ساعدوا اخ محتاس أرجوكم!! استفسار عاجل بخصوص سلاح المدفعية (تجنيد دفعة أكتوبر 2016)

أخوكم شاب مصرى مقبل على الحياة العسكرية فى غضون مش أكثر من أسبوع.


دلوقتى انا سمعت سلاحى وطلع (مدفعية) بالرغم من انى معايا واسطة تقيلة جدا والمفروض انة أكدلى انة هيدخلنى سلاح سهل وهيظبطلى أمورى. هل ممكن ادخل مدفعية واقضى جيش سهل , ولا انا كدة الراجل لبسنى أو خلى بيا؟

هل يمكن للواسطة تغيير سلاحى بعد ما سمعتة, علما انى هترحل يوم الاحد القادم بأذن الله الى مركز التدريب؟

مركز تدريب سلاح المدفعية مكانة فين, وهل هو مكان كويس من ناحية ظروف المعيشة, الخدمات الاساسية, الخ؟

سمعت انى لازم اعمل فيش جنائى جديد عشان يوم الترحيل, غير الى عملتة أثناء تقديم الورق بمكتب التجنيد بالقسم الى انا تبعة. هل الكلام دة صحيح ولا موضوع الفيش الجناءى دة اشاعة؟

ارجو الرد سريعا, وشكرا مقدما لاى رد محترم.

الاسئله عن الجيش زادت اوى اليومين دول و انا مش متطمن
على العموم ابعد كلمة واسطة دى من الجيش
والله لو انت بنى ادم محترم هترتاح حتى لو سلاحك ايه و بتخدم فى جبل اما لو غاوى تتعب نفسك و هتبص للخدمات و الحمامات و داخل الجيش كأنه فندق اكيد هتتعب و نفسى افهم يعنى ايه جيش سهل او صعب ؟ هوا لمؤاخذة مش انت المفروض داخله عشان تحمى بلدك و اهلك ولا داخله عشان تاخد تان ؟

هو ايه الحكاية اليومين دول٠ واحد بيسأل عن مركز تدريب المدفعية وتاني عن سلاح الاشارة الكلام ده يدخل ضمن الاسرار العسكرية البلد مش ناقصة٠ (فين الادمن)

الاستفسارات عن حاجات خاصة بالجيش كترت فعلا وكلهم تقريبا لاول مرة يكتبوا في المنتدي. يعني بيشترك في منتدي عن السيارات واول حاجة يعملها يسأل عن الجيش والخدمة العسكرية؟؟؟؟؟!!!!!!!
صراحة حاجة مريبة.
ولو حضرتك صادق النية ففعلا ما ينفعش تداول هذه المعلومات هنا حتي لو انت شايف انها معلومات عادية والكل يعرفها وعموما ربنا ييسر لك احوالك.

جميع استفساراتك يمكنك توجيهها للواسطة الثقيلة

أولا احب اقولك اطمن, الاسئلة عن الجيش كتيرة اليومين دول لأن احنا فى موسم دخول جيش (دفعة اكتوبر 2016), مش لأن فى جواسيس فى نايل موتورز مثلا.

ثانيا انا مش فاكر نفسى رايح فندق ولا حاجة, الفكرة بس انى عايز يبقى عندى فكرة عن طبيعة الحياة والخدمات فى مركز التدريب قبل ترحيلى عشان ابقى عارف انا داخل على اسلوب حياة عامل ازاى وابدأ اهيئ نفسى لية.

ثالثا حضرتك بتقول "انت المفروض داخله عشان تحمى بلدك و اهلك ولا داخله عشان تاخد تان؟" هو حضرتك مدخلتش جيش؟ متعرفش سيادتك ان فى مجندين جيشهم الى بيقضوة "انت المفروض داخله عشان تحمى بلدك و اهلك" بيقضوة فى غسيل الصحون فى نوادى القوات المسلحة على سبيل المثال وليس الحصر؟ مش هقولك غير ان حكم النفس على النفس اسوأ شيء على الاطلاق لان مفيش حد يحب انة يتنقل من المدنية الى العسكرية غصب عنة. وعموما انا مش داخل هنا اتناقش فى جدوى التجنيد الاجبارى, انا داخل اسأل كام سوأل كشاب مصرى مدنى لم يسبق لة دخول الجيش وخلاص كلها كام يوم ويترحل, وعامة حضرتك هتحس بكل كلمة انا ذكرتها لما ابناء حضرتك ييجو يدخلوا الحيش.

يا فندم انا لو كان فى مقدورى انى ارفع السماعة علية بكل بساطة وادردش معاة واسألة أكيد مكنتش سألت هنا. الفكرة انة رتبة كبيرة و مش معرفة قريبة ووقتة مش ملكة, لا أكثر ولا أقل. وعامة انا ذكرن كلمة "تقيلة" عشان ميجيش حد يقولى أصل يمكن واسطتك مش قد كدة فشوف حد تانى, لأنى معرفش حد يقدر يساعدنى اكثر منة ليس الا. وعموما انا اسف جدا لو كنت حضرتك خدت فكرة انى متكبر او مغرور من كلامى, انا مكنش قصدى كدة خالص والله.

اقتباس:

---

المشاركة الأصلية كتبت بواسطة medhat fathy

الاستفسارات عن حاجات خاصة بالجيش كترت فعلا وكلهم تقريبا لاول مرة يكتبوا في المنتدي. يعني بيشترك في منتدي عن السيارات واول حاجة يعملها يسأل عن الجيش والخدمة العسكرية؟؟؟؟؟!!!!!!!
صراحة حاجة مريبة.
ولو حضرتك صادق النية ففعلا ما ينفعش تداول هذه المعلومات هنا حتي لو انت شايف انها معلومات عادية والكل يعرفها وعموما ربنا ييسر لك احوالك.

---

يا فندم دى فعلا اول مشاركة ليا فى المنتدى, لكن حضرتك لو تعبت نفسك 3 ثوانى بالضبط وبصيت على تاريخ انشاء حسابى كنت هتلاقى انى عضو هنا من 2013. انا عمرى ما شاركت هنا وكنت باكتفى بالتصفخ فقط, لكن قررت اشارك لما لاقيت ناس كتير بتتفاعل بالنسبة لاستفسارات التجنيد مش اكثر.

ثانيا انا مسألتش مثلا عن مكان ارتكاز قوات او مخازن سلاح او اى شئ من هذا القبيل, انا مجرد سألت عن مكان مركز التدريب (الى هوا مش سر عسكرى اطلاقا, واى حد ساكن جنبة او دخل جيش فية عارف مكانة فين بالضبط).

وشكرا

انا شايف ان الواسطة التقيلة ضرتك ولم تنفعك
ربنا ييسر لك الاحوال
ولا تحزن ان الله معك

الاسئله كثيره فعلا
لاءن ده موعد دفعه اكتوبر
الواسطه بتاعتك ماعملش حاجه الا لو كان في سلاحك فعلا
اي حد مكانه كان هايسال نفس اسئلته
ولو حد عنده واسطه علشان يرتاح في جيشه مش هايتاخر

اقتباس:

---

المشاركة الأصلية كتبت بواسطة hugan

الاسئله كثيره فعلا
لاءن ده موعد دفعه اكتوبر
الواسطه بتاعتك ماعملش حاجه الا لو كان في سلاحك فعلا
اي حد مكانه كان هايسال نفس اسئلته
ولو حد عنده واسطه علشان يرتاح في جيشه مش هايتاخر

---

حضرتك هو مش فى السلاح دة, هو اصلا على المعاش لكن لة علاقات كتيرة وأساليب تظبيط اكثر بحكم المناصب الحساسة جدا الى تولاها قبل احالتة للتقاعد مع المجلس العسكرى فى 2012. لكن هل تفتكر انة ممكن يوزعنى فى خدمة كويسة بعد مركز التدريب؟ اصل مفيش بنى ادم واحد عرف انى مدفعية الا وبشرنى بكل مكروة, بعيد عن السامعين يعنى. واية هى الخدمات او الاماكن الكويسة الى ممكن مجند مدفعية يخدم فيها؟

هههههههههههه االمدفعية سلاحي الغالي حتشووووووووووف أيام جميييييييييلة لو ربنا كرمك ورحت مركز المدفعية رقم 2 الكيلو 26 وبالمرة لو تترحل لسيدي براني تبقي لعبت معاااك يا نجم يا تستحمل وتعدي أيامك يا مش حتشوووووووف خير خاااااااااااااالص لو واستطك جامدة زي ما بتقول يبقيي وأنت في مركز التدريب يوديك دار المدفعية

اقتباس:

---

المشاركة الأصلية كتبت بواسطة محمد 2001

هههههههههههه االمدفعية سلاحي الغالي حتشووووووووووف أيام جميييييييييلة لو ربنا كرمك ورحت مركز المدفعية رقم 2 الكيلو 26 وبالمرة لو تترحل لسيدي براني تبقي لعبت معاااك يا نجم يا تستحمل وتعدي أيامك يا مش حتشوووووووف خير خاااااااااااااالص لو واستطك جامدة زي ما بتقول يبقيي وأنت في مركز التدريب يوديك دار المدفعية

---

اية دار المدفعية دى معلش؟؟ وهل مركز التدريب الى فى كيلو 26 دة كويس ولا لأ؟ ومدة مركز التدريب بتبقى قد اية؟

يعني أسرائيل هتسيب كل الاقمار الصناعيه والانترنت وكل دة وهتيجي تفتح موضوع في نايل موتورز عشان تعرف أسرار الجيش المصري؟

أستقيموا يرحمكم الله

يا بنى نصيحتى فى الجيش بوجه عام انك تستخدم اسلوب الشاب الاهطل...البرود و اللامبالاة و السير مع القطيع...اعتبر نفسك فى عالم افتراضى او فى حلم.هتشوف شخصيات و عقليات و اسلوب فى الحياة مشى امورك.متسلمش رقبتك لحد.و خليك ماشى مع الجمع

متابع!

لو سمحت هوا فيه فيش قبل الترحيل ولا هوا مرة واحده

اقتباس:

---

المشاركة الأصلية كتبت بواسطة mrvolt

لو سمحت هوا فيه فيش قبل الترحيل ولا هوا مرة واحده

---

ما انا عندى نفس السوأل. الفكرة ان الفيش صلاحيتة 3 شهور فقط, وانا عملت الفيش مرة واحدة فى حياتى ايام ما كنت لسة فى مرحلة تجهيز الورق من 3 شهور و أسبوعين بالظبط فبالتالى لو مشوها معايا ميرى هيقولولى الفيش صلاحيتة انتهت, لكن سألت اكثر من حد دخل جيش وخلص وقالولى مش هحتاج واحد جديد قبل الترحيل والله أعلم برضو.

اقتباس:

---

المشاركة الأصلية كتبت بواسطة no_name_is_ftw

اية دار المدفعية دى معلش؟؟ وهل مركز التدريب الى فى كيلو 26 دة كويس ولا لأ؟ ومدة مركز التدريب بتبقى قد اية؟

---

دار المدفعية دة عبارة نادي ومطعم خاص بضباط المدفعية وبالنسبة لمركز التدريب اللي في الكيلو 26 أو الكيلو 4ونصف أو اي مركز تدريب بيبقي صعب لأن أنت بتتحول من الحياة المدنية للعسكرية ودي أخر مكان تقدر الواسطة تساعدك فية قبل الترحيل

علي فكره انا سئلت على موضوع الفيش طلع ضروري

علي كدا انا هاروح اعمله السبت بس مش عارف لو اتاخرت عن سماع السلاح فيه مشكله ولا عادى

اقتباس:

---

المشاركة الأصلية كتبت بواسطة no_name_is_ftw

أولا احب اقولك اطمن, الاسئلة عن الجيش كتيرة اليومين دول لأن احنا فى موسم دخول جيش (دفعة اكتوبر 2016), مش لأن فى جواسيس فى نايل موتورز مثلا.

ثانيا انا مش فاكر نفسى رايح فندق ولا حاجة, الفكرة بس انى عايز يبقى عندى فكرة عن طبيعة الحياة والخدمات فى مركز التدريب قبل ترحيلى عشان ابقى عارف انا داخل على اسلوب حياة عامل ازاى وابدأ اهيئ نفسى لية.

ثالثا حضرتك بتقول "انت المفروض داخله عشان تحمى بلدك و اهلك ولا داخله عشان تاخد تان؟" هو حضرتك مدخلتش جيش؟ متعرفش سيادتك ان فى مجندين جيشهم الى بيقضوة "انت المفروض داخله عشان تحمى بلدك و اهلك" بيقضوة فى غسيل الصحون فى نوادى القوات المسلحة على سبيل المثال وليس الحصر؟ مش هقولك غير ان حكم النفس على النفس اسوأ شيء على الاطلاق لان مفيش حد يحب انة يتنقل من المدنية الى العسكرية غصب عنة. وعموما انا مش داخل هنا اتناقش فى جدوى التجنيد الاجبارى, انا داخل اسأل كام سوأل كشاب مصرى مدنى لم يسبق لة دخول الجيش وخلاص كلها كام يوم ويترحل, وعامة حضرتك هتحس بكل كلمة انا ذكرتها لما ابناء حضرتك ييجو يدخلوا الحيش.

---

مبدئيا مفيش حاجة اسمها دفعه اكتوبر دول الاحتياطى بتوعك ال45 يوم كمتوسط حتى تصل الى دفعه 1/12/2016 يعنى اسمها دفعه ديسمبر

ثانيا الى بيغسل صحون دة مقاتل ولا مش مقاتل ؟ له مهمه ولا مالوش ؟ انا مش بسئلك عشان ترد انا بخليك تفكر و تعرف ان مفيش مخلوق اسمه عسكرى سواء مجند جندى او ظابط احنياط او صف حتى الوزير الا و له مهمه قتاليه بس بيسند اليه اعمال تانيه بجانبها يعنى الى بيغسل صحون و الى بيطبخ و الى بيشيل الزباله ده لازم يعمل كدة مش حكم نفس على نفس ولا حاجة لكن هتروح تجيب الشيف الشربينى يأكلكم ؟

ثالثا بالنسبه للاسئلة وفرها لنفسك لان كل ظروف دفعه مختلف عن التاننيه فى التعامل البدنى و النفسى و المعنوى

اقتباس:

---

المشاركة الأصلية كتبت بواسطة egyarmy

مبدئيا مفيش حاجة اسمها دفعه اكتوبر دول الاحتياطى بتوعك ال45 يوم كمتوسط حتى تصل الى دفعه 1/12/2016 يعنى اسمها دفعه ديسمبر

ثانيا الى بيغسل صحون دة مقاتل ولا مش مقاتل ؟ له مهمه ولا مالوش ؟ انا مش بسئلك عشان ترد انا بخليك تفكر و تعرف ان مفيش مخلوق اسمه عسكرى سواء مجند جندى او ظابط احنياط او صف حتى الوزير الا و له مهمه قتاليه بس بيسند اليه اعمال تانيه بجانبها يعنى الى بيغسل صحون و الى بيطبخ و الى بيشيل الزباله ده لازم يعمل كدة مش حكم نفس على نفس ولا حاجة لكن هتروح تجيب الشيف الشربينى يأكلكم ؟

ثالثا بالنسبه للاسئلة وفرها لنفسك لان كل ظروف دفعه مختلف عن التاننيه فى التعامل البدنى و النفسى و المعنوى

---

أنا مش فاهم اية لزوم الأسلوب التهكمى الى دايما بيخرج المناقشة برة الموضوع الى حضرتك مصمم تتكلم بية.

أنا مش بتكلم فى اسم الدفعة (اكتوبر ولا ديسمبر) انا كنت بقولك ان اليومين دول موسم دخول جيش مش اكثر, لأن حضرتك قلقان ان فى ناس بتسأل عن اجراءات التجنيد الفترة الى فاتت.

وبعدين انا مش بتكلم عن غسل الصحون فى مركز التدريب, ولا عمرى جبت سيرة انهم يجيبولنا "الشيف شربينى". انا كنت بقول ان فى ناس جيشهم فى القوة الاساسية الى هو السنة الحدمة بيكون غسيل الصحون فى نوادى الضياط أو تقديم شربات للمعازيم فى افراح قاعات الجيش وطبعا مش مضطر اذكر "السيكات" الى كل لازمتهم غسل, اسف فى اللفظ, شرابات الضباط وملابسهم الداخلية.

وارجع واقول انى مش جاى اتكلم عن جدوى التجنيد الاجبارى او عيوبة, انا أسألتى عن سلاحى الى دخلتة ومركز التدريب فقط لا غير.

اقتباس:

---

المشاركة الأصلية كتبت بواسطة mrvolt

علي فكره انا سئلت على موضوع الفيش طلع ضروري

علي كدا انا هاروح اعمله السبت بس مش عارف لو اتاخرت عن سماع السلاح فيه مشكله ولا عادى

---

يا وقعة سودة !!!!! يعنى لازم نعمل واحد جديد غير الى عملناة الأول؟ طب ينفع يتعمل انهاردة الجمعة ولا لأ, ولو عملناة السبت هنلحق نستلمة ازاى واحنا المفروض نكون فى التجنيد على الاحد 7 الصبح؟