الموضوع: ما رأى كل سوزوكاوى فى Sx4 سيدان من حيث الاتساع و الثبات و الامكانيات

ياترى رأى كل سوزوكاوى فى العربية SX4 سيدان من حيث الاتساع هل هى سيارة عائلية ام لا تصلح لعائلة هل هى كسيارة ثباتها عند السرعات العالية جيد أم لا هل الامكانيات الموجودة بالسيارة و بخاصة المانيول جيدة ام بها نقص وأرجو ابداء الرأى فى كل ما سبق بغض النظر عن أنها يابانية الصنع و تقفيلها ياباني بنسبة 100%

السلام عليكم
معلش انا هتطفل علي الموضوع وهقول رائي بس
من حيث الامكانيات والشكل لاني مش ركبتها أنا شفتها بس

بصراحه العربيه من حيث الشكل والتقفيل تحفه فعلا
وتبان عليها الفخامه والقوه في ملامح النصميم
الشنطه واسعه جدا وده من الخارج
ا
شركة سوزوكي بقالها فتره كبيره
ماشيه علي خطوط التطوير والتميز في كل تصميماتها
وده مؤشر جيد لاقتناء السياره

وربنا يوفقك

أنا مش معايا العربية بس ركبتها في معرض كانت تحفة من حيث الشكل و التقفيل تحس فيهم الفخامة والاتساع فيها حلو جدا و الشنطة واسعة جدا 515 لتر والعربية عالية يعني مش حتحك في المطبات وفيها 2 ايرباج abs+ebd و cd mp3 وجنوط سبور 15 و4 زجاج كهربائي و مرايات كهرباء و فوجات أمامية واعتقد ليها ريموت و انذار وشاشة تحسب استهلاك البنزين و حرارة الجو بس بالنسب للأداء مش عارف بس أعتقد انه كويس بس متهيألي أنه مفيش منها مانيوال دلوقتي بس العربية الأوتوماتيك مع عضوه هنا اسمها حنينا بتشكر فيها قوي و بتقةل سحبها حلو وأن التكيف مش بيأثر على السحب

الحمد لله ، بعد 20 الف كم من البهدلة و التحميل الشد والجرى، والمشى فى طرق غير ممهدة ، زى الوصلة اللى من اخر الدائرى فى المريوطية لطرق الواحات ، ماشاء الله العربية حالتها زى اول يوم سقتها فيه .
العفشة ممكن تكون ناشفة شوية علشان هى عربية راليات وطرق غير ممهدة ، بس الموضوع ده غير متعب او مزعج خالص وانا شخصيا مرتاح فيها الحمد لله.
والعربية الميزة الرئيسيه فيها هى قوة السحب الممتازة،بالرغم من انها 107 حصان بس!!
والثبات الحمد لله لا غبار عليه على السرعات العالة والمناورة لحد 140-150 كم\س بس طبعا ماينفعش نقارن بالسيفيك او الجيتا مثلا :)

وده طبعا مش رأى مطلق ، لأ ده مقارنة بالانترا و اللانسرالقديمة والجديدة و الكورولا القديمة و الابترا ، علشان انا سقت العربيات ده فترات كبيرة برة مصر،وكلهم كويسين ولاكن ترتبهم من وجهة نظرى من حيث قوة المتور والتسارع ومتعة القيادة :
1)sx4
2)النترا
3)اللانسر الجديدة
4)الكورولا
5)الابترا
6)الانسر القديمة

المشاركة الأصلية كتبت بواسطة mohaismail

اللى عرفته انها كويسة جدا بس فى مشكلة جامدة فى العزل بتاعها يعنى لما تقفل الزجاج مش هتحس بهدوء خالص وصوت الموتور عالى ومسموع جدا غير كده العربية كويسة جدا وسعرها حلو اوى

المعلومة دى خاطئة تماما وانا مش عارفة حضرتك بتقولها بناءا عن تجربة ولا سمع فقط
العربية معايا ومااعتقدش ان فيه منها مانيوال وزى ماقال استاذ مكاوى العربية جميلة جدا ولو رجع بيا الزمن كنت هاجيبها برده
وبالنسبة لاسئلة صاحب الموضوع فالعربية مناسبة جدا لعائلة لان مساحتها الداخلية كبيرة وشنطتها بحر ماشاء الله واداءها ممتاز وبالذات السحب ماتحسش انها اوتو ابدا وكمان علوها عن الارض مريح جدا وثباتها حلو بالرغم من الارتفاع ده انا كنت ماشية بيها على 140 ومعتقدة انى ماشية 90 ولما بصيت على العداد كان هايجيلى سكتة قلبية بصراحة
وطبعا موضوع العزل ده مش صحيح بالمرة انا باقفل الازاز وباحس انى بقيت فى عالم لوحدى

طيب ال sx4 ولا الياريس

اللى عرفته انها كويسة جدا بس فى مشكلة جامدة فى العزل بتاعها يعنى لما تقفل الزجاج مش هتحس بهدوء خالص وصوت الموتور عالى ومسموع جدا غير كده العربية كويسة جدا وسعرها حلو اوى

ياريت حضرتك تقولنا عرفت المعلومة دى من فين ؟ هل حضرتك جربت العربية؟ او تعرف حد عنده العربية بيشتكى من كدة؟؟

لان لو ده فعلا صح يبقى انا اللى عندى غلطة فى العربية ، والعزل زيادة عندى شويتين، لانى فعلا بنعزل عن العالم الخارجى لما بمشى بالعربية :)

طيب ال sx4 ولا الياريس

العربيتين مش من نفس الفئة ، فمينفعش نقارن أداء وقوة المحرك لانه فى صالح الSX4،
ولاكن العربيتين فى نفس مستوى التقفيل والخامات ، بس الفكرة انك لو ناوى تغير العربية فى خلال سنة او اتنين بالكتير ، يبقى اليارس افضل علشان اعادة البيع بس هى اصغر بكتيربالاخص الشنطة ،ولاكن لو ناوى تخليها معاك كام سنة يبقى الSX4 ان شاء الله حتريحك.
انا جربت الاتنين قبل لما اشترى ، فانصحك تعمل كده انت كمان.

أشكرك لتصحيح المعلومة لانه بالفعل غالبية ملاك الـsx4 اكدوا نفس كلام حضرتك و عليه ، أى عضو بالمنتدى يشترك فى موضوعنا هذا يكون على يقين بصحة هذه المعلومة و كل عام و انت بخير