الموضوع: عايزة حقي من مركز سبيد سيرفيس

الاساذه الفاضله صاحبه الموضوع
مبدئيا انا بحييكي علي اسلوبك و فرضك للموضوع من وجهه نظرك لدرجه اني صدقت الي مكنوب لولا اني احد المشاركين فيها
مبدئيا تعالي نشرح للمحترمين الافاضل الي حصل و نترك الحكم و كمان نشوف ايه الي هيترتب علي كده
1 معرفتي بحضرتك من اكتر من 4 سنين بسبب احد الافاضل الي عرفك بينا بسبب ان كان منصوب عليكي من احدي الوكلاء المعتمدين لغبور في هذا الوقت و بقالك معانا الفتره دي كلها عمر ما حصل مننا حاجه -
2 حضرتك وديتي العربيه غبور بسبب سخونه و غيرولك وش سلندر و دفعتي 5000 زي مانتي قايله و بعدها لاقيتي العربيه بتاكل زيت الي ان جبتيهالي
3 اتفكت العربيه و شوفنا الي فيها
ان المشكله فيها بسسبب السخونه طقم الشمبر اتاثر و كان المفروض التوكيل يغيره لكن العربيه طلعت كده من عندهم و بسبب كده حصل مشكله في شمايز البساتم
كل ده عادي مفيش اي مشكله تمام -----
4 كلمت حضرتك بعد يومين من استلام المركز للسياره و طلبت الاتي "
- طقم بستم اصلي 020
- طقم سبيكه محرك اصلي 010
- طلمبه مياه كوري
- طلمبه زيت اصلي
- طقم جوان وش سلندر كوري
- كاتينه و سيور و بلي اصلي
سالتيني اجيب الحاجه منين قلتلك من التوفقيه طيب عند مين قلتلك شوفي البنا
كلمني زوج حضرتك و قالي انا مش لاقي الحاجه عند البنا ممكن ش دمشق قلتله ش دمشق مفيهوش حاجه العمرات طيب قلتله شوف جورج حلمي
البنا او جورج حلمي دي ناس مشهوره بتاعه قطع غيار بحكم انك بتساليني مش انا مزبط معاه ولا في سابق معرفه و لا حتي بعتك عند محل جنبي -
- تفضل زوج حضرتك باحضار قطع الغيار الي انا طلبتها
طقم بستم مكتوب عليه كوري
طقم جوان كوري
طلمبه زيت - طلعت مش هي و قلتلك رجعيها و فضلت 3 ايام بدور عليها لحد ماجبتها لحضرتك
سبيكه كرنك - مجهوله النوع و طلع عيني عقبال ما لاقيتها
كاتينه و سيور و بلي كوري مش اصلي
بلغته الحاجه دي مش اصلي قالي مش لاقي غيرهم قلتله ازاي يعني قالك ركبهم و خلاص انا قلبت التوفقيه كلها انا كده كده هبيع - الله ينور - قلتله براحتك
اتخرط الموتور عند -testa & toni و من اكبر خراطي المراكب و ليس السيارات فقط
فضلت متبهدل اسبوع لحد مالقيت السبيكه الاصلي و طلمبه الزيت لمده 5 ايام و حضرتك قاعده في البيت
المهم اتعملت و حضرتك استلمتيها و مكنتش واخد منك ولا جنيه مقدم حتي علشان قطع الغبيار و الخراطه
عملت لحضرتك خصم من غير ماتطلبي 300 جم و حضرتك قلتلي يبقالك كمان 200 جم علشان ممعيش
تاني يوم باليل كلمتيني قلتلي علي الزجاج قلتلك علي العموم انا محصلش حاجه زي عندي لان العربيه ماتحركتش من جوه المركز بس شوفي الي يرضيكي و لما تيجي صيانه الالف من هاخد مصنعيه و كمان خلاص ال 200 جم - ده لاني بيهمني رضا عميلي و مش مهم لاننا علاقه صداقف محترمه مع حضرتك و زوجك
بعدها كلمتيني علشان ****** صوت التاكيهات الصبح ****** قلتلك طبيعي لحد ال 1000 كم بكون مهويهم شويه علشان العربيه ماتسخنش
كلمتيني ان في تسريب زيت من تحت لاقيت الفلتر ضارب من الامونيوم بتاعه و بعت جبت فلتر جديد و ركبته و مشيتي
لاقيتك جيالي بدون ميعاد و بتقوليلي بعتلك و قلتلك علي الواتساب اني جايه علشان صيانه ال 1000 قلتلك العربيه لازم تكون بارده علشان اضبتلك التكيهات و كانت الساعه 6 باليل و قلتلك هعمل الصيانه الاولي و يوم تاني و اتفقنا عليه ان الدكتور زوج حضرتك هيجبهالي الخميس و ياخدها الجمعه
لاقيتك بتقوليلي علي الزيت قلتلك محصلش بس يا سيدتي مش هزعلك خديه جمله كانك حطيتي شل اصفر الي ب 220 جم
لحد هنا عدي مفيش مشكله
الدكتور جاب العربيه عالونش بعدها ب 3 او 4 ايام بتطلع دخان ابيض
فكيتها لاقيت البستم لازق بالشمبر بتاعه في البلوك
حضرتك شرفتيني مع الدكتور علشان تشوفيها بعنيكي الي حصل
قلتلك ده عيب خامه البستم ** رديتي عليا طيب و الحل قلتلك هتصب شميز و بستم جديد بس المره دي من التوكيل تشتريه و كان ده اتفقنا , و ايضا مساهمه من هيتجاب من غبور 1850 جم و هخليهم يعملوا خصم 15 ال 20% كانه لي باعتباري سابق العمل كمدير استقبال بغبور
تاني يوم كلمني قالي انا الدنيا مزنقه قفلي العربيه قلتله يا سيدي انا مش عايز منك مصنعيه قالي ظروفي صعبه و هاجي اخدها علي الونش --- دي نهايه القصه او end of text بس بالنسبلك مش بالنسبالي
طيب تعالي نناقش شويه حاجات صغيره
-- انا بنصح اي حد هات من المحل ده او ده لاني مش موارث معاه و لا شريكه لان الطبيعي ان العميل يسال اجيب منين - لان احنا من يوم ما فتحنا معندناش قطع غيار بس لو ليا ملاحظه بقولها للعميل و هو حر و ده الي حصل معاكي لما قلتوا ركب الحاجه -- بالنص كده ركبهم انا قلبت التوفقيه مش لاقي و انا كده كده هبيع ** يبقي انا زنبي ايه
-- المشكله في الموتور البستم بالشمبر - السبايك سليمه تماما - لان اكتر جزء حساس جوه هو السبايك و محصلهاش حاجه و انا الي طلبته البستم بس و الشميز هيتعمل -
--كل واحد بيقول رايه ان العمره مابتنفعش بقوله كل واحد و ليه صنعته و انا عمرت مواتير اكتر من اي حد عمر ما حد اشتكي - قصه البلوك الاستيراد دي بتبقي حظوظ انت و نصيبك لانه مستعمل و فتره ضمانه ممكن ماتبينش مشاكله - لحد هاتلي حد اشتكي من موتور احنا عملينه ؟؟؟؟؟؟؟؟؟ بدليل ان عربيه عندي تالث مره يشتري بلوك و يطلع فيه مشكله و برضه ا/ جاد الي بيتعامل معايا و اشتغلنا في غ\عربيته و عربيات كتير من اصحابه منهم مواتير - ده علي سبيل المثال و ليس الحصر
--عمره الموتور غبور بيعملها بدليل ان البستم الي نازل في السياره بيبقي مقاسه standard و ليه مقاسات اكبر 010-020-030-040 للعمرات و برد علي المحترم الي بيقول مكسبها بقوله لما حضرتك بتشتري موتور استيراد بيركب في يوم مش 3 اسبابع العربيه واقفه و لو في حاجه بتفكه و ترجعه و يركب تاني علي حساب العميل بدون مسؤليه مننا
--قطع الغيار انا بقول عندك فلان و فلان و فلان و كلهم ناس كبار معروفين مش مقسم معاهم و لا باخد نسبه و لا انا الي ببعهالك و برضه قلت دي مش اصليه قلت ركب - اعمل ايه يعني اقولك لا و النبي هات الاصلي ؟؟؟؟؟؟؟؟؟؟؟؟؟
--- بطلب من كل واحد رد رد في الموضوع و قال رايه انه يسمع للطرف التاني مش يرد و خلاص ؟؟؟؟؟ انت كده فهمت من الطرفين
اخيرا و هو الاهم ::: اولا - للمركز الحق في اتخاذ الاجراء القانوني للتشهير به بدون وجه حق
::::: كنت عرضت علي زوج حضرتك اني مش عايز مصنعيه احنا عملاء قدام و برضه مش مشكله في حاله رضاء عميلي و هي من اهم اولولياتي -- طبعا العرض ده لاغي و ايضا مضاف مصارف الفك للمره الثانيه
:::::: برجاء الحضور في موعد غايته اسبوع من تاريخ اليوم لاستلام السياره و الا لا اعتبر مسؤل عنها
eng / hany michael

ولو انى مش من حقى انى اتكلم فى الموضوع ده
بس انتو الاتنين محترمين جداااااااااا
الاستاذ هانى لانى اتعاملت معاه قبل كده
وحضرتك لم اتشرف بيكى ولكن لم يخرج منك لفظ خارج مع كل اللى دفعتيه ومع ذلك كاظمه غيظك
انما مين اللى غلطان فى الموضوع ده مش فارق معايا بصراحه

الأستاذ هاني مبدئيا شكرا لرد حضرتك
حقيقي انا اتعاملت معاك بعد ما اتنصب عليا من حد برا ولما بتوع التوكيل بهدلوا العربية ودا المفروض حاجة كويسة إني لجأت لحضرتك لإنك مكان ثقة وإلا مكنتش هآجي من اكتوبر لحضرتك مخصوص ، فدا يزيد حضرتك ثقة مش إن حضرتك بتجاملني ..
حضرتك بتقول إنك لما قلتلي روحي هلتي من فلان أو فلان لإنهم موثوق فيهم او عندهم قطع غيار متوفرة ،
وحضرتك بتعمل عمرات كتير كان أولى حضرتك بما إنك خبرة تعرف القطعة كانت مضروبة أو لأ اللي هو خلاص انا اشوف الحاجة اعرفها مضروبة ولا سليمة
ثالثاً: حضرتك عملتلي خصم قلتلي دا علشان الصداقة ليها حق ، ولتالت مرة حضرتك بتذلني بيه دا مسكوش خصم انا عارفة ان حضرتك حبيت تعرف الناس او اكيد معروف عن حضرتك كرم الأخلاق
رابعاً حضرتك انا مغيرة البربريز ب 500 ومعالجاه ب 100 يعني 600 جنيه لما حضرتك عرضت عليا انك تغيره انا رفضت ، قلتلي خلاص الزيت والصيانة من عندي وليا عندك 200جنيه مش عامل حسابي عليهم
آه ، حضرتك نسيت تقول اني كام مرة اتحايل علي حضرتك تقولي الحساب كام علشان اعمل حسابي في الفلوس لاني مش جاية من مشوار قريب وجضرتك تقولي محسبتش ، ال 200 جنيه لما حضرتك عرفت قلتلي مش عايز الفلوس والزيت والصيانة من عندي
لما جيت لحضرتك ف صيانة 1000 انا اعلم تماما ان صيانة الالف ملهاش مصاريق بس قلت حضرتك هتغير زيت ، قلتلي عايز حساب الزيت قلت لحضرتك المفروض انه عليك قلتلي لا لو كنت اعرف كنت حطيتلك حاجة اي كلام مش زيت ب 380 حاسبت حضرتك وكاني مشترياه زيت Shell ودفعت 220 يعني حضرتك اللي طلعت كسبان في الآخر ...
حضرتك بتقولي انا شهرت بالمركز دي مش حقيقة لان لا انا ولا زوجي بنعرف نخرج عن الادب كان ممكن حد غيرنا يقف قدام حضرتك ويقولك انا مليش فيه العمرة دي تلزم حضرتك من اولها لآخرها لكن احنا مبنعرفش نعمل غير اننا نتقي ربنا في ردودنا ، لما اكتر من شخص قالي ان العمرة دي تخص اللي عملها لجأت لنايل موتور
معلش هفول حاجة ، عندي مطعم ف اكتوبر اتشمع بالشمع الاحمر قالوا في حالات تسمم ، بمجرد ما شالوا الشمع الناس رجعت عليه اكتر م الاول بكتير
اعتقد مضمون الرسالة مفهموم
أخيرا حضرتك اللي حاططلي dead time آخد فيه عربيتي ، انا فعلا كنت هاخدها اركنها وهركنها ويعوض ربنا عليا في الفلوس اللي اتدفعت ع الارض سواء عند حضرتك او التوكيل
اللي عند ربنا مبيروحش
ميرسي جدا ع القهوة وميرسي جدا لسوء المعاملة

بعيدا عن الموقف اللى حصل االا ان قطع الغيار الاصلية مهما كانت غالية فى التوكيل الا انك بتكون مرتاح من العربية و مشاكل القطع المضروبة و لو حسبتها هتلاقى ان التوفير اللى موفره فى المضروب بتدفع تمنه اكتر بكتير من الاصلى اللى بيتجاب مرة واحدة مش عشرات المرات زى المضروبة اللى ممكن يبوظ حاجلت تانية انت فى غنى عنها

المشاركة الأصلية كتبت بواسطة lancer06

بما ان المشكلة معروضة للجميع فلابد يكون ليها حل مكانش علشان الاعضاء اللى تدخلو ومعظمهم عملاء عن المهندس هانى هيكون علشان المكان اللى متواجدين بية
الموضوع ممكن يحصل لسيادتك شخصيا لو مكنتش على دراية بهندسة السيارات
ودى سيدة ومش ملمة بقطع الغيار اذا كانت مضروبة او سليمة او تقضى الغرض

المهندس هانى علية غلط وهو اسمحلى اذا كنت شايف انة من باب الامانة
انك شايف انهم متضررين وجابو قطع سليمة واخرى مضروبة المفروض حضرتك كنت ترفض ليه ترفض
لأنك على علم بالاضرار اللى هتحصل لو اتركبت والخساير اللى هتأثر سلبنا على العميل وعلى المركز
حتى لو الموضوع هيسبب مشكلة بينك وبين العميل كنت طلبت منة يركبها بره ولو هيركبها برة ويتضر هيعرف انك كنت على صواب وهيرجعلك
اسمحلى حضرتك فى الجزئية دى

كلام مظبوط

المفروض انه كان يرفض تركيب اشياء يعلم احتمالات ضررها ( حتى و لو كانت بعيده )

و كان الاصح انه يوضح احتمالات الضرر بالتفصيل للعميل ..

و لو العميل اصر ( زى انا حبيع العربيه .. ركب و على ضمانتى .. الخ ) .. يبقى المفروض يرفض تركيبها و يطلب من العميل تركيبها فى مكان آخر



بس برضه للامانه حتكون فيه مشكله لو طلب منه انه يركبها بره .. ان العربيه مفكوكه خلاص .. يعنى امر واقع

لكن برضه نرجع نقول .. انه لو لقى الحاجه مضروبه .. كان لازم ساعتها يصر ان العميل يحضرها من التوكيل ( بغض النظر عن رغبه العميل ) .. و لو العميل رفض يبقى يسلمه عربيته بدون زعل