الموضوع: ايهما افضل فيات 132 ولا ريجاتا ولا 128

ايه يا جماعة هو ده مش قسم فيات ولا ايه :/

ريجاتا ثم 128 ثم 132

المشاركة الأصلية كتبت بواسطة م أحمد

ريجاتا ثم 128 ثم 132

تسلم م / أحمد عبد الخالقجزاك الله خيرا

المشاركة الأصلية كتبت بواسطة D2rkZ3r0

السلام عليكم .... انا زيك لسه جديد في السواقة و كنت محتار نفس الحيرة اللي حضرتك فيها دي علشان كدة عندي ليك نصيحتين :
1- ابحث عالنت و شوف عيوب كل عربية إيه و هتلاقي هنا مواضيع كتيرة بتتكلم عن عيوب و مميزات كل سيارة .
2- الـ 132 ليها اكتر من موتور 2000 ، 1800 ، 1600 ( انا كنت ميال ليها اكتر علشان كدة جبتها و عرفت كل حاجة عنها قبل ما اجيبها بس هروح مشاور و لما ارجع بإذن الله هكلمك عنها و اقولك كل اللي اعرفه عنها)
3- أهم نقطة حاااااااااااااالة العربية بغض النظر عن نوعها و عن موديلها
4- أسمع من كل الناس و جمع كل المعلومات في دماغك و بص عليهم في الشارع و لو قدرت تسأل أصحاب السيارات دي أسألهم ( انا عملت كدة )
5- قطع الغيار و استهلاك البنزين و مدى تحمل السيارة
6- قبل ما تشتري سيارة خد معاك سمكري و ميكانيكي أو أطلع بيها على بنزينة تفحصلك السيارة
7- صلي أستخارة و استشير اصحابك و اصدقائك و اسرتك فلا خاب من استشار ولا ندم من استخار
و للحديث بقية بإذن الله بس هكلمك زي ما قولت عن 132

اشكرك اخي الفاضل على هذه النصائح
احد الاشخاص قالي من عيوب 132 ان ماتورها 2 كامة
وانا اساسا مش فاهم يعني ايه الكلام ده :)

المشاركة الأصلية كتبت بواسطة D2rkZ3r0

السلام عليكم انا اسف علشان اتأخرت في الرد بس الدنيا مكانتش متظبطة في الشغل
2 كامة يعني موتورين في ماتور واحد ميزة حلوة جداً بس لو لاقدر الله هتعمل عمرة ليها فهتاخد منك ضعف عمرة الموتور الواحد + سحب البنزين هتلاقيه اعلي شوية من المعتاد

العربية 132 الحمد لله ماشي بيها حالياً و مفيش اي مشاكل واجهتني فيها تماماً لحد دلوقتي و راسية جدا عالطريق و الحمد لله و كانت العربية محتاجة شمعدان ليا واحد حبيبي ظبطهولي و بالنسبة لكهربة السيارة سهل التعامل معاها اوي و الحمد لله و يمكن اكبر مشكلة واجهتني فيها ان الدركسيون تقيل شوية فمحتاجة حشو لعلبة الدركسيون و لسه هسأل عن اماكن قطع الغيار علشان هبدأ اظبطلها جدول صيانة دورية
العربية واسعة من جوة و لو مشيت بيها في الطريق لاحظت ان كل العربيات العالية بتبعد عني مش غلظ في سواقتي الحمد لله بس عارفين ان لو هزروا مع 132 هم اللي هيزعلوا في الاخر ههههههههه
العربية واسعة من جوة جدا و كبيرة - حجمها ممكن يمثل مشكلة بالنسبة للي بيسوقوا جديد- بس لو حبيتها و حبيت سواقتها هتمشي معاك حلو اوي متركبش شماسات علشان مش هتشوف منها
اي حد ممكن يشتغل فيها حتي مع خبرة بسيطة منك هتحط فيها ايدك و تشتغل بنفسك فيها و قطع غيارها رخيصة و هتلاقيها في كل حتة زي
العربية قديمة بس عن تجربة احسن من عربيات كتير جديدة
و كان فيه استاذ فاضل كان قال جملة هنا في المنتدى بس ناسي اسمه و خدت بنصيحته " السيارة حالة" حالة العربية كويسة و مش وكلاها البرومة و الموتور كويس و صاحبها معتني بيها بشكل كويس و العربية واقفة صح و صوت مكنتها ناعمة و في نفس الوقت مكنة شديدة كان بها مفيش الكلام ده كله يبقي تبعد عنها
العربية سافرت بيها مرتين و كنت بطير بيها عالطريق وملقتش مشاكل في السخونة ولا اي حاجة بس طبعاً اساسي لازم تشيك علي زيوت العربية و البنزين و الماية و البنزين "ومتنساش دلايات العجل علشام لو مشيت في طريق فيه طين او مايه متبوظلكش بطن العربية"
جايب جيركن بنزين احتياطي و زيوت احتياطي و حاطت ازازتين مايه و استبن و كمبروزر لمجرد الاحتياط
بالنسبة للشكل الخارجي لسه هظبطها باذن الله و هغير لونها و اركبلها ليدات و طقم طاسات و هغير من شكلها شوية و مع اي حاجة هتركبلها العربية هيبان عليها

نصيحة اخيرة لو عقدت النية علي شراء سيارة معينة يفضل انك تاخد حد يكون فاهم كويس اوي في الشراء و البيع و السيارات و يكون قوي الملاحظة علشان حاجة ممكن تكون من وجهة نظرنا صغيرة بس تعمل مشكلة كبيرة فيما بعد لاقدر الله و يكون حد من قرايبك او معارفك القريبين اوي و ربنا ييسر ليك امورك

اشكرك جدا وكنت منتظرك بفارغ الصبر لتجربتك
مع 132 والمعلومات المفيدة
ربنا يسهل من كلامك قربتني من اني اشوف 132 حالتها وسعرها يكون كويس
جزاك الله كل خير ولما ربنا يكرم واشتري هاتابع معاك واعرف تظبيطتها منك