الموضوع: برجاء المساعدة في سوزوكي sx4 موديل 2008

المشاركة الأصلية كتبت بواسطة borio1704

واضح إن صاحب العربية كان من نوعية الناس اللي ما بتعملش أي حاجة في العربية إلا لما تعطل وتقف خالص.

عموما.. تكاليف التصليح إن شاء الله ما توصلش لدرجة 20 ألف زي ما قالوا.. وأعتقد المبلغ مش هيزيد عن ألفين ثلاثة بالكتير إن شاء الله..

طيب.. حسب التقرير الفني.. فالمشاكل عندك موجودة في 3 حاجات تحديدا:

1- دايرة التبريد بالكامل
2- قواعد الموتور
3- زيت الموتور


نمسك حاجة حاجة..

1- دايرة التبريد..

أغلى حاجة هنا هي الرادياتير نفسه... ده لو عايز تجيبه أصلي بتاع سوزوكي..

لو الرادياتير ما بيسربش .. والريش بتاعته سليمة.. تغيره ليه؟؟

كوتشات الرادياتير العلوية والسفلية ممكن تجيب الواحدة بحوالي 20 جنيه

الثرموستات ممكن يطلع يتنظف.. ولو عليه صدا كتير ومحجر يبقى تغيره.. سعره مش هيتجاوز 200 جنيه.

بعد ما تعمل الكلام ده كله تعمل دورة تنظيف لدايرة التبريد بالكامل (الرادياتير والمحرك) وتحط سائل تبريد على نظافة.

التنظيف وسائل التبريد الجديد معتقدش يكلفوا مع بعض أكتر من 200-300 جنيه.




2- قواعد الموتور...

مهم طبعا تغيرها.. ويفضل تعمل الكلام ده بسرعة علشان ما يضربلكش الكبالن..

هي دي يمكن أكتر حاجة ممكن تكلفك في العربية

حاول تدور على بتوع قطع الغيار الياباني.. مش الأصلي
فيه بعض محلات بتبيع قطع الغيار من إنتاج نفس الموردين اللي بيوردوا لشركة العربيات.. بس بينزلوها باسمهم.. ودي بتبقى أسعارها نص أسعار الأصلي أو أقل أحيانا..

اسأل في العباسية أو في شارع دمشق.. وإن شاء الله تلاقي.


بس أنا حاسس كده إن العربية كانت عاملة حادثة كسرت الرادياتير والقواعد... والله أعلم.



3- الزيت...

غالبا صاحب العربية ما كانش بيغير الزيت.. أو على الأقل بيجيب زيوت رخيصة قوي ويسيبها في الموتور

أنا نزلت كتالوج العربية بتاعتك.. بس لقيته بتاع أمريكا.. وتوصيات الزيت اللي فيه محددة درجات اللزوجة باللزوجات الخفيفة بس.. وده اللي بنلاقيه في معظم كتالوجات العربيات الياباني في أمريكا..

تقدر تنزل الكتالوج من هنا
http://manuals.zedt.eu/suzuki%20sx4/...ers_manual.pdf

بس بالقياس على بقية العربيات الياباني.. أقدر أقوللك إن توصيات الزيت المناسبة لموتور عربيتك هي كالتالي:

اللزوجة:
5w-30 أو 10w-30 أو 15w-40 أو 20w-50

مستوى الأداء

api sl على الأقل
ilsac gf-3 على الأقل (في اللزوجات الخفيفة فقط 10w-30 و 5w-30)

هات زيت التعاون sl وحطه زي ما البشمهندس أحمد عبدالفتاح قاللك كده... 500 كيلو ونزله.. وأنا رأيي كمان ممكن تعمل الحكاية دي كمان مرة بعدها بحيث تتأكد إن الشوائب نزلت ومفيش حاجة فاضلة

وبعدها نشوف الزيت اللي يناسبك حسب استخدامك

وبالنسبة لجوان غطا التاكيهات.. بردو تجيبه من بتوع الياباني.. وأعتقد سعره مش هيزيد عن 100 جنيه.



عموما عايزك تحط في دماغك إن تغيير الجوانات والكاوتشات في العربية شيء طبيعي جدا .. خصوصا إن أي قطعة كاوتش عمرها ما بيزيدش عن 6 سنوات.. سواء استخدمتها أو ما استخدمتهاش.

وربنا يوفقك.. وطمننا عملت إيه.


...

انا مبدائيا انا بشكر حضرتك لاهتمامك و مساعدتك علشان انا شبة محتاس شوية ، و انا للاسف و ديت العربية لميكانيكي معرفة، و عملت حركة مكانش المفروض اعملها هو اني اديته التقرير يبص علية و انا مش مخون ، و فتح الموتور ولقاه سليم مفهوش حاجة و قالي مدام فتحت بالمرة نغير ده:
1- طقم شنبر
2- كاوتش صباب
3- جوان وش سلندر
4 - سيفتي فالف كتينة

و بالنسبة لدايرة التبريد : فانا هعمل دورة تنظيف لدايرة التبريد بالكامل و اشوف فيها مشكلة ولا لا ، و هغير الثرموستات

و بالنسبة لقواعد الموتور : فانا هغيرها و سعر التيواني سألت عليها لقيتها في حدود ال 650 جنية عند واحد اسمة محمد امين في وسط البلد - و الفرع الرئيسي في القطامية


و بالنسبة للزيت ايه افض نوع ممكن استخدمة بعد اللي عملته في الموتور؟


و اخر حاجة الميكانيكي قالي ان المقصات عايز يغير فيها جلب و بيض مقص ، و لما سالت قالولي المقص على بعضة و مش موجود غير التيواني ب 750 ج ، و في ناس قالتلي خليك في اليباني او الاستيراد و التوكيل معندهوش و الاستيراد مش عارف حد بيبيع قطع استيراد للسوزوكي الموديل ده

ايه نصيحة حضرتك ؟؟