الموضوع: سياره ليبرتى 2004

الليبرتى الـ ٤ سلندر ٢٤٠٠ سى سى فيه منها ٥ غيار مانيوال دفع خلفى فقط وفيه منها ٦ غيار مانيوال دفع رباعى - اللى يحدد العربية اللى انت ركبتها هل فيها فتيس ٥ غيار ولا ٦ غيار وهل فيه فتيس غرز على شمال الفتيس ؟
العربية إجمالا كويسة بس الموتور قطع غياره قليلة فى السوق من أول فلتر الهوا لغاية كارتة الكمبيوتر وأغلى من العربيات اللى مواتيرها ٣٧٠٠ سى سى - هى دى مشكلتها بالإضافة لاستهلاك البنزين مقارب جداً للمواتير الـ ٣٧٠٠ سى سى
اعتقد انها فيها ABS بس معرفش هل فيها esp ولا لأ ده يبان فى لوحة العدادادت لما تفتح الكونتاكت من غير ماتدور حتلاقى فيه لمبة للـ esp بتنور شوية هى ولمبة الـ ABS وبعدين يطفوا بعد ثانيتين .
السعر محدش يقدر يحدده علشان العربية مش منتشرة فى السوق

اللى يحدد حالتها هو الكشف فى التوكيل ومايغركش السعر لازم تكشف فى التوكيل كويس - ولو عاوز تتأكد من توافر قطع غيارها ممكن تنزل تسأل عليها - وانا شايف فى الاقامة انك فى اسكندرية - حاتنزل الازاريطة وحاتعدى شريط الترام بتاع سوتر وبعد البنزينة اللى على اليمين حاتدخل اول شارع يمين وبعدين اول شمال وعلى طول عاليمين اسأل عن ابراهيم عياد على قطع غيارها زى فلتر الهوا وتيل الفرامل والعفشة وطلمبة وفلتر البنزين والاسطوانة والديسك والبلية - السيرفو - ماستر الفرامل - ماسترين الدبرياج العلوى والسفلى . وشوف الحاجه دى اسعارها ايه ومتوفرة ولا لا - واسال بالمرة على قطع غيار ال ٣٧٠٠ سى سى . فيه كمان واحد فى صلاح الدين بتاع استعمال اسمه احمد اوتوماتيك او ميمى كانيش الاتنين واحد اسأل عنده برضه على قطع غيارها .