زيت فتيس فيرنا

**dr.mam** · 31-01-2017 05:53 PM

السيادة المحترمين أهل الخبرة بعد التحية..... ارجو من حضرتكم الافادة بخصوص زيت فتيس مانيوال للفيرنا
حيث يوصي الكتالوج ب 75W90 GL4 ولم اجده في اي من الزيوت المتوفرة عندنا بالمنيا (موبيل وشيل والموجود منه 80w90 GL5)
وعند الاتصال بمركز غبور كان الرد (هنحطلك 80w90 GL5)!!! .. .. هل في مشكلة في كده على الرغم من مخالفة الكتالوج كما ذكرت؟؟
وشكرا....

**tameem2010** · 31-01-2017 11:23 PM

اللى موجود 80-90 gl5
اللى في الكتالوج مش هتلاقيه في مصر
انا بحط شل 80w-90 gl5 زيت ممتاز ورخيص جدا
عن تجربة مبحطش الا شل
gl5 مش مناسب للفتيس اللى فيه مكونات نحاس انما مع الحديد زي الفل ومناسب جدا للفيرنا

**borio1704** · 01-02-2017 10:52 AM

جرب اسأل عند توكيل كيا أو متسوبيشي ... علشان بيستخدموا نفس الزيوت.

بس هو الكتالوج عندك بيقوللك تغير كل قد إيه؟؟

خلي بالك إن الكتالوج بيحدد معادين للتغيير... واحد في الحالات المثالية (الكتالوج بيسميها حالات عادية).. والتاني في الحالات الشاقة (اللي هي الحالات العادية بتاعتنا).

**borio1704** · 05-02-2017 08:15 AM

المشاركة الأصلية كتبت بواسطة dr.mam

اوﻻ شكرا جزيﻻ ع الرد..
ثانيا بعتذر عن الخطأ غير المقصود اني طرحت السؤال ف قسم زيوت المحرك بدﻻ من الفتيس...
الكتالوج بيوصي ف الظروف العادية بعدم التغيير ولكن الفحص كل 15 ألف او سنة...
وف الظروف القاسية التغيير كل 100 ألف..
سؤال 1:- هل فتيس الفرنا المانيوال فيه نحاس
وﻻ؟علشان نقدر نقول ان الزيت المتوفر ينفع و ﻻ.
2:- انا ماشي ع الزيتgl5 بقالي 40 ألف هل فيه مشكلة كبيرة؟
لﻷفادة:- انا اتصلت بتوكيل زيوت وولف وقالوا لي ان عندهم زيت الكتالوج ... ان شاء الله لو نزلت القاهرة هشتريه...
وتحياتي

ارجع لكتالوج عربيتك.. لو لقيت أي توصيات باستخدام gl-4 بس (يعني مش بيسمح بزيوت أعلى) يبقى ممكن يكون عندك مشكلة..

لكن في الغالب إن شاء الله معندكش مشكلة.

وقولنا وصلت لإيه.

**borio1704** · 06-02-2017 09:43 AM

المشاركة الأصلية كتبت بواسطة dr.mam

...جزاك الله خيرا مهندس . borio
انا بالفعل قبل ما أطرح الموضوع قرأت الكتالوج كويس وتأكدت (زي متعلمت من حضرتك وعرفت كتير من مواضيعك المفيدة والرائعة) ...
أحب أقول لك كمان اني قرأت كتالوج 2010 و 2015(ع الرغم ان موديل عربيتي 2006!بس كنت شريها من غير كتالوج)...
الغريب (وده سؤالاياريت تفيدنا فيه ) ان في اختﻻف ف اللزوجة .. واحد بيقول75W90 والتاني بيقول 75W85??
زي كمان زيت المحرك واحد بيقول ان ال 5W30 ف درجات حرارة أقل من 10 ونازل ! يعني مينفعش ﻷجوائنا ... والتاني يقول بدون حد اقصى لدرجة الحرارة(السهم مفتوح ع اﻻتجاهين)
وكمان ال 10W30 واحد بيقول ف درجات أقل من 40 ! يعني غالبا ف الصيف مينفعش والتاني بدون حد أقصى؟
واللذي توصلت له كما ذكرت زيت وولف ع حسب كﻻمهم ان فيه المواصفات المطلوبة بس لﻷسف ملهمش موزع ف المنيا فمستني لما انزل القاهرة وﻻ حد يجبهولي....
اه معلش هتقل عليك ف استفسار كمان ...
موزع وولف قالي ان فيه زيت واحد GL4&GL5 ف نفس الوقت ازاي ديه؟
وتحياتي

تقريبا من كلام حضرتك .. كتالوج الـ2015 ده بتاع أكسنت RB.. مش بتاع الفيرنا... لإن التوصيات اللي حضرتك ذكرتها دي نازلة في كل كتالوجات هيونداي وكيا الجديدة من بعد 2008 تقريبا.

وصححني لو انا غلطان

المهم..

بالنسبة لموضوع درجة لزوجة زيت المحرك 5W-30..
فالاختلاف الأساسي جاي من إن مستوى الأداء المطلوب في الكتالوجين مختلف..

في الكتالوج القديم.. مستوى الأداء كان API SG على الأقل.. والمستوى ده موجود في الزيوت المعدنية اللي تعتبر حاليا منخفضة في أداءها..

في بعض الدول اللي أجواءها باردة.. عادي جدا تلاقي زيوت معدنية خفيفة بلزوجة 5W-30.. والزيوت المعدنية دي مدى التشغيل بتاعها محدود .. زي الكتالوج القديم.

أما في الكتالوج الجديد.. فمستوى الأداء المطلوب مش هتلاقيه في زيوت معدنية إلا في النادر جدا وغالبا في لزوجات تقيلة.. وبالتالي فلزوجة الـ5W-30 اللي تمشي مع الكتالوج هتلاقيها تخليقية بس.

عموما.. فيه كلام على إن أي لزوجة تشغيلية للزيت (الرقم بعد الـW) تنفع تشتغل في أي جو لإن درجة حرارة الموتور ثابتة في جميع الأحوال... وهو كلام مقنع بصراحة.. ويمكن ده سبب بردو في إن الكتالوجات الجديدة ما بقتش تحط حد أقصى لدرجة الحرارة.. بس محتاج ألاقي مرجع علشان أقدر أتكلم بثقة أكبر.

بالنسبة لزيوت الفتيس.. أتوقع إن المسألة حاجة من اتنين..

إما الكتالوج بتاع الأكسنت زي ما قلت لحضرتك من شوية.. والاختلاف هنا طبيعي لإن التكنولوجيا اختلفت خالص في هيونداي في الـ10 سنين دول... مواتير جديدة أقوى وفتايس جديدة أحسن .. وأكيد حضرتك شايف الطفرة في كل عربيات هيونداي في العالم.

أو إن دي ممكن تكون سياسة إنتاجية من هيونداي لتقليل التنوع في الزيوت اللي بتستخدمها على أساس إنها ما بقتش تستخدم الزيوت باللزوجة الـ75W-90 في الفتايس بتاعتها حاليا.. وده مؤكد بيقلل التكلفة على المصنع.

ولو إني أستبعد الفكرة دي بصراحة.

بالنسبة لموضوع الزيت الـGL-4 وGL-5 اللي مع بعض... فأغلب الظن إن الزيت ده مفيهوش إضافات الفسفور الموجودة في الـGL-5 واللي بتسبب تآكل سبايك النحاس.. وبيستبدولها بإضافات تانية تأدي نفس أداء الـGL-5 بس بدون مشاكله..

بس لازم تتأكد إن علبة الزيت مكتوب عليها الكودين ... مش كود الـGL-5 بس... لإن غالبا معظم الناس فاهمة إن GL-5 يحل محل الـGL-4 على أساس إنه المواصفة الأعلى (أنا كنت واحد من الناس دي على فكرة).

خلي موزع وولف يبعتلك الداتاشيت بتاعت الزيت أو يديلك لينك للزيت على موقعهم علشان ندخل ونتأكد.

...