الموضوع: شرح بالفيديو و بالتفصيل أهمية نظام التبريد للمحرك (احنا ليه لازم نبرد الماتور)

اهمية نظام التبريد للمحرك - Why Engine Cooling System is important



احنا ليه محتاجين نظام تبريد للمحرك ؟
ليه دايما لازم نحافظ علي درجه حراره العربيه و الماتور عند حد معين ؟
وهل لو الماتور سخن شويه عن اللازم ممكن يأثر عليه ؟

دي كلها ان شاء الله الاسئله اللي هحاول اجاوب عليها في الموصوع ده



الاول لازم تشوف الفيديو ده انا عامل عليه شرح لاهميه نظام التبريد و كل حاجه عنه بطريقه مبسطه جدا و فيه انيميشن عشان تسهل الموضوع



https://www.youtube.com/watch?v=CN2nKCFQTWM



خلاص شوفت الفيديو

يبقي انت سهلت عليا عمليه الشرح و اخدت فكره عامه عن الموضوع نخش بقي في التفاصيل


--------------------------------------------------------


احنا عارفين ان مهمة المحرك هو تحويل الطاقه الكيميائيه المختزنه في الوقود الي طاقه ميكانيكيه متمثله في حركة البساتم جوا المحرك ومنها حركه عمود الكرنك


لكن الحقيقه ان مش كل الطاقه الكيميائيه دي بتتحول لطاقه ميكانيكيه

تقريبا ثلث الطاقه دي بتتحول لطاقه ميكانيكيه و ثلث بيطلع مع غازات العادم و الثلث الاخير بيطلع علي هيئه حراره علي جسم المحرك





طيب الحراره دي بتتكون لييه ؟


الحراره دي بتتكون نتيجه الاحتكاك يعني المحرك لما يدور البساتم بتتحرك معاه أهي حركه البساتم دي بتعمل احتكاك مع سطح الاسطوانه اللي هوا الشميز و الاحتكاك ده بيتحول اي حراره علي جسم المحرك


ده غير اصلا المحرك شغال علي دوره التشغيل اللي فيها شوط القدره اللي هوا اصلا عباره عن انفجار او حريق جوا الاسطوانه فطبيعي الانفجار ده هيطلع منه حراره تنتقل لسطح المحرك


لكن السؤال هنا هل فعلا الحراره دي مضره للمحرك ؟
ايوه طبعا مضره جدااااااااا

طيب مضره ازاي ؟
اوضحلك انا بص يا سيدي


لكل محرك ليه حاجه اسمها درجه حراره التشغيل ( Operating or Working Temperature )



تعريفها ان هي مدي من درجات الحراره التي يعطي عندها المحرك افضل اداء يعني اعلي كفاءه و اكبر قدره


هيا في الغالب بين 80 -90 درجه سيليزيوس يعني لازم يكون المحرك شغال طول الوقت عن درجه الحراره دي عشان يديك احسن اداء


طيب لو حصل و المحرك زاد او اقل عن درجة الحراره دي؟
حيحصل بلاوي خد عندك


لو المحرك زاد عن درجه حراره التشغبل

مميكن يسببله(Pre-ignition) اللي هوا تقيدم اشتعال و بالتالي ممكن الماتور يسقف منك (واحنا عارفين دي حلها المؤسف ايه )

ممكن يسببله (Detonation) اللي هوا اهلاك لاجزاء المحرك يعني ممكن البستم يشرخ او الصبابات تتأذي

درحه الحراره العاليه دي بتأثر برده علي زيت الماتور فيقلل من فعاليته

ده غير بقي اكيد انه هيقلل من كفاءه المحرك و القدره اللي طالعه منه


طيب لو درجه الحراره قليله عن درحه حرارة التشغيل؟

دي بقي بتخليك تواجه صعوبه عند بدايه الدوران وممكن اصلا المحرك ميدورش معاك

دي غير انه بيقلل من كفاءه المحرك و القدره اللي طالعه منه




طيب نحل المشكله دي ازاي؟
دي بقي مهمه نظام التبريد



فمهمة نظام التبريد مش تبريد المحرك لكن هي الحفاظ علي درجه حراره المحرك عند درجه حراره التشغيل بحيث لا يعلي عنها ولا يقل عنها



تاني لان دي اشاعه منتشره والناس مفكره ان لازم نظام التيريد هوا تبريد المحرك بس عشان كده بشيلو الثرموستات وده غلط جدا


مهمة نظام التبريد مش تبريد المحرك لكن هي الحفاظ علي درجه حراره المحرك عند درجه حراره التشغيل بحيث لا يعلي عنها ولا يقل عنها

يعني لو درجه المحرك اعلي من درجه حراره التشغيل فمهمة نظام التبريد هنا هو تبريد المحرك بحيث يوصل درجه حراره التشغيل في اقل وقت ممكن

ولو درجة حراره المحرك اقل من درجة حرارة التشغيل فمهمه نظام التبريد هنا هي انه يكون في اقل حاله ليه بحيث يسمح لدرجه حراره المحرك انها توصل لدرجه حراره التشغيل في اقل وقت ممكن



هتلاقي في الفيديو صور توضيحيه وانيميشن توضح الكلام ده افضل



طيب احنا عرفنا ايه هي اهمية نظام التبريد واحنا ليه محتاجين نظام تبريد للمحرك

نيجي بقي لنظام التبريد ذات نفسه شغال ازاي وايه هي فكره عمله


افكرك بدرس فيزيا خدناه في الاعدادي

كنا خدنا ان الحراره بتنتقل ب 3 طرق اللي هي التوصيل (اللمس) و الحمل و الاشعاع


اول طريقه هيا التوصيل او اللمس ودي بتحصل مع الاجسام الصلبه

يعني لو جبت قطعه حديد سخنه مثلا درجه حرارتها 40 و واخري بارده درجه حراتها 20 ولامستهم مع بعض و سبتهم شويه هتلاقي ان الحديتين بقو درجه حرارتهم واحده واللي هيا 30 مثلا

ايه بقي اللي حصل هنا؟
اللي حصل ان الحراره انتقلت من الجسم الساخن اللي هوا 40 الي الجسم البارد اللي هوا 30 لغايه ما وصلو هما الاتنين عند درجه حراره واحده اللي هيا درجه حراره الاتزان اللي هيا 30

واللي شرحته ده اسمه مبدأ انتقال الحراره يعني الحراره تنتقل من الجسم الساخن الي الجسم البارد حتي يوصلو الي درجه حراره الاتزان


تاني طريقه هيا الحمل ودي بتحصل في الغازات و السوائل

ثالث طريقه هيا الاشعاع ودي بتحصل في الفراغ


في الفيديو انيميشن توضيحي للكلام ده افضل للتسهيل






طيب ايه علاقه الكلام ده بنظام التبريد؟
ده اصلا اساس نظام التبريد بمعني ان

احنا عايزين نبرد حاجه سخنه نبردها ازاي؟ بأن احنا نجيب حاجه بارده تمتص الحراره السخنه دي

يعني اصلا نظام التبريد ده هي عباره عن نظام تبادل حراري بين الجسم الساخن المراد تسخينه اللي هوا المحرك و الجسم البارد اللي هيمتص الحراره اللي هوا الهوا


فهمت بقي لازمه نظام التبريد ايه و مبدأ عمله

نيجي بقي لانواع انظمة التبريد


هما نوعين

1- نظام التبريد بالهواء (نظام التبريد المباشر)

2- نظام التبريد بالماء (نظام التبريد الغير مباشر )



ليه بقي التبريد بالهوا اسمه تبريد مباشر و التبريد يالميه اسمه تبريد غير مباشر
و بيتكونو من ايه و ايه هيا فكره واليه عملهم

كل ده ان شاء الله هجاوب عليه في الموضوع الجاي اللي هيكون بكره او بعده

شوف بقي الفيديو مره تانيه هتلاقيك فهمته كويس اوي المرادي


https://www.youtube.com/watch?v=CN2nKCFQTWM


لو عجبك الموضوع اعمله تقييم بقي و شكر و الكلام من ده :D

متنساش تشترك في القناه علي اليوتيوب و اعجاب للصفحه علي الفيس بوك

لو عندك اي استفسار بالنسبه للموضوع ده اسأل و انا تحت امرك :D


-----------------------------------------------------------------------

اشترك في القناه في اليوتيوب عشان يوصلك كل الفيديوهات

https://www.youtube.com/channel/UC-6...SnrK-pQUqhPAkg



ولايك لصفحتنا علي الفيس بوك

https://www.facebook.com/ElMekaneky1



للتواصل معي ده حسابي علي الفيس بوك

https://www.facebook.com/Ayman.Elmaghawry.1


(علم ينتفع به )

تسلم ياهندسه