الموضوع: شركة النصر لصناعة السيارات تنتج سايبا وبريليانس بمصر 2017 !

المشاركة الأصلية كتبت بواسطة colin chapman

والله مش مجاملة ابدا نهائى ده انا مستمتع بالنقاش معاك سواء نتفق او نختلف لكن فى النهاية جميل جدا تلاقى عقلية مستنيرة تتناقش معاها !!
يعنى بكده يبقى الايرانيين فى الغالب اللى هيستلموا شركة النصر !! طيب وهو ماجد الفطيم اسم قليل؟! يعنى هى تاتا اعرق من هوندا ؟!وبروتون ماليزيا من اكتر من خمس سنوات مش عارفين يوصلوا الى اتفاق مع شركة النصر برضه!!

saipa-proton deal on horizon

الله يكرمك ياأستاذ كولن والاختلاف لايفسد للود قضية
معلش حاطول عليك شوية
بالنسبة لدول جنوب شرق اسيا فدى حكايتها حكاية كبيرة - اليابان وضعها مختلف شوية ويمكن تكون من احسن الدول اللى بتتعاون معانا فى صناعة السيارات بس بحرص شديد وشروطهم مش مجحفة قوى ومثال للتعاون معاهم هى شركة نيسان بس هما عندهم عقدة من التعاون معانا كحكومة مش قطاع خاص بسبب شركة الحديد والصلب اللى فى الدخيلة لدرجة إنهم طفشوا منها وسابوا الجمل بماحمل ونفدوا بجلدهم وحصل لهم عقدة وكانوا ساعتها بيفكروا يجمعوا التويوتا ايجيبت فى مصر (التويوتا ايجيبت معروفه فى شركة تويوتا بإنها سيارة قوية من حيث العفشة وتلاقى حتى المساعدين بتوعها اقوى من التويوتا العادية والخليجى) بس لما حصلت مشكلة مصنع الحديد لغوا الموضوع وعملوها فى جنوب افريقيا .
بالنسبة للصين وماليزيا والهند فدول زى ماذكرت قبل كده بيشترطوا فى اتفاقاتهم شروط مجحفة زى انك الاول لازم تشترى عدد معين من العربيات من عندهم تبيعه وبعدين يبدأ ييجى يجمع عندك - أنا معرفش ايه اللى حصل فى الموضوع بتاع تجميع عربيات من الدول دى بالظبط بس اقدر استنتج ان اللى حصل وفشل الموضوع هو السبب اللى ذكرته .
طبعاً سمعة الفطيم لاغبار عليها بس تاتا زى ماقولتلك تلاقيها برضه حطتله شروط مجحفة فشلت الموضوع - واعتقد إنه بص على تجربة قديمة شوية بتاعة الكومودو الصينى اللى فشلت برضه كانت معاه او مع حد تانى من الامارات مش متذكر التفاصيل كانت بنفس الطريقة.
وبصراحة معرفش برضه اذا كان الاتفاق مع الايرانيين حاينجح ولا لأ بس هما أهون شوية من الصين والهند. ممكن الاتفاق بتاع بريليانس يكون كويس لأن العربية اتباع منها فى مصر كتير ودى ممكن تكون فرشة كويسة لإتمام الاتفاق .
بس فى الاخر لو مصر عاوزة تعمل خط تجميع عربيات كبير فى شركة النصر لازم تسلمها لواحد خبير ليه اسم طلع معاش من تويوتا مثلا أو من اى شركة على نفس المستوى ييجى بطقم معاه تسويق وتدريب ورؤساء عنابر وأقسام ويسيبوه هو يشوف الاتفاق المناسب ويعمله وكمان خد بالك إن اسماء الشخصيات الكبيرة فى عالم صناعة السيارات بيبقى ليها وزن تانى فى الاتفاقات زى لعيبة الكورة كده :) - يعنى اى شركة حاتيجى حاتديله شروط احسن من اللى بتديها لنا لأن بيبقى بالنسبة لهم عنصر المخاطرة فى السوق بتاعنا قليل فى وجود شخصية كبيرة فى عالم صناعة السيارات - يعنى انت لو شارى نادى مثلاً حاتتفق فى الاول مع مدرب كبير وليه اسم علشان تقدر تشترى لعيبة كبار زى رونالدو وميسى :) لكن لو اتفقت مع مدرب محلى محدش يعرفه محدش من اللعيبة دى حايعبرك :)