خطوات شراء سيارة جديدة "زيرو" من المعرض
السلام عليكم ورحمة الله وبركاته
إن شاء الله قررت اجيب رينو ستيب واي 2017
ومحتاج شوية نصائح وأعرف شوية حجات
مبدئياً كدة انا مش بعرف اسوق "لسه هتعلم يعني"
وكنت ناوي اعمل زي مالناس بتبدأ .. واجيب عربية مستعملة منوال اتعلم فيها وكدة
لكن مع ارتفاع الاسعار والمبالغه في سعر المستعمل + مشاكل المستعمل + "عندي رهبة من السواقه ومش بحب وجع الدماغ"
قررت اجيب زيرو اتوماتيك واسهل الدنيا على نفسي ومعقدهاش
1- ازاي اتأكد ان العربيه موديل 2017 مش موديل قديم
( الستيب واي 2017 مفيش معلومات تقريباً عنها واضحه عالنت وتقريبا اغلب المواقع ناقل مواصفات وصور الموديل القديم )
2- ازاي افحص العربيه في المعرض بطريقه عمليه وسريعه
( لأن في الغالب موظفين المعرض هيبقوا فوق دماغك وعايزينك تنجز )
3- هل يشترط وجود رخصة قيادة علشان اشتري العربيه من المعرض ؟
4- ايه المستندات اللي لازم استلمها مع العربيه "ياريت تفاصيل واسمها الدارج في المعارض"
يعني لو ايصال نقول ايصال .. لو استماره نقول استماره .. لو فاتوره الخ .. وشكلهم ايه
5- اسلوب الدفع والاستلام .
6- هل في حجات المفروض استلمها مع العربيه " كوريك او عدة مثلاً "
7- اخلي بالي من ايه وما ادققش مع ايه ؟
8- ترخيص العربيه والسير بها من المعرض بدون لوحات ( ايه النظام )
إن شاء الله هيكون معايا صديق كان معاه نفس العربيه موديل 2015 منوال
اخيراً : ايه الصح بقى اللي اعمله علشان اتعلم السواقه على العربيه دي
ولو في إضافات من عندكم ونصائح اكون شاكر .
شكراً