إعلان مستفذ عن مسحوق غسيل الزوج اسمه عويضة و الزوجة اسمها بهانة.. شاب و شابة في زهرة شبابهم و اسمهم عويضة و بهانة؟ هو لسه في حد في الفلاحين بيسمي الأسامي دي؟ - ده لو أصلا لسه الريف اسمه الفلاحين - بس بناء على نظرية عويضة و بهانة فبالتأكيد لسه القرى المصرية مادخلهاش دش عشان يشوفوا الإعلان الساذج ده :_Alshmokh08[1]:
معلش هو يمكن محتوى الموضوع يبدو تافه شوية، انما اللي أقصده هنا هو الكروتة و اللكلكة و الاستسهال.. يعني محدش فيهم قادر يتعب نفسه شوية و يسأل حد يعرفه من أهل القرى همه لسه بيسموا ولادهم الأسامي دي و لا انقرضت؟
و بالمثل في المسلسلات اللي بتدور أحداثها في القرى المصرية.. برضه بنات في سن العشرينات و لازم تبقى لابسة الجلابية الفلاحي و الضفيرتين و فارقة شعرها من النص و حاطة ع الجنبين 50 بنسة.. هو فيه حد بأه يعمل كده من شابات الريف ياخوانا؟
فيه مسلسل لسه جاي قريب بطولة صلاح السعدني اسمه و عدى النهار.. ده بأه قمممممممة الكروتة.. واحدة المفروض انها فلاحة و لابسة اللبس الشهير طبعا انما مافيش في لهجتها اي حاجة فلاحي.. يعني الضفيريتن هايوقعوا راسها خلاص من تقلهم و هي بتتكلم عاااااااااادي خالص زي القاهريين بدون حتى أي محاولة لإضفاء أي لكنة ريفي على كلامها.. ساعتها سألت ماما: هي لابسة كده ليه؟ :B4_556:
أي عمل درامي بالمح فيه استسهال و كروتة باحس انه مش بيحترم عقلي و باقفل منه تماما.. أي عمل مش متعوب فيه و مبذول المجهود اللي يستحق عشانه انه يتقدم للناس بالتأكيد بيفشل و أي عمل متعوب فيه و مش متساب فيه هنة بيوصل للناس أسرع و يستحق انه يتقال عليه "فن" زي حديث الصباح و المساء مثلا اللي لما باشوفه باحس ان لسه فيه في البلد دي ناس بتتعب في عمل فني زي ده عشان يطلع بالشكل المحترف ده، باحس ان فيه حد هنا بيحترم عقلي و عايز يقدم حاجة كويسة و باقول فعلا من قلبي.. برافو :k32: