السلام عليكم ورحمة الله وكل عام وانتو بخير..

الحمد لله ربنا اكرمنى واشتريت سيفيك 2008 اوتوماتيك Lxi بعد حيره ومقارنات كتير..

انا حبيت اشارك برأييى لانى استفدت كتير من المنتدى ده واعضائه واكيد المشاركه واجب على لتعم الفائده ان شاء الله.

العربيه الحمد لله تفوق تصوراتى وماشاء الله واسعه جدا من الداخل وادائها ممتاز

أنا مش هاقدر احكم على اداء العربيه لأنى مشيت بيها 100 كم بس لكن ممكن اتكلم عن ايه اللى خلانى اشتريها وانطباعاتى الاولى عنها. المقارنه كانت بين 4 سيارات السيفيك والكورولا ومازدا 3 واوكتافيا A5 و دى ملاحظاتى على الانواع دى من واقع التجربه
1- الكورولا: ضيقه شويه من الداخل, كرسى السائق لو رجع للخلف شويه مش هيبقى فى مكان لحد يقعد ورا و حتى من غير ما يرجع المكان برضه ضيق جدا رغم ضخامة حجمها, الحاجه التانيه ان شكلها معجبنيش وطبعا دى ازواق رغم ان التابلوه بتاعها شيك ومنظم
2- مازدا 3: عربية ممتازه فى كل شىء شكلها مميز جدا وادائها احسن من الكورولا حسب تقييم معظم المواقع الاوربيه لسيارات الفئه دى, السبب اللى خلانى اتراجع عنها هو ان سعر اعادة البيع فيها اسمع انه مش كويس بالاضافه لان التابلوه بتاعها يعتبر تقليدى شويه السيفيك اشيك منه بس مازلت بعتبر المازدا 3 عربيه ممتازه وكنت خلاص هاشتريها قبل السيفيك
3- A5 :عربيه جميله جدا وفى منتهى الفخامه اللى خلانى اتراجع عنها انها شكلها عجوز شويه او بمعنى اخر محترمه زياده عن اللزوم او تناسب السن الكبير شويه لكن كأداء افتكر انها احسن من المازدا والكورولا
4- سيفيك: هى اللى كسبت فى الاخر

اللى اقدر اقوله ع العربيه حتى الان انها فى منتهى الثبات و عزلها ممتاز, انا كان معايا تيدا قبلها وبعد ماجبت السيفيك بمشى بيها فى نفس الطرق و احساسى بالمطبات او اى تكسير فى الطريق يعتبر 10 مرات اقل من التيدا. كذلك العربيه واسعه اوى من الداخل, انا برجع كرسى السائق كتير وقاعد مرتاح جدا ومع دلك فى مسافة 25-30 سم بينه وبين الكنبه الخلفيه.

اسف على الاطاله واتمنى ان اكون افدت وارجو منكم الدعاء وكل عام وانتم بخير