدواها مقابل سعرها.
انا صوت ل الشعب مابيفهمش حاجه , و بلاش نمشى وراه .
احنا هنا ماشين بسياسه القطيع
طلاما عتريس و فهمى و عادل جابو كذا يبقى اكيد الكذا ديه 100 100 , خلينى يا عم فى المضمون و اجيب زيهم علاشان ماندمش بعد كده .
صباح الخير ... الدنيا مش ماشيه كده , احنا بس الى ماشين كده .
معندناش ثقافه التحرى عن المنتج الى نازل ده هل هو كويس او وحش ...... و ايه مميزاته و ايه عيوبه و هل مناسب ليا ولا لا .
بنشترى زى باقى الناس
و بنركب عربيات زى باقى الناس
و بنلبس لبس زى باقى الناس
مافيش اختلاف .
Mohab Saeed
بما ان حضرتك معاك بروتون ( عربية الشعب مش عارفها كويس ) فأنا فاهم وجهة نظرك...لأنى تقريبا ماشي كدا برضه بس فى الموبيلات ( مبحبش اشترى نوكيا اللى هابلة الناس من غير ما يفكروا ) لكن فى ماركات احلى لكن نحدش عارف حاجة :)
تحياتى :)
فعلا زي ما رد احد الزملاء كل بلد ليها ظروفها و ليها امكانياتها علي حسب.
و بعدين احنا هنا عادة في مصر فعلا بنمشي ورا العربية المنتشرة (وده برضه مش عيب لاني إنتشار العربية يعني نجاحها بنسبة كبيرة) بس برضه انا شخصيا مش اي عربية منتشرة اشتريها (مع احترامي للجميع و بدون ذكر اي ماركة) يعني ممكن تكون العربية دي معروف انها مش تمام بس ناس اشتريتها نظرا لظروف اقتصادية او واحد عايز يركب عربية و خلاص او واحد اسف في الكلمة ملوش فيها و جات له فلوس علي غفلة فحب يركب عربية فنزل الشارع و شاف ايه اكتر عربية ماشية و راكنة و راح رايح اقرب معرض و بس.
و ياريت مننساش اني في عربيات محترمة كتير انتشرت عشان الظروف الاقتصادية و عشان سمعتها الجيدة برضه زي مثلا اللادا و الشاهين و الفيرنا و الفيفا و اللانوس و هكذا.......
لكن مش معني كدة برضه انه الشعب كله مش فاهم حاجة و اني المصريين كلهم في الطراوة لما احنا نقول علي نفسنا كدة يبقي لما غيرنا يقول علينا أكتر من كدة يبقي منزعلش منه مش كدة و لا ايه؟؟
اعتقد قرار شراء سيارة معادلة من عدة اطراف
جودة + شكل + أداء + سهولة صيانة و توافر قطع غيارو إعادة بيع (انتشار ) + توكيل قوي
مقابل سعر معين
اعتقد السيارات المنتشرة بتكون اكثر سيارة محققة المعادلة في فئتها
انا احترم تماما ذكاء المستهلك المصري و من الآخر هوا اشطر زبون
و ماننساش ان العربية بتنتشر لما انا و انتا و غيرنا نشتريها
يعني المستهلك بالاضافة للتوكيل هوا اللي بينجح او بيفشل المنتج ،،
بس يمكن اطراف المعادلة الاقتصادية بتكون اقوي اطراف المعادلة
على فكر المقولتين صح على حسب دماغ الى بيشترى
عايزين نعرف هل انتشار سيارة معينة يعنى جودتها وانها حازت ثقة المستهلك؟؟:k38:
ولا انه نظام تقليد وخلاص والناس بتمشى مع الهوجة :36_1_35[2]:
شارك برايك فى التقييم دة"":M_yes[1]:
الموضوع طرح قبل كدة
http://www.nilemotors.net/Nile/showt...DA%D1%C8%ED%C9
مش دايما
موديلات وموديلات
بس الاغلبيه بيبقى لجودتها