كيف اجعل مروحة الراديتير تفصل مع اغلاق الكونتاكت

بسم الله الرحمن الرحيم
المشكلة في ستروين ax العربية بتسخن زي كل عربية راديتريها صغير والمروحة بتشتغل ولما العربية بتطفي تفضل المروحة شغالة وطبعا ده جهد كبير على البطارية .ولما احاول اشغل العربية مرة تانية لا تعمل على الاطلاق طالما المروحة شغالة .وبمجرد ما المروحة تطفي ادور الكونتاكت العربية تشتغل عادي . الموضوع ده تاعبنى جدا وكان نفسي اعرف ازاى اخلى المروحة تطفي مع اغلاق الكونتاكت.على فكرة انا معرفتى بالكهرباء والكتاوت كوسية والحمد لله وباعرف استخدم الافوميتر
اتمنى اى زميل من المشرفين او الاعضاء يعرفنى الدايرة واكون شاكر له .

أعتقد إنك لازم تخلي كهربا المروحة موصولة بالكونتاك أو الموبينة... بحيث تشتغل بس طول ما الموبينة شغالة.


...

شكرا لاهتمام حضرتك والرد ولكن المشكلة عندي
1-ازاى اعرف سلك الكهربا المناسب اللى بيبقي فيه تيار مع تشغيل الكونتاكت ويفصل مع فصل الكونتاكت لان عندي موبينة الكترونى وخايف اوصل بسلك مش مناسب يأثر على كهرباء العربية .
2- ما هو نوع الكتاوت او الريليه المناسب لانى قريت ان كتاوت الكهرباء غير كتاوت المارش مثلا .

حضرتك بتدور علي العرض مش المرض. واضح ان البطارية مش كويسه او محتاجه تتغير عشان كده مش بتقدر تقوم العربية و المروحة شغالة لان المفروض العربية مصممة ان المروحة تفضل شغالة بعد ما تبطلها عادي.
أعتقد كمان ان ال relay هتلاقي شكله واحد لكن الاختلاف في في مقاسه يعني يشيل كام أمبير مش أكتر. طبعا هتلاقي بتاع المارش أكبر واحد لان ده اكبرحمل كهربي في العربية.

متشكر جدا لحضرتك بس العربية دي مشكلتها كبيرة فى السخونة خصوصا فى الزحمة فى فصل الصيف وده بيشغل مروحة الراديتير كتير جدا وبيجهد اى بطارية للاسف . ورغما عن ده ممكن اتفق مع كلام حضرتك بس كنت عايز اعمل حل امشي بيه نفسي لان تمن البطارية غالى على ميزانيتي حاليا .

1-البطاريه ضعيفه
2-الصح انك تنتظر انطفاء المروحه قبل فصل الموتور لان الوقت حيزيد لان الحساس بيقرء ماء ثابت لو الموتور داير الماء بيتحرك ويتم التبريد والعكس بطلت الماء ثابت فيزيد الوقت جدا
3- الافضل لو حتبطل تنتظر لما الحراره توصل لمرحله قريبه من التبطيل75 مثلا وتبطل وتعد وقت لو بتفضل دايره اكتر من 5 دقائق عندك مشكله فى التبريد
الكلام لاى عربيه رغم خبرتى فى الستروين
وازاى تظبط عربيتك الستروين تشتغل زى الفيات فى الحراره الموضوع سهل بس عايز صبر راجع مواضيعى
الاجابه على سؤالك بتاع الكونتاكت (العيب انك حتوصل العربيه لحراره عاليه باللى حتعمله اثناء السكون ويفضل التدوير بعد مده كبيره بعد ما تبرد)
الموبينه فيها كذا سلكه حتجيب افو وتقيس لحد ما توصل للسلكه اللى بتدى 12 فولت مع الارضى لو الكونتاك مفتوح وصفر مع غلق الكونتاك
حتاخد منها طرف وتجيب فيوز ازاز 1 امبير من بتوع الكاسيتات
الطرف ده حيتوصل بموجب الكتاوت(الملف وليس القدره) يعنى الحمل عليه فى حدود 300 ملى امبير ومش حيحمل على اى جزء والحمل(القدره) حيكون مباشر من البطاريه

