عايزة حقي من مركز سبيد سيرفيس
السلام عليكم و رحمة الله وبركاته ،
بعتذر إن أول مشاركة ليا في المنتدى تكون شكوى بس دا إن دل يدل على مدى مصداقية المنتدى واتمنى من الله انكوا تساعدوني آخد حقي
أنا عربيتي هيونداي i10 موديل 2012 عاملة 100000 كم فجأة سخنت مني من غير ما يظهر علامة سخونية وديتها توكيل غبور ابو رواش قالولي جوان وش سلندر قعدت عندهم فترة وبعدين استلمتها بعد ما كنت دفعت 5000 جنيه بعد ما اخدتها باسبوعين لقيت لمبة الزيت بتنور باشيك ع الزيت لقيت مفيش ولا نقطة لما رجعتلهم قالولي دا الجزء السفلي من الموتور وبعد ما قالي التكلفة خدت عربيتي ومشيت ،
اتصلت بمركز سبيد سيرفيس المهندس هاني قالي هاتيها ،
وبعد ما شافها قالي العربية دي محتاجة عمرة قلتله تمام
طلب مني قطع غيار من محل جورج حلمي في التوفيقية ، رحت جبتها منه طقم بستم، شمبر ، طلمبة زيت ، سبيكة ، وحاجات تانية العربية فضلت ف المركز شهر ونص بتعمل عمرة كلفتني فوق 6000جنيه
استلمت العربية منه فيها صوت ، بعد ما وصلت اكتوبر
قالي هاتيلي العربية اشوف الصوت ، رجعتله تاني يوم قالي دي التكيهات مهوينها لحد بعد 1000كم هنربطها
استلمت عربيتي وكنت لسه مغيرة بربريز أمامي لقيته مكسور ، لما قلتله قالي فعلا دا كسر وقالي الزيت والصيانة بتاعت 1000عليا
بعد اسبوع العربية بدأت تسرب زيت ، رحتله قالي دا فلتر الزيت كل الناس ف غبور بتشتكي منه وربطه ومشيت ،
بعد العربية ما لينت رحتله علشان اعمل صيانة 1000كم واغير زيت ريربط التاكيهات
مبدئياً قالي انا مش هتحمل تمن الزيت و رجع ف كلامه معايا ، قالي كنت حطيتلك زيت اي كلام ، المفروض المفروض انه حاطط Amsoil والله أعلم دفعت 220 جنيه وهو اتحمل باقي 380 بس كدا ،
الخاجة التانية قالي التاكيهات مبتتربطش غير والعربية باردة كان ردي حضرتك المفروض تبلغني لإني مش ساكنة جنبك وبعدين انا شغلي متعطل بسبب العربية
الكلام دا كان يوم الاحد يوم الأربعاء العربية وقفت مني وطلعت دخان ابيض ومرضيتش تدور رفعتها علي ونش وديتهاله ، تكرم وفكها قالي طقم البستم سايح
وطبعا أنا مش بفهم في الميكانيكا وقالي دا عيب قطعة غيار ، قلتله انا لا كنت اعرف جورج حلمي ولا غيره وبعدين حضرتك اللي قلتلي عليه ، قالي دي قطعة مضروبة مش ذنبي قلتله وايه يضمنلي ان مفيش حاجة حصلت هي اللي سيحت طقم البستم قالي ايه اللي حصل قلتله معرفش ، طبعا لاني بنت ومش هعرف اخد معاه حق ولا باطل قالي انا هجيب الطقم م التوكيل ،
وكدا العربية محتاجة عمرة من أول وجديد بما تحمله الكلمة من معنى وطبعا انا اللي شايلاها للمرة التانية من اول قطاع الغيار لحد المصنعية ،
لقيت اني مش هيبقي معايا فلوس قلتله قفل العربية انا هركنها علي حالتها قالي مينفعش الموتور مش هينفع يتقفل لان طقم الشمبر والجوان بايظيين
الصراحة انا كل مااسأل حد يقولي العربية دي تلزمه ويصلحها على حسابه لان مفيش عمرة تفوت بعد 1000كم،
ربنا بعتلي أصدقاء هما اللي قالولي ع المنتدي
فأنا بطلب منكم تساعدوني اجيب حقي
