السوق الأمريكي بالذات بيعتمد على موسم الإجازات بتاعة الكريسماس عشان تكتر فيه المبيعات والسنه اللي فاتت كانوا بيقولوا في امريكا انه اسوأ موسم مبيعات مر على الاقتصاد الامريكي وان المبيعات كانت ضعيفة وغير متوقعة.

يا ترى السنه دي هيقولوا ايه...؟؟

لأعتقد ان معظم الشركات الأمريكية السنه دي منتظره صحوه بيع وشراء خلال موسم الكريسماس وبيقامروا ان اللي هيعدي الموسم ده في احتمال انه يستمر السنة الجاية غير كده قول يا رحمن يا رحيم على شركات كثيرة.

وكذلك الحال عندنا وكله مترقب لأحوال السوق بعد العيد الكبير، ولسه ناس كتير مشترتش الخروف بتاع العيد وناسيين الموضوع ده خالص مع انه الناس كانت بتجيبه قبل العيد بشهرين ويشربوه سفن اب كمان.

بس الاقتصاد الأمريكي أقوى مما نتصور يا جماعة وفي حكومة ننحرك فوراً لما الاوضاع تبدأ تسوء بالشكل ده وكمان تدي للناس فلوس وتقولهم دي فلوس زياده ليك يا مواطن عندنا من الضرائب وبنرجعهالك عشان تنزل تنبسط انت وعيالك وتصرفوا وتبرطعوا وتعملو انتعاش في السوق...

لكن عندنا لو حد قال انا مجبتش خروف العيد عشان فلسان مش حيطول الخروف ولا عصعوصه منه حتى...

وكل سنه وانتم طيبين مقدماً