طول عمرك سباق بالفضل والنصيحة يا استاذ/ روتانا . انا قريت ملحوظة عيوب هذه الطريقة ولكن المشكلة بتكون صعبة جدا لما العربية بتطفي فى اشارات المرور ووممترضاش تشتغل الا لما مروحة الراديتير تطفي .
وفيه ملحوظة صغيرة فيه فيشة طالعة من الضفيرة هي اللى بتغذي المروحة فانا لازم اوصل القدرة فى الوصلة الموجودة بين الفيشة والمروحة وليس من البطارية مباشر والا المروحة هاتفضل دايرة على طول ومش هاتفصل مع تغير حرار المياه عن طريق الترموستات .باذن الله اجرب الدائرة واصورها واكتب النتيجة لتعم الفائدة جزيل الشكر والاحترام

القدره بتيجى من البطاريه بسويتش الكتاوت يعنى اللى بيفصلها ويوصلها الكتاوت
انت اصلا اكيد المروحه على كتاوت
يعنى كل المطلوب طرف تشغيل ملف الكتاوت الموجب بدل ما اخد مباشر من البطاريه ياخد من الوصله بتاعت الكونتاك اللى قولتلك عليها
انا بكلمك انك فاهم حتعمل ايه لو متعرفش متبوظش الدنيا
وصدقنى افضل حل تعالج اسباب السخونه وحتبقى فعلا زى الفيات ومش حتسخن نهائى وحتحتاج ترموستات الكوعه عشان الشتا لو اتعملت صح

مرفق صورة لدائرة المروحة وفقا لتصوري ومضاف البها التعديل المقترح الموجود داخل الدائرة الحمراء (المربعات المكتوب عليها ٌٌR المقصود بها الريلاي او الكتاوت .لم اضع الفيوزات فى الرسم من اجل الاختصار وان اكنت اطلب المشورة هل اضع الفيوز فى المرحلة الاخيرة بين الكتاوت والمروحة ام قبل الكتاوت ؟ مع الشكر
http://www.4shared.com/photo/H0mS-hn...102016256.html
22102016256 - Télécharger - 4shared

http://dc696.4shared.com/download/f4...598a&lgfp=2000
كروكى على السريع
الكتاوت اللى هو فى النص بعلامه ملف وله 4 اطراف
طرفين سويتش من البطاريه للمروحه وممكن تحط فيوز 30-40 امبير للحمايه
طرفين ملفات واحد ارضى والتانى كهرباء لما الحراره لتوصل لتشغيل الترموستات بيوصل كهرباء لملف الكتاوت يحصل مجل كهرومغناطيسى يجزب السويتش فتشتغل المروحه
الصح يوصل بالطرف واحد من البطاريه وهنا المتحكم هو ترموستات الحراره
لو وصلته بالطرف2 اللى جايبينه من الموبينه وقفلت الكونتاك حتمنع عنه الكهرباء فيفصل بس لازم فيوز لان اى لعب جنب الموبينه وقطعت كهرباء العربيه مش حتدور
انت مسؤول ان اى غلطه انا نبهتك

االف شكر يا استاذ روتانا وجاري تنفيذ الدائرة باذن الله .
تصدق انا لما اشتريت العربية اكتشفت ان فيه سلك رفيع داخل الموبينة وكان متقشر من عليه العازل مسافة 1 سـم وانا غطيته بشكرتون طبعا واضح ان المالك القديم كان عامل دائرة القطع دي والله اعلم شالها ليه ؟يمكن طمع فى الكتاوت اللى كانت راكبة :) والغريب انى نفذت كلامك وقسته بالافوميتر وطلع فعلا بيدى 12 فولت مع تشغيل الكونتاكت وبيفصل معاه .
شكرا تانى يا استاذ روتانا على الاهتمام وتعبتك معايا .

اللي انت بتقوله ده مش حل
ليه
لانك لو خليت المروحة مع الكونتاكت يبقى كانك ما عملتش حاجة لانك علشان تدور العربية لازم الكونتاكت يكون مفتوح وبالتالي المروحة هتشتغل وتفضل المشكلة قائمة
الحل
هنعمل دايرة تفصل المروحة لو الكونتاك مفتوح والعربية مش دايرة
يعني لو العربية باردة المروحة مش شغالة
لو العربية سخنة والكونتاكت مقفول المروحة شغالة لغاية ما العربية تبرد
لو العربية سخنة والكونتاكت مفتوح ( بتستعد لتدوير العربية ) المروحة مش هتكون شغالة
لو العربية سخنة ودايرة المروحة هتشتغل
الدايرة هتعرف إن العربية شغالة أو بطالة من لمبة الشحن
لو تعرف حد بيفهم الكترونيات ابعتلك التصميم ينفذه لك
ولو بتنزل المنصورة ممكن اعملهولك وأركبهولك تمام وحجات كتير كتير تغير العربية