ما معني خطأ coil 1 في فيات بونتو 2001

كشفت على عربية فيات بونتو 2001 بالجهاز
أظهر هذه المشاكل بها وارجو الإفادة فيما تعنيه :

coil 1-
coil 2-
lambda sensor heater-
Control key -

هو يستحسن لما تاخد تقرير الكشف على الاعطال يبقى برقم او كود العطل لأن هنا الكويلات ممكن تكون كويلات الموتور بتاعة الشرارة (البوبينات) أو ممكن تكون كويلات الايموبليزر لو العربية فيها (خصوصاً وانت عندك عطل فى الريموت) - لكن لو العربية بتقطع منك يبقى الكويلات بتاعة الموتورفيها مشكلة يا إما الأسلاك بتاعتها اللى بتغذيها أو الفيشة بتاعتها أو الكويلات نفسها أو لو كان فيه اسلاك من البوبينات للبوجيهات ممكن يكون السلك بتاع البوجيه رقم ١ وبتاع البوجيه رقم ٢ بايظين (ترتيب الاسطوانات للموتور وانت فاتح الكبوت وواقف قدام العربية من الشمال لليمين ١ - ٢ - ٣ - ٤ ) .
بالنسبة لعطل الريموت جرب تغير البطارية بتاعته .
الـ lambada sensor heater فده سخان حساس الاكسجين ( الشاكمان ) - وده مش بيتغير لوحده لأنه جزء من حساس الاكسجين وبيتغير الحساس على بعضه - وبرضه تشيك على الفيشة والسلك بتاعه الاول

شكرا جدا باش مهندس احمد علي الإفادة وهاحاول اعرفهم بالكود للدقة.
لكن ...موضوع عطل في لمبة السخونة بتاعة الشكمان ديه.. ممكن احس بتأثيره علي العربية بإيه ؟
انا لما كنت بفصل حساس الشكمان لمبة الإنچيكشن بتنور لكن مجرد لما ارجعه في مكانه الامور ترجع طبيعية.

من اعراض حساس الاكسجين او لامدا سينسور ان العربية بتبقى مش مظبوطة على السلانسية وكمان استهلاك البنزين بيزيد بصورة كبيرة - بس طالما انت بتشيل الفيشة بتاعته وبتركبها فممكن يكون الحساس سليم والكمبيوتر سجل العطل علشان انت شيلت الحساس - اصلا هى ايه المشكلة اللى فى العربية اللى خلتك تشيل فيشة الحساس بتاع الشكمان ؟؟؟؟ وايه الاعراض بتاعة المشكلة اللى عندك لان عندك كمان احتمال ان البوبينات او الاسلاك بتاعتها فيها مشكلة وده يخلى العربية بتقطع على السلانسية وتقطع كمان وانت ماشى - لازم لما تروح تكشف بالجهاز تعرف رقم الكود بالظبط وكمان هل العطل اللى ظهر ده موجود جاليا active ولا مستجل بس stored نتيجه انه حصل وراح خلاص زى موضوع خلع الفيشة وتركيبها